101
Bab-Dummadga-innikii-nanaoye-soged
David we-namaked narmaksad.
1 Bab-Jehová, namaklegedgi an bega namakoed.
Sabguedgi, an namakoed,
igar-innikii-imaklegedgi an namakoed.
2 Nued nanadii an gubied.
¿Wede sana be anse ataknonikoe?
An-neggi gwage-napiragwadgi an nanadii gubied.
3 Ibmar-isganagi an atakbisulid.
Igar-isgana an imakbisulid.
Dule-Bab-Dummad-Igargi-banguddamalad an sae-daked.
Amala anse-warmaked an imakosulid.
4 Binsaed-isganamargi an banguoed.
Ibmar-isgana an imakbisulid.
5 Dule dule-baidgi-arbak-sunmaked an obelogoed.
Dule-san-dummarba-saed, anse-warmaked an imakosulid.
Dule-baigangi-obinye-soged, anse-warmaked an imakosulid.
6 We-yargi dule-be-igarba-nanamalad, anba-gudigumalaga an amioed.
Dule-be-igar-maidba-nanadimaladbi, anga arbamaloed.
7 Dule, dule-yardakmaladgi-arbamaladi, an-negyagi gudii guosulid.
Dule gakansaar-sunmakedi an-asabin gudii guosulid.
8 Bane-bane we-yargi dule-isganamar-gudimalad obelomai an imakoed.
Bela dule-ibmar-isgana-imakmalad, Bab-Jehová-neggweburgi an onogoed.