Huanocca ima teppe tahidecca
1 Juan
Huanopa Jesocca dodosse tabaqqui ojaria. Ajijaro ima teppepi Jesodsa jehe quinajaridenidsa dsodo inajaro. Pohuadenidsa: —Occa ejedenissa tiquinajaro −najari. Huano dsodo inajaropi Diopa ssiaja tahi, Pohua Bedi Jesocristo naco imasiri cappirahi, najari. Pocca dsodoniji onihipi: Imecotedeni tedseje eti cahanerara cananina bica tani. Diodsa imadinissa tanijinepi imasiri jirehe imadina, najari.
Huanocca dsodonijipi 5 nani. Tahideccapi Jeso tahimari. Dsotodeccapi ajijaro ima teppepaji. Ima teppe onihi naqui dsodo inajaro. Dsotode ima teppe onihi dsodo inapomajaro. Dsotode jadahi tocajadsa naco Apocalipsis dsodo inajaro.
1
Jesocristopa Dio Atti camittehecca
1 ¿Nija imecotedeni? Tiadenidsa Dio Atti camittehecca ima dsodo inajaro. Najaripa dsama toja-jeraccadsama madipojari. Jidapana naco madihi paja nahi. Iapi pohua atti imittade. Assire naco qqui inade. Pohuadsa jaijaridsadsa inoccodsa qqui idsanapode. Idsepedsa naco huapi bara inade. Najaripa Dio Atti camittehecca. 2 Diopa najaro camittehe iadsa nohue inajarode. Najaro camittehe qqui inajaropi aji ecomeraridsajaropaji. Tiadenidsa naqui najaro camittehe jiquejeranicca tahimarini huati inajaropaji. Najaro camittehepi Abi Diodsa anipojaro. Najaro iadsa ahuatojarode. 3 Nadsama aji qqui inajaro, imittajaro tiadenidsa huati inajaropi iadsa tijariqquimananijine. Pina ia Abi Diodsa ijariqquijarossa, Pohua Bedi Jesocristodsa naqui ijariqquijarossa tiquinanijine. 4 Aji ima dsodo inajaropi ticcadeni huatidsehe pajiranissa tanijine.
Diopa ssiaja tahi
5 Aja Jesocristo ia mari tocanabaqquijaricca imaha aji tiadenidsa huati inajaropaji: Diopa ssiaja tahi. Pohuadsapi dsidsini nohuerani. 6 Ettipi: —Diocca iquejenani −ihinanaraha dsidsinidsa jaijaridsadsapi imaidsajaro. Pajissehe imittaraha najarossa inana-jerani. 7 Naraha ssiajanidsa jaijaridsadsapi pina Dio ssiaja taha madijarissa inanijine. Nadsapi imecotedeni tedseje ijariqquijaropaji. Dio Bedi Jesocristo emene naqui icca imasiri huapima inanamossi-dsanapojaropaji.
8 Ettipi: —Imasiri ocappirani −inadsapi ia icamaidsa tani. Pajissehe iadsa nohuerani. 9 Naraha nahatoqquiri inani: Diopa maidsera tahi. Pocca imapi toccanissa tajaro. Pohuadsa icca ima ecomeradsa: —Occa ima tabaccora tani. Imasiri ocajini −inadsapi Diopa icca imasiridsa: —Epejena, ohuadi-jerani −najari. Icca tabaccorehe sse inajaro. 10 Pohua Attipa: —Madijapa imasiri cajiridsamanajari −najari. Naraha ettipi: —Ohuapi imasiri ocappirani −inadsapi pina: —Diopa mamaidsade −inajarossa najaro. Nema inanadsapi ibodidsa Dio Atti nohuerani ahuato tani.