1 Madija Jesocristodsa jehe naraha pocca jeheniji japari tajaro tiadenidsa bacco nadsapa: —Iadsa tiqquedsimani bica tani −tiquinaji. Naraha pohua tedseje ahuaji huati ahuaji huati tiquinejeraji. 2 Aja imecotedeni motapa: —Bani huapima, dsamatapa huapima ijipani bica tani −quinaraha imecote ohuahadenicca jeheniji japari tadsapi: —Bani ijipani oppina tahi −quinajari. Nadsapa dsamatapara jijipamana najari. 3 Nadsama bani, dsamatapa huapima jipamanajaridenipa aja bani jipamana-jarajaridenidsa: —Ssamoqquiri tiquinani −quina-jarana. Bani jipamana-jarajarideni naco pohuadeni imecotedenidsa: —Bani tijipamanadsapi ticcadeni ima bica tejerani −quina-jarana. Tetideni ajimamana tejeraji: Diopa timecotedeni huapimadsa: —Occa madija −najari. 4 Nadsama madija ohuahacca medsedsa: —Tijine bica tejerani −¿tiquinanijinequi? Najaropi ticcadeni ima jerani. Pohuajine ima bica tadsa, bica tejeradsa pohua medsedena pohuadsa huati tahijine. Najaro imassa najaro timecotedenicca ima nattome tiquinani bica tejerani. Ia Medsede pohuana madijacca ima inanabicanijine pajirahi.

5 Madija mota naco: —Iapi ajijaro huadadsara Diodsa etidsenijine bica tani −quinaraha mota attidenipa: —Huada huapima najarossa caniqquimerajaro. Huajijiradsa Diodsa ehetidse najaro −quinajari. Madija pohua pohua bodidsa ima bica tanicca icattejidsadsapi najarossa inanani bica tani. 6 Imecotedeni motapa: —Ajijaro huadapi Diodsa etidsenijine icattejidsajaro −quinajari, Diodsa bica inanamananijine. Imecotedeni motapa bani, jijipa huapima jipamanajari. Diodsa bica inanamananijine nama quinadsapa Diodsa: —Ticca daniji bica tani −quiquinanajari. Imecotedeni motapa Diodsa bica inanamananijinepi dsamatapara jipamanadsa Diodsa: —Ticca daniji bica tani −quiquinanajari.

7 Iapi ia tohuini inanicca tohuira imadi-jerani. Idsoqquenijine naqui ia tohuini inanicca jerani. 8 Imadiccadsapi ia Medsede inahatidsehijine imadijaro. Idsoqquedsa naqui pohuadsa imadinijine. Nema najaroa aji imadidsa, idsoqquedsa ia Medsedecca iquejenajaropaji. 9 Najarotohui Cristopa dsoqquejari. Nahatonidsapa madipomajari. Pohuapa jicajarideni, camittaqquiri najarideni Medsededeni tojajari.

10 ¿Nejecotohui timecotedsa: —Ticca ima tabaccora tani −tiquinajaro? ¿Nejecotohui pohua ajamani tinanamanajari? Iapi huapima Dio tedsejema idomo huanitohui. Nanidsa icca ima huapima Pohuana icattemanitohui. 11 Dio Atti dsodo nanipi ajima najaro:

13 Nadsapi timecotedeni tedseje: —Ticca ima bica tejerani −ticanirere cana-jerana. Ajima tiquinanina bica tani: —Ohuemecote imasiridsa onehedima-jarahijine ohua ohuacahuana −tiquinaji. Timecotecca jeheniji tinassamo-jeranijine tia tiara ticca madie tecahuaji, onajaro. 14 Ohuapi ia Medsede Jesocristocca ojajarojine obodidsa nahato onajaro: Dsamatapa, bani oppina tahicca nohuerahi. Naraha madija bodi: —Ajajari bani ojipanipi Diodsa oppina tahi −nadsa jipadsapa Diodsa bica tejerani. Pohuadsa pina imasirissa najaro. 15 Nadsapa timecotedsa oppina tahicca pohua qqui tadsa tijipadsapi jabojo tinanahitohui. Pohuadsa oppina tahicca tijipajaropi pohuadsa jipera tinajarossa najaro. Cristopa timecotetohui naco dsoqquejari. Paji tijipajarocca imadsa pocca jeheniji tinassamorana. 16 Cristojine tiadsa oppinera taraha madija ohuaha attidenipa: —Tijine bica tejerani −quinarana. Nama quina-jarahijine tia tecahuaji. 17 Diocca cacahuehepi ijipanicca, dse inanicca jerani. Pocca cacahuehepi Pohua Corime ia acco camadsa imasiri jirehe imadinissa tajaro, jonehedsa imadijaro, etidseri naridsajarona paji. 18 Jesocristocca medse iquejenadsapi najarossa inanadsa imadinijine. Nadsana Dio iadsa huatidsehitohui. Madija naco: —Bicaqquiri tiquinani −quinahitohui.

19 Imecotedeni huapima icajonerara cananijine, icca jeheniji denima todacorani nanijine naqui disseraqquiri inana. 20 Diojine timecote madihissa tajaricca ima tijipajarodsa tinassamo tejeraji. Iadsa jijipa oppina tahicca nohuerahi. Huapima bica tahi. Naraha ia ijipajarodsa imecotecca jeheniji tossamojarona Diodsa bica tejerani. 21 Icca ima bica tanijinepi imecote inehedima-jaradsana bica tani. Pohuadsa bani jipahijine oppina tadsapa najari bani ijipa-jerana. Dsedse inocco jano tanicca naqui dse inejerana. Imecote inehedimahijinecca ima onihi anidsa naqui najaro inana-jerana. 22 Tibodidsa: —Pajissa oppinera tahi −tadsapi najaro tibodidsara nahato tinaji. Diopa tibodi nahato tahi. Madija pocca imajine pohua bodi ocassera tajaradsapa huatidsehema madijari. Pocca ima bica tani nahato tajari. 23 Naraha madijapa: —Ajajari ojipadsa ¿bica taqui? ¿Bica tejeraqui? Ssamo onani −nadsa jipadsapa Diodsa bica tejerani. Pocca jeheniji pajiranissa tejeradsa Diojine oppinera tahi ssamo tajari. Ssamo taraha nama naha jipadsapa pocca ima bica tejerani. Madija pohua bodidsa: —Ajima onanadsapi Diodsa tabaccora tani −naraha nama naha najaro ima inanadsapi imasiri cajijari.