1 Uvimanye kuwa muna zisiku za uhelelo kwizakuwa na lusita lwa magayo. 2 Wanhu wezakuwa woilonda wenyewo na wanhu wene kulonda hela na wanhu wene kuitogoza na wanhu wene kuigoda na wanhu wene kuliga na wanhu hawawahulika tati zawo na mami zawo, welibule hewela na iviya wanhu wehi. 3 Iviya wezalawilila wanhu hawawalonda wanhu wamwenga, hawalonda kulekelela na wavwizilaji na wadelenya na wakali na hawalonda yanogile, 4 wanhu wowahinduka wayawo na hawaiteganya na wene magoda na wolonda madambwa kufosa kumulonda Mulungu. 5 Kwa kuwalola wezawoneka fana wanhu womuhuwila Mulungu, mbali wolema ludabwa lwake, iteganye na wanhu fana wawo. 6 Wanhu wamwenga wokwingila muna zikaye za wanhu, na kuwavwizila wanaake muladi wawategeleze wawo muhala. Wanaake wawo ni waja wabozi wamemile uhasanyi na kulangulizigwa na chila madambwa. 7 Wanaake wawo wogeza kuifunza siku zose, mbali kwaviya viweli hawadaha kuumanya ukweli. 8 Wanhu wawo wolema ukweli fana viya Yane na Yambule *Yane na Yambule wakala waganga wa Falawo uko Misili wawo wamulemile Musa. Lola chitabu cha Kulawa 7:11.viwamulemile Musa, nzewele zawo zibanangika, walemigwa kwaviya uhuwilo wawo wa uvwizi. 9 Mbali wanhu wawo hawezagendelela ng'hani, kwaviya ubozi wawo wizawoneka na wanhu wose, fana viya viiwalawilile Yane na Yambule.

10 Mbali weye kuyamanya mafundizo yangu na ugenzi wangu, na lungilo jangu muna ugima na uhuwilo wangu na kufunya umoyo kwangu na kulonda kwangu na kugozela kwangu, 11 kugaya kwangu na yangu. Kuyamanya yose yoyanilawilile uko Antiyokiya na Ikoniya na Lisitila, nifunya umoyo magayo makulu. Mbali Mndewa kanilopola muna yayo yose. 12 Munhu yoyose yolonda kukala kwa kumnogeza Mulungu muna ukuilumba na Chilisito Yesu, kezagazigwa, 13 na wanhu wehi na wavwizi wezaiyoha kuwa wehi ng'hani, kuno wowamvwizila wanhu wamwenga na wenyewo wovwiziligwa na wanhu wamwenga. 14 Mbali weye gendelela kutenda yaja yolondeka youfundizigwe na kuhuwila kwa ugangamalo. Kuwamanya waja wakalile wafundiza wako, 15 na kokumbuka kuwa kusongela viukalile mwana mdodo, kuyamanya Maandiko Yelile, yoyodaha kukwing'ha ubala wouching'ha ukombola kwa kufosela kumuhuwila Chilisito Yesu. 16 Maandiko Yelile yose yandikigwa kwa kulangulizigwa na Mulungu, yofaya kugolosela na kufundizila na kuwazuma wanhu ubananzi wawo na kuwalanguliza kukala kwa kumnogeza Mulungu, 17 muladi munhu yosang'hana sang'hano ya Mulungu yawe na chila chinhu choyolonda muna ukumsang'hanila Mulungu na yaisasale kutenda chila sang'hano inogile.