1 Bulahimu kasegela kahita ubanzi wa Negebu, kakala Gelali hagati ya Kadeshi na Shuli kwa lusita. 2 Bulahimu kalonga kuwa Sala kakala lumbu jake. Ivo mfalume Abimeleki wa Gelali kamsola Sala. 3 Mbali ichilo Mulungu kamulawilila Abimeleki muna zinzozi na kamulongela, “Kwizadanganika kwaviya kumsola muke ino, yoyamalile kusoligwe.”

4 Mbali Abimeleki hambandame Sala na kalonga, “Mndewa, niye ninoga haulongozi wako! Vino kwizaninanga niye na kabila jangu? 5 Bulahimu mwenyewo kalonga kuwa kakala lumbu jake, Sala iviya kalonga ivo ivo. Nitenda voilondeka na sisang'hane wihi.”

6 Mulungu kamwidika Abimeleki muna zinzozi, “Vinoga, novimanya kuwa yayo youtendile yanoga muumoyo, ivo nikugomesa sekeunitendele uhasanyi na sikulekile umdalise muke iyo. 7 Mbali lelo mbweleze muke iyo kwa mulumake, Bulahimu ni mulotezi wa Mulungu nayo kezakutosela, hwizadanganika bule. Mbali one humbweleze, nokuzuma uvimanye kwizadanganika weye na wanhu wako wose.”

8 Imitondo ng'hani Abimeleki kawatanga wasang'hani wake wose na kawalongela mbuli zose zozilawilile, nawo wadumba ng'hani. 9 Maabaho Abimeleki kamtanga Bulahimu na kamuuza, “Kuchitendela choni? Nikubananga choni mbaka kunitenda niwe habehi na kutenda uhasanyi niye na ufalume wangu? Kunitendela mbuli za mdukula hazifaya bule kusang'hanigwa.” 10 Abimeleki kamuuza Bulahimu, “Habali kusang'hana ivo?”

11 Bulahimu kamwidika, “Nitenda ivo kwaviya nigesa hanhu hano habule munhu yomdumba Mulungu, iviya mwahadahile kunikoma muladi mumsole muke wangu. 12 Iyo kweli ni lumbu jangu. Yeye ni mwana wa tati yangu, mbali siyo mwana wa mami yangu, na nimsola. 13 Lusita Mulungu viyanisegeze muna ikaye ya tati yangu na kunigala kuna iisi imwenga, nimulongela muke wangu, ‘One uhanilonda, hohose hondachihite umulongele chila munhu kuwa weye ni lumbu jangu.’ ”

14 Maabaho Abimeleki kambweleza Sala kwa Bulahimu, iviya kamwing'ha ng'hondolo na ng'ombe na watumwa wa chilume na watumwa wa chike. 15 Maabaho Abimeleki kamulongela Bulahimu, “Lola isi ino yose yangu, kala hohose houlonda.” 16 Maabaho Abimeleki kamulongela Sala, “Nomwing'ha lumbu jako vihande magana longo va hela, kuwalagusa wose weli hamwe na weye kuwa kunoga haulongozi wa Mulungu. Chila munhu yavimanye kuwa kwabule wihi.”

17 Maabaho Bulahimu kampula Mulungu, na Mulungu kawahonya Abimeleki na muke wake na watumwa wake wa chike, ivo weleka wana. 18 Mana Mndewa Mulungu kawatenda wanhu wa kaye ya Abimeleki sekeweleke wana, kwa ichimu cha Sala muke wa Bulahimu.