139
Bab-Dummad bela-neg-ugakaase-gudiid
Namakmalad-e-iduedga narmaklesad. David we-namaked narmaksad.
1 Bab-Jehová, be an-baramied.
An-gudiid bela be wisid.
2 Sana an sigoe, sana an gwisguoe,
be nue-wisimakaled.
An begi dikasur-gudi-inigwele,
bedi an-binsaed nue-wisimakaled.
3 An-nanaed, an-obunnoged, be nue-wisimakaled,
bela an-igarmar be nue-wisid.
4 Bab-Jehová, ar amba yoo an ibmar-soge,
bato bedi bela wisdaed.
5 Bela-belad be an-irwa gwisgudiguad.
Be-argan-yaurgi be an-sediid.
6 Weyob be ibmar-wisidi, an bela-bela geger-itoged,
¡Bela-bela be ibmar-wisidi, an aku-itoged!
7 Bab-Dummad, ¿Ar bia be-Burbagi an banguoe?
¿An bia begi wakinnoe?
8 Ar an nibnegse naele, bedi agi maid.
Ar an burgwarmalad-meged-galuse an naele, bedi agi gudibalid.
9 Ar an dad-nakwedsik naeyesogele,
ar an magatiba naeyesogele,
10 amba be agine an-idu gudiid,
be-ganguedgi be an-sedii guoed.
11 An sogdibe: Negsichid an-odukuoye,
neg-meegwad anga neg-mutikidga guoye, an binsa-sogsaled.
12 Ar begardi negasichid negsichidga gusulid,
begardi neg-mutikid neg-ibginedyob gued.
Begardi negasichidi, neg-meegwadi, emarbi gued.
13 Bab-Dummad, bee be bela an-abagangi-ibmar-bukwad obinnisad.
Bee be, sapidukugi an-mesisad.
14 Doggus-nuedye an bega soged,
be-ibmar-obinnisadi, andi geger-daked.
Be ibmarmar-imaksadi, geger-dakleged,
ar we-ibmar an nue-wisid.
15 Ise-dukuale, an-abagangi arbalenaigu, an-garmardi begi odukulessulid.
Ise-dukuale, an sapidukugi-mai angi-arbalenaigu, anga abgan-dubagan gwadilenai gusad.
16 An sapidukugi-maigua, bedi an-daksad.
Amba yoo an we-napnegse aidedage,
birgabigwa an dula-gudii guoe,
bela bato be-gardagi narmakar maid.
17 Bab-Dummad, be-binsaed ibiyobi anga doggus-nued gue.
¡Be-binsaedi, ibiyobi mergue!
18 Ar be-binsaed an ebisye-sogele, bur bule ukubba mergueled.
Ar an be-binsaed-ebised an obelo-sogele, amba be an-walik gudiiled.
19 Bab-Dummad, dule-isganamar be oburgwe.
Dule-ablis-eomalad, angi be obangue.
20 Wemar-begi-dodoar-sunmakdimaladi,
binsarsunna begi gwisgumalad.
21 Bab-Dummad, dulemar-isdar-be-daked,
¿an isdar-daksurmo be insae?
Dulemar-be-abingasulid,
¿an sae-daksurmo be insae?
22 An bela-bela isdar-daked,
an-isdarmaladga gunonimalad.
23 Bab-Dummad, be an-baramie,
an-gwage-ulub be dake,
be an-wilubdake,
be an-binsaed dake.
24 An igar-isganaba nadapi be an-dakele,
geg-igar-berguedba be an-sede.