13
Wapelembaji
(Kumbukumbu 1:19-33)
1 Mndewa Mulungu kamulongela Musa, 2 “Tuma wanhu muladi wahite wakaipelembe isi ya Kanaani, yoniweng'ha Waisilaili. Kwizamtuma munhu imwe kulawa chila kabila da tati zawo yawe mulangulizi hagati yawo.” 3 Ivo Musa kawatuma kulawa kuna ichuwala cha Palani fana viyalagilizigwe na Mndewa Mulungu. Wose wakala walangulizi wa Waisilaili. 4 Yano ni mazina ya wanhu wawo.
Kulawa kabila da Lubeni, kakala Shamua mwana wa Zakuli.
5 Kulawa kabila da Simeoni, kakala Shafati mwana wa Holi.
6 Kulawa kabila da Yuda, kakala Kalebu mwana wa Yefune.
7 Kulawa kabila da Isakali, kakala Igali mwana wa Yosefu.
8 Kulawa kabila da Efulaimu, kakala Hoshea mwana wa Nuni.
9 Kulawa kabila da Benjamini, kakala Paliti mwana wa Lafu.
10 Kulawa kabila da Zabuloni, kakala Gadieli mwana wa Sodi.
11 Kulawa kabila da Manase dilawile kuna dikabila da Yosefu, kakala Gadi mwana wa Susi.
12 Kulawa kabila da Dani, kakala Amieli mwana wa Gemali.
13 Kulawa kabila da Asheli, kakala Sesuli mwana wa Mikaeli.
14 Kulawa kabila da Nafutali, kakala Nabi mwana wa Wofisi,
15 Kulawa kabila da Gadi, kakala Geueli mwana wa Maki.
16 Yayo ni mazina ya wanhu waja Musa woyawatumile wahite kuipelemba isi ya Kanaani. Iyo Hoshea mwana wa Nuni, Musa kamtanga zina jake Yoshua.
17 Musa viyawatumile wawo kuipelemba isi ya Kanaani, kalonga, “Kweleni kufosela ubanzi wa kusi na mukwele kuna imilima ya isi, 18 mukailole isi viili. Iviya mupelembe kuwa wanhu wokala umo wana nguvu hebu wanyondenyonde, wadodo hebu wengi. 19 Muipelembe isi yowokala fana inoga hebu iha, na wanhu wokala muna yamabululu yeli na mhongono hebu wokala muna yamalago. 20 Isi yake yavilihi? Ina ulongo unogile hebu wihile? Ina mibiki hebu yabule? Tendeni vimudaha mukagale matunda ya isi.” Icho chikala chipindi cha zabibu kwandusa kwiva.
21 Ivo wanhu wahita na waipelemba isi kulawa chuwala cha Sini mbaka Lehobu, habehi na hanhu ha kwingilila Hamasi. 22 Wahita kufosela ubanzi wa kusi na wafika bululu da Hebuloni, uko wawafika Waahimani na Waasheshai na Watalimai, welesi wa Anaki. Bululu da Hebuloni dizengigwe miyaka saba ing'hali kuzengigwa bululu da Soani dili Misili. 23 Viwafikile kuna dikolongo da Eshikoli, wakanha tambi dili na chipambo chimwe cha zabibu. Wanhu waidi wadipapa kwa mbiki hagati ya waidi wawo, iviya wagala makomamanga na nhini. 24 Hanhu haja hatangigwa Kolongo da Eshikoli kwaviya Waisilaili wakanha chipambo chiya hanhu baho. 25 Vizimalile siku malongo mane, wabwela kulawa kuipelemba isi.
Wapelembaji wolonga mbuli zilawile uko
26 Wabwela kwa Musa na Haluni na Waisilaili wose wakalile Kadeshi muna ichuwala cha Palani, wawalongela wose mbuli ziwawonile uko na wawalagusa matunda ya isi. 27 Wamulongela Musa, “Chifika kuna iisi youchitumile, isi ina ulongo unogile ng'hani na yano ni matunda yake. 28 Mbali wanhu wokala muna iisi ija wana nguvu, mabululu yawo yanoga na makulu ng'hani na yana mhongono. Iviya uko chiwawona welesi wa Anaki weli watali ng'hani. 29 Waamaleki wokala isi ya ubanzi wa kusi, Wahiti na Wayebusi na Waamoli wokala kuna imilima, Wakanaani wokala habehi na bahali ya Meditelaniya na mwiingema ya Yoludani.”
30 Kalebu kawatenda wanhu wanyamale haulongozi wa Musa, kalonga, “Cholondeka chihite chikaisole isi, mana chodaha kuhuma.”
31 Mbali wanhu wahitile hamwe na Kalebu walonga, “Hachidaha kuitowa na wanhu wano, mana wana nguvu kufosa cheye.” 32 Ivo wawagalila Waisilaili mbuli zihile za isi ija yowaipelembe, walonga, “Wanhu wokala muna iisi ija wodanganika. Wanhu wose wochiwawonile umo ni watali ng'hani. 33 Uko chiwawona Wanefili*Wanefili ni wanhu watali ng'hani., welesi wa Anaki. Chiiwona wenyewo fana mbalangulu, nawo niivo vowachiwonile.”