92
Bab-Dummad-nued-daed-ular, ega namakleged
We-namaked obunnoged-ibagi namakleged.
1 Bab-Jehová, bega-doggus-nuedye-soglegedi, ibiyobi dog-nuedi.
Bab-Dummad-Bur-Birigined, be-nuggi-namakedi, ibiyobi dog-nuedi.
2 Wakudaryalaba be-sabgued-dummadgi-namakedi, ibiyobi dog-nuedi.
Mutikidba be-innikidaedgi-namakedi, ibiyobi dog-nuedi.
3 Gar-oimakar-goledba-namaked, gar-lira-goledba-namaked, ibiyobi dog-nuedi.
Gar-arpa-goledba-namaked, gar-salterio-goledba-namaked, ibiyobi dog-nuedi.
4 Bab-Jehová, be be-ibmar-gegerdaklemalad-imakedba, weligwar be an-imaked.
A-ulale, be-ibmar-imaksadba, an weligwar-itoge an bega binnasur namakoed.
5 ¡Bab-Jehová, ibibayobi be-ibmar-imaksad dummarba-gue!
Bab-Jehová, be-binsaed bela-bela yeer-gangusoggu,
6 dule-binsaedsulidaed, magar itosulid,
dule-ibmar-wissulid, aku itoged.
7 Amba dule-isganamar gaganyobi ainialile, dule-galagwensulidamalad dutuyob achunnalile,
unnila degisadegu-berguega gumaloed.
8 Bab-Jehová, bebi unnila degisadegu bur-gandikidga maid.
9 Bab-Jehová, napiragwa, be-isdarmalad berguoed,
bela dule-galagwensulidamaladi oaisakilegoed.
10 Bedi moli-bebe-nikad-ursilid-gangued-nikadyobi anga gargangued uked,
gwallu-wawad-bur-nuedgi be an-nono wawamaksad.
11 An-isdarmalad-galakusad-dakega, be an-imaksad,
an-isdarmalad-obelolesad-itogega, be an-imaksad.
12 Dule-nuegan, ogob-sanmakedyobi gumalad,
Líbano-yargi urwarmar-dungumaiyobi gumalad.
13 Dule-nuegan, Bab-Jehováʼse-goled-neggi sapi-digar-gwichiyobi gumalad,
anmar-Bab-Dummadse-goled-neg-imbagi dutuyobi achutemalad.
14 Dule-nuegan, amba sered-ugakine, sanmakgwichi gumaloed,
san-nued-gudii, dutusur-gudii gumaloed,
15 adi, sogmalaga: “Bab-Jehová dule-innikigwadye.
Bab-Jehová an-gandikidye,
egine igar-isgana-imaked naisurye.”