137
Babilonia-diwar-naba bobukdamalad
1 Babilonia-diwar-naba anmar ambakudapdaed.
Agi, anmar Siónʼgi-binsabukwadba, bobukwadaed.
2 Anmar, anmar-gar-arpa sapi-Sauceʼye-nugadgi,
an nasikdamalad.
3 Dule-anmar-gasa-sesmaladi, anmarga sokardaed, namakmarye.
Dule-anmar-ibe-ibmar-susmaladi, anmarga sokardaed, anmarde wergumarye.
Anmarga sokardaed:
“Be-Sión-yargi-namaklemaladi, be anmarga namakye.”
4 ¿Wede igi anmar yar-baidgi Bab-Jehováʼga namakosunna?
5 Jerusalén-neggwebur, an be-iedele, an argan mer bar gar-ogolega gusun.
6 Jerusalén-neggwebur, an be-iedele, an-wergudiidba bar begi an binsasulile,
geg bar namake an gusun.
7 Bab-Jehová, Babilonia-dulemar Jerusalénʼgi-nakwisgu, Edom-dulemar-sognanai-gusad, be insao:
“¡Jerusalén-neggwebur bela be obelomarye!
¡Swanga be nasikmarye!”
8 Babilonia-neggwebur, ibagwengi be bibisgelemogoed.
Bemar anmar-imaksayob be imaklemarmogoed.
Dule-deyob-bemar-imakoedi, egi nued binsalegoed.
9 Dule be-mimmigan-gani akwagi-sabsur-omukuoed.
Dule-deyob-be-mimmigan-imakoedi, egi nued binsalegoed.