148
Bela-ibmar-obinnilesadi, Bab-Jehová-nug-odummoged
1 ¡Aleluya! ¡Bab-Jehová-nug odummolesun!
Nibneg-akar, Bab-Jehová-nug be odummomar.
Nibneg-matusulid-akar,
Bab-Jehová-nug be odummomar.
2 Bela Bab-Jehová-baliwiturmar, Bab-Jehová-nug odummomar.
Bela Bab-Jehová-sorda-bilagi-urwemalad, Bab-Jehová-nug odummomar.
3 Dad-ibeler, Bab-Jehová-nug odummosun.
Nii, Bab-Jehová-nug odummosun.
Niisgwamar, Bab-Jehová-nug odummomar.
4 Bela mogirmar-ugakaase-nanaid, Bab-Jehová-nug odummomar.
Diimar-mogirmar-niba-nanaid, Bab-Jehová-nug odummomar.
5 Bab-Jehová-nug odummomarsun,
ar e-ibmar-sogsadba, ibmarmar obinnilesad.
6 Degisadegu ibmarmar innikii urbilesad.
E-igar-omesisadi, bar egi annalegegarsulid.
7 Napneg-akale, Bab-Jehová-nug odummomar:
Demargi ibdula-dummagan-bukwad, Bab-Jehová-nug odummomar.
Demar-wilagana, Bab-Jehová-nug odummomar.
8 Mala-ibyemalad, dii-gwamakarmalad, Bab-Jehová-nug odummomar.
Boo-gwamakaled, boo-batemalad, Bab-Jehová-nug odummomar.
Burwa-dummagan-be-sogedba-ibmar-imakedi, Bab-Jehová-nug odummomar.
9 Yalamar, bela yala-mullugan, Bab-Jehová-nug odummomar.
Sapi-san-nikamalad, bela urwarmar, Bab-Jehová-nug odummomar.
10 Ibmar-dula-sapurbarmalad, ibmar-durgan-negginmalad, Bab-Jehová-nug odummomar.
Ibdula-unimalad, nuumar, Bab-Jehová-nug odummomar.
11 Reymar-napneggi-mamaid, Bab-Jehová-nug odummomar.
Bela dulemar-yar-baid-baidgi-bukmalad, Bab-Jehová-nug odummomar.
Dule-nuga-nikamalad, dule-dummagan-yar-semamaid, Bab-Jehová-nug odummomar.
12 Sapingana, yagana, Bab-Jehová-nug odummomar.
Dadormar, mimmigan, Bab-Jehová-nug odummomar.
13 Bab-Jehová-nug odummomar, ar a-nugbi unnila dummarba gued.
E-gandik-yeerdakleged, napnegba, nibnegba, bur-gandik dakleged.
14 Bab-Jehová, e-neggweburga gangued uksad.
Israel-wagan-bela-Bab-Jehováʼba-nanadimalad, e-dulamar-walikagwadga-gubalid,
Bab-Jehová-nug odummomar.
¡Aleluya! ¡Bab-Jehová-nug odummolesun!