1 Siku dimwe Dina yoyelekigwe na Yakobo na Leya, kahita kuwalaula wanaake wa isi iyo. 2 Shekemu mwana wa Hamoli Muhivi yoyakalile mkulu wa isi iyo, viyamuwene Dina kamwamha na kagona nayo kwa shuluti na kumtenda yawone chinyala. 3 Mbali Shekemu kanogelwa ng'hani na Dina mwana wa Yakobo, ivo kandusa kumbembeleza. 4 Ivo Shekemu kamulongela Hamoli tati yake, “Uning'he mndele ino yawe muke wangu.”

5 Yakobo kahulika kuwa Dina mwanage katendigwa yambule mwiko na Shekemu, Mbali kwaviya wanage wakala wodima wanyama, kanyamala mbaka wanage viwabwelile. 6 Hamoli tati yake Shekemu kahita kwa Yakobo muladi yadahe kulonga nayo. 7 Ivo wanage Yakobo wabwela kulawa kudima wanyama wawo, viwahulike ivo wawona usungu na wehilwa ng'hani kwa yoyatendile Shekemu, kwaviya kawaliga wanhu wa Isilaili kwa kumbandama kwa shuluti mwana wa Yakobo, kwaviya mbuli iyo mwiko. 8 Hamoli kalonga, “Mwanangu Shekemu kanogelwa ng'hani na mndele wenu, ivo nolamba mumuleke yamsole. 9 Leka chiisole, mweye mwizawasola wanetu na cheye chizawasola wanenu. 10 Maabaho mwizakala hano hana isi yetu hamwe na cheye, mwizakala hohose homulonda na mwizakuwa na ulegeho wa kugula na kuchuluza vinhu na kupata hanhu.”

11 Maabaho Shekemu kamulongela tati yake Dina na iwalumbu zake, “Nolamba munitende nitogoligwe haulongozi wenu na niye nizawagoleleni chomulonda. 12 Munilongele yombe jojose da zengele na chitumetume, hata yahawa ng'hulu vilihi, niye nizalava muladi nimsole yawe muke wangu.”

13 Wanage Yakobo wamwidika kwa kumvwizila Shekemu na tati yake Hamoli, kwaviya Shekemu kamtenda lumbu jawo Dina yambule mwiko. 14 Walonga, “Haidahika bule lumbu jetu kusoligwa na munhu hengizigwe ulungwana, kutenda ivo ni chinyala kumwetu. 15 Chodaha kwiitogolela kwa chinhu chimwe muhala mwizakuwa fana cheye kwa kumwingiza ulungwana chila mulume mmwenu. 16 Baho niivo vondamusole wandele zetu na cheye kusola wandele zenu. Chizakala hamwe na kuwa wanhu wamwe. 17 Mbali one hachiitogolela fana bumbila na kwingizigwa ulungwana, ivo chizamsola mndele wetu na kuhita.”

18 Hamoli na Shekemu mwanage wanogelwa kwa icho chilongigwe, 19 imbwanga hakalame hata chidogo kufikiza chochilongigwe, kwaviya viyanogiligwe ng'hani na mndele wa Yakobo. Shekemu niiyo yoyahishimike kufosa wanhu wose ukaye kwa tati yake.

20 Hamoli na Shekemu mwanage wahita kuna ulwivi lwa dibululu hanhu ha mting'hano kulonga na wanhu wa dibululu, 21 “Wanhu wano mambwiya, waleke wakale muna iisi na kugula na kuchuluza vinhu. Isi yofaya kukala cheye na wawo. Wawo wasole wandele wetu na cheye chiwasole wandele wawo. 22 Mbali wanhu wano wahatogola kukala na cheye na kuwa wanhu wamwe, kwa chilagano chino cha kumwingiza ulungwana chila mulume vichili, fana viya wawo viwengizigwe ulungwana. 23 Vino hamuwona bule wanyama wawo na vinhu vawo vose vizakuwa vinhu vetu? Lelo chiitogolele nawo muladi wadahe kukala hamwe na cheye.” 24 Walume wose wa dibululu wowaiting'hane hana ulwivi lwa dibululu ijo waitogolela na Hamoli na Shekemu imwanage. Maabaho walume wose wengizigwa ulungwana.

25 Siku yeketatu wengizigwe ulungwana wang'hali wana masungu ng'hani, wana waidi wa Yakobo, niiyo Simeoni na Lawi lumbu zake Dina wasola ngugulila zawo wadihitila dibululu ijo kwa kusinhukiza na kuwakoma walume wose. 26 Iviya wawakoma kwa ngugulila Hamoli na Shekemu imwanage. Maabaho wamsola Dina kulawa muna ikaye ya Shekemu na wahita nayo. 27 Viufosile ukomaji uwo, wana wamwenga wa Yakobo wengila muna dibululu na kusola vinhu kwaviya lumbu jawo katendigwa yambule mwiko shuluti. 28 Wasola ng'hondolo na ng'ombe na vihongwe na chila chinhu muna dibululu na muna imigunda. 29 Wawagwila wana wawo wose na wanaake wawo wose, na wasola utajili na chila chinhu muna zikaye zawo.

30 Maabaho Yakobo kawalongela Simeoni na Lawi, “Mweye munigalila magayo kwa kunitenda nihiligwe na wanhu wa isi ino ya Wakanaani na Wapelizi. Niye nabule wanhu wengi, na one wahaiduganya hamwe, wezaninanga niye hamwe na ndugu zangu.”

31 Simeoni na Lawi wedika, “Vino vinoga lumbu jetu kusang'haniligwa fana viya malaya?”