1 Yakobo kagendelela kukala muna iisi ya Kanaani hanhu hoyakalile tati yake fana mgeni. 2 Zino ni mbuli za ugima wa Yakobo. Yosefu viyakalile mbwanga wa miyaka longo na saba, kakala kodima ng'hondolo na luti hamwe na ndugu zake wana wa Biliha na Zilipa, wake wa tati yake. Yosefu kamulongela tati yake mbuli zihile za ndugu zake.

3 Isilaili kamulonda ng'hani Yosefu kufosa wanage wose, kwaviya kamweleka lusita lwa ulala wake. Ivo kamtendela Yosefu ng'hanzu ya chiiyeka yoihambigwe goya. 4 Baho ndugu zake viwawonile kuwa tati yawo kamnogela Yosefu kufosa wawo, wamwihila na hawalongile nayo vinogile bule.

5 Chilo chimwe Yosefu kalota nzozi, na viyawasimulile ndugu zake, wawo waiyoha kumwihila ng'hani. 6 Yosefu kawalongela, “Tegelezeni nzozi yonilotile. 7 Nilota kuwa cheye chikala kumgunda chofunga mikinza, na kwa kusinhusa kinza jangu dinuka zugaga! Mikinza yenu iiduganya kudizunguluka na kwiidulikila kinza jangu.”

8 Ndugu zake wamuuza, “Vino weye kochilongela kwiza chitawala?” Hebu kwizakuwa na ukulu kumwetu? Ivo waiyoha kugendelela kumwihila kwa ichimu cha nzozi na mbuli zake.

9 Maabaho Yosefu kalota nzozi imwenga na kawalongela ndugu zake, “Nilota nzozi imwenga, niwona zuwa na mwezi na nhondo longo na imwe zinitumbalila mavindi.”

10 Mbali viyawalongele tati yake na ndugu zake, tati yake kambwakila kulonga, “Vino nzozi yaki iyo yuulotile? Vino izatendeza mami yako na ndugu zako na niye chikutumbalile mavindi mpaka chidalise hasi kwa hishima haulongozi wako?” 11 Ndugu zake wamuwonela migongo, mbali tati yake kagendelela kuigesa mbuli iyo.

12 Siku dimwe ndugu zake Yosefu wahita kudima mifugo ya tati yawo uko Shekemu. 13 Isilaili kamulongela Yosefu, “Nolonda weye uhite uko Shekemu kowadimila mifugo ndugu zako.”

Yosefu kamwidika, “Ona nitogola.”

14 Tati yake kamulongela, “Hita ukawalole ndugu zako na mifugo one wawo wagima na maabaho ubwele unilongele.” Ivo tati yake kamtuma kulawa muna zanda da Hebuloni.

Yosefu kafika Shekemu. 15 Munhu imwe kamuwona kowegela muichuwala na kamuuza, “Kozahila choni?”

16 Yosefu kamwidika, “Nozahila ndugu zangu wowodima mifugo yawo. Kodaha kunilongela haja haweli?”

17 Munhu ija kamwidika, “Wasegela wamala. Kwaviya niwahulika wolonga wohita Dosani.” Ivo Yosefu kawasondelela ndugu zake na kawafika uko Dosani.

18 Viwamuwone kwa kutali, na yang'hali kuwafikilila, wailungila kumkoma. 19 Wailongela, “Lola ija nyamiloto kokwiza. 20 Leka chimkome na chimwase muna disima dimwe. Na chizalonga kadigwa na ng'onyo kali da muna imbago. Maabaho chilole kuwa izo zinzozi zake zizakuwaze.”

21 Mbali Lubeni viyahulike mbuli izo, kamkombola Yosefu kulawa kumwawo, kwa kulonga, “Sekechimkome.” 22 Lubeni kawalongela, “Sekemwitile damu, mbali mwaseni muna disima dino hano haichuwala, mbali sekemumulumize.” Kalonga ivo muladi yamkombole Yosefu muna yamakono yawo, maabaho yambweleze kwa tati yake. 23 Yosefu viyafikile kwa ndugu zake, wamvula ng'hanzu yake ya chiiyeka yoiyawale. 24 Maabaho wamsola na kumwasa muna disima dilibule mazi.

25 Viwakalile woja wawona bumbila da Waishumaili wokwiza kulawa Gileadi kuhita Misili. Ngamiya wawo wakala wapapile vilungo na ubani na mavumba. 26 Yuda kawalongela ndugu zake, “Chizapata choni chihamkoma ndugu yetu, na kufisa ukomaji wake? 27 Chimgule kwa Waishumaili, mbali sekechimulumize kwaviya yeye ni ndugu yetu na iviya ni damu imwe na cheye.” Ndugu zake waitogolela, 28 Wagula vinhu Wamidiani viwafikile hanhu baho, ndugu zake wamulava Yosefu muna disima na wamchuuza kwa Waishumaili kwa vihande malongo maidi va hela, na Waishumaeli wamsola Yosefu mbaka Misili.

29 Lubeni viyabwelile kuna disima dilibule mazi, hamwone Yosefu bule, Lubeni kadega walo jake kwa usungu. 30 Hamala baho Lubeni kawabwelela ndugu zake na kalonga, “Mbwanga kahabule hano! Choni chondanitende?”

31 Hamala baho wachinja mwana luti na wachofeka ng'hanzu ya Yosefu muna idamu. 32 Waisola ing'hanzu mbaka kwa tati yawo na walonga, “Chiiitola ino, lola vino ino niiyo ng'hanzu ya mwanago?”

33 Yakobo kaimanya ing'hanzu kalonga, “Iyo yake! Mng'onyo wa kumbago kamgwila na kamuja. Yosefu kanyomholigwa vihande vihande!” 34 Baho Yakobo kayadega yamawalo yake kwa usungu, kaiyawaza mawalo ya maguniya muna ichigudi. Kamulilila mwanage kwa siku nyingi. 35 Wanage wa chilume na wachike wamwizila wadahe kumuliza, mbali Yakobo kalema kulizwa kwa kulonga, “Nilekeni nizagendelela kulila kwa chimu cha mwanangu, mbaka vondanihite kuzimu kuyeli.” Niivo tati yake viyagendelele kumulilila Yosefu.

36 Chipindi icho uko Misili Wamidiani wamgula Yosefu kwa Potifa imwe wa walangulizi wa mfalume yoyakalile mkulu wa chibumbila cha ukalizi.