Jesocca dodosse tabaqqui tahimarideni
Los Hechos de los Apóstoles
Ajijaro imapi Roca dsodo inajaro. Rocapa doctoro. Pohuapa Jeso tahimari dsodo inapojaro. Najaro papeopi dsodode onidsa Roca, inajaro. Dsotodena Jesocca dodosse tabaqqui dsepedeni ijiridsamanajari tahimarideni dsodo inajaro. Jesodsa jehe quinajarideni tohuapi-dsanapojari tahimarideni naqui dsodo inajaro.
Rocapa Jesodsa ccaridsa-jararaha Jesocca dodosse Pablodsa ccaridsadsa Pablo tahimari, Jesocca dodosse tabaqqui ohuahadeni tahimarideni naqui dsodo inajaro. Pohuadenidsa huati tadsa pohuadeni tahimari mittajari. Ajijaro imapi Roca pohua tesse Teofirodsa dsodo inajaro, Jesocca dodosse tabaqqui tahimarideni nahato tahijine.
1
Dio Corime madijadsa tojaridsahijine tahimari huati tapojari Jeso
1-3 ¿Nija Teofiro? Ohuapi Roca. Tiadsa Jesocristo tahimari dsodo onapojaro. Aja pohua dsepe ihiji najaricca ima dsodo, aja madija mari mari ihicanabaqqui najaricca ima dsodo onajonajaroa pohua toccamacossanihi bacco tajaropaji. Jesopa dsoqquedsa ppa idsamanaraha nahatonidsapa memehuaji toccamacossani-jaraccadsa pocca dodosse tabaqquidsa aja pohua icattejidsa-baqquipojaridenidsa ahahuatoni najari. Pohuadenidsa madiridsapomaccajari. Jesodsana Dio Corime madidsa pocca dossenijicca ima pohuadenidsa huati huati tataja najari. Pocca bejo naqui pohuadenidsa nohue inadsapi: —Jehe, Jesopa pajissa assire madinipomajari −quinajari. Nadsapa huada 40 nehe pohuadenidsa madiridsapomadsa naco Diocca cacahuehecca ima mari mari ihicanabaqqui najari.
Nadsama pocca dodosse tabaqquidsa madiridsapomadsa naco ajijaro ima pohuadenidsa huati tajari: —Jehe, aji odsa panani Jerosare tinebomana-jeraji. Occa Abi huati tapojaricca ima bicani pajissa tiadenidsa tojanijine tohuini timadimanaccaji. Najaro imapi tiadenidsa huati onapode. Tahidedsama tibodideni cacajiqquimeradsapi: “Occa imasiri onebona” tiquinadsapi Huanopa passodsa tiadeni topa todsanabaqquiraha nidsa huada onihidsana Dio Pohua Corime tiadenidsa da inaridsadsapa tibodideni denima cacajiqquimeranitohui. Diopa tibodideni dsati inananitohui −najari Jeso.
Huada onihidsa Jesodsa queriqquipomadsapa pocca dodosse tabaqqui pohuadsa huati toquinajari: —Ia Medsede, maittaccadsama icca idideni Isaraeridenicca cacahuehe jicaporaha ¿jidapana tijine tojapomanijinequi? −quinajari. Naraha Jeso pohuadenidsa huati tajari: —Tettidenipi: “¿Nejecoma nadsa ia Isaraeridenicca cacahuehe tojapomapadseje?” ¿tiquinajaroqui? Naraha najaro imapi ticcadeni jerani. Abi Dio Pohuana nahato tajari. Nidsa Pohua jipa tadsa ticcadeni cacahuehe tojapomanitohui. Naraha Dio Corime ccajonabote nahi. Tibodidenidsa tojaridsadsana pocca dacorehe ticajimananitohui. Nadsana otahimari maride tiquejenaridsanijine. Aji timadimananicca odsa panani Jerosaredsa maride tiquejena, ticcadeni dsama Jodeadsa maride tiquejena, Jodea inorinicca dsama Samariadsa maride tiquejena naridsanijine, onajaro. Aja dsama huaji tanicca madiridsamanajarideni naco huapima otahimari mittaridsamanahijine teccoraridsa-manana. Aji ohuadsa jai tijaridsadsa qqui tiquinajarocca ima, occa marinaja timittamanajarocca ima naqui mari ticanabaqquiridsana, onajaro −najari Jeso.
Jeso Imehihuaji toccamacossanijari
Jeso pocca ima huati huati taha jicadsapa pohua huatimadedeni cattomama canaraha toccamacossanijari. Meme essenidsa tohuatorajari. 10 Nadsama Jeso pohua huatimadedeni memehuaji tocattamacossassa cananaja pohuadeni inoridsa maqquideje pamaha eterorideni nopoqquiri naha ahuatomanajari. 11 Pohuadeni attipa ajama quinajari: —Aji dsama Carireacca madija ajidsa timadimanajarodeni ¿nejecotohui memehuaji ticattamacossassa canajaro? Aja Jesopa tiadenidsa madiraha Dio idinimacossanijari, memehuaji madipomahijine. Aja toccamacossanihi qqui tiquinajaripa ccanipomadsa naco najarissa nahitohui. Meme essenima quejemaha namihuaji ccaronapomahitohui −quinajari.
12 Nanaja Jesocca dodosse tabaqquipa ssono Oribodsa queriqquiraha: —Jina, Jerosarehuaji jaijedsippanina −quinajari. Aja pohuadeni jahidsippanihicca ssonopi Jerosaredsa huajira tani, pina jassinajacca huadadsapi huajira tanidsa ccaridsade oppinera tani, quiquinanajari. 13 Nadsapa odsahuaji bacco nanimanadsapa odsa tetepihuajicca coba canahuajaninidsana jai tojamaronidsapa nahidsa madimanajari. Nahidsa madidepa: Pedro, Huano, Satiaco, Adiri, Feripe, Tomas, Batorome, Mateo, Arapeo bedi Satiaco, Ssino, pohuadsa romanodeni momohuade quiquinanajari, Satiaco bedi Joda quinajari. 14 Odsa tetepiccadsa madimanadsana huajijiradsa Diodsa huatide totoqueriqqui najari. Jeso imecotedeni, pohua imeni Maria, amoneje onihi naqui nahi pohuadenidsama Diodsa huatide totoqueriqqui najari.
Matia Jesocca dodosse tabaqquidsa tojajari
15 Nadsapa huada onihidsa Diodsa huatide queriqquipomajari. Madija 120 quinaha queriqquimanajari. Nadsapa Pedro totehemadsa pohuadenidsa huati tajari: 16 —Jehe ohuemecotedeni, Dio Atti dsodo naponiccapi pajissa tojajaro. Maittaccadsama Dio Corimepa tamine Dabidsa Jodacca ima ahuato inanapodsa Dabi huati tapojari. Najaria aja Jodajine Jeso todsepe tojajaripaja. Najaroa aji ia qqui inajaropaji. 17 Jodapa Jeso icattadsapa pina aja iassa narahade. Pohua dsepe ijijari naco pina aji iccassa narahade. 18 Naraha Jodapa pocca tabaccorehe manaconi dsiniro cajijaridsa dsama mitta inajaro. Nahidsa pohua tatihuaji tohuedimadsapa assire sseo tajari, idsone naqui ccodo tadsapi dsoqquejari. 19 Nadsapa odsa panani Jerosarecca madija najaro ima mittamanadsapa pocca dsama icanacanimanajaro: Aseodama, quinajari. (Ettidsapi: Tohuemene pina sso tabaqquini nani, inajaro.) 20 Najaroa maittaccadsama tamine Dabi madidsa pocca jijiridsa Dio Atti dsodo inapojaro:
“Pocca dsama, pocca odsa naqui totabaccorana. Nahidsapa madide nohuerana” napohui nade.
Dabicca jijiri onihidsa naqui ajima naponi nade:
“Pohua dsepe ijijaripa madija ohuahana dsepe ijina” napohui nade −najari Pedro.
21 —Nadsapa aja Joda dsepe ijijariccadsa madija ohuaha dsepe ijihijine qqui inana. Aja ia Medsede Jeso iadsa ccaridsadsa iadsama jahiridsajarideni ajadsa madimanahi. 22 Najarideni ojaria ¿nejecojarina Huano Jeso passodsa topa idsanapohuidsama qqui najonajaria Jeso pohua toccamacossanihi qqui tajaritta? Najarina iadsama Jeso nahatonihi tahimari eccoraridsanijine, onajaro −najari Pedro.
23 Nanaja Pedro atti mittamanadsapa madija pamaha onideni hua inabaqquimanajari: —Aja Dsodse, Matia quinajaridenina paja −quinajari. Dsodse oni ohuahapa Barsaba, oni ohuaha naco Justo quiquinanajari. 24-25 Nadsapa Diodsa huati toquinadsapa ajama quinajari: —Ia Medsede Dio, tiapi madija bodideni qquide nahatojide tijirani. Tiapi tetti ¿nejecoma nani? Ajadsa madija pamaha icattejidsa-baqquihi ¿nejecojaridsana jipa tinani? ¿Nejecojarina aja Joda dsepe ijijariccadsa tojahijine? Jodapa imasiri inanadsa ia tonebobaqquidsa Dio Tijine pohua tedsejemacca ima tinanajoraponihuaji tojahi −quinajari. 26 Nadsapa pohuadeni pamahadsa: —¿Nejecojarina Joda dsepe ijijariccadsa tojahijine? −quinadsa siba bedeni pamehe idsabamanadsa: —Ajaropi Dsodsecca, ajaropi Matiacca −quinadsa dsaminidsa icodidsamana nadsa qquedse qquedse quinadsa ojarie ssonadsapi: —Matiana paja −quinajari. Nadsapa Matia Jesocca dodosse tabaqquidsa tojajari. Nadsapa 12 quinapomajari.