1 Mang Pɔdhö ‑mɛ 'ö ga Atanna 'gü kö 'ö n ‑ya Yesu Klisi ‑bha bɔmɛ 'ka bha, ma ꞊në 'a 'sëëdhɛ ya‑ bɔ 'mɛ 'ö 'ka bɔ Yesu Klisi 'ka, 'ö 'ka ‑ya ‑sü 'ka Atanna ‑bha ‑ya 'gü Efɛzö ‑pö 'gü, 'ö 'kii 'go ka ‑wʋ ‑ta bha ka ‑dhɛ. 2 Kö kwa Dë Atanna waa‑ kwa Dëmɛ Yesu Klisi ‑wo zuë" 'waanu ‑sü waa‑ ‑gasitɛ kë ka ‑dhɛ bha 'aa ‑yö kë.

3 ‑Ka ‑kwa kwa Dëmɛ Yesu Klisi Dë Atanna bha‑ nuɛ" bho! ‑A ‑gɛn ‑mü ꞊dhɛ ꞊ya 'wɔn ‑së "pɛpɛ 'ö dhang‑ 'gü bha‑ ꞊gban 'do 'do kë kwa ‑dhɛ ‑a ‑bha 'Nii‑ "slʋ̈ʋ̈slʋ̈ bha‑ ‑kɔ 'ka Yesu Klisi 'saa‑ 'gü, "wɩ 'kwa‑ wo‑ ‑wɔn ‑bha bha‑ ‑wɔn 'gü. 4 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna ‑yö kwa ‑sü 'ö kwa ‑ya ö ‑bha ‑ya 'gü Klisi 'saa‑ 'gü "dhʋ̈ kö 'yii "kpʋngtaadhɛ ‑zian ‑da ꞊kö. Kë "dhʋ̈ kö 'kwa kë 'mɛ 'ö "slʋ̈ʋ̈slʋ̈, 'ö pö ‑tangga ‑zian 'yaa‑ ‑bha ‑a 'ka ö wëëdhö. 5 ‑Yö ‑ga Atanna do bha ꞊në‑ 'gü "dhiʋ̈ yi 'bha 'ka, kwa ‑dhɔ ‑bha ‑a kë ‑sü ‑wɔn 'gü, 'yö kwa ‑kë ö ‑bha 'në 'ka Yesu Klisi 'saa‑ 'gü. 6 Kë "dhʋ̈ kö ‑a ‑bha ‑gasitɛ ‑ziisü 'ö‑ ‑kë kwa ‑dhɛ ‑a Gbö dhɔɔbhaa ‑sü bha‑ 'saa‑ 'gü bha ‑a 'tɔ ‑yö bhɔ‑ ‑wɔn 'gü.

7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Klisi ꞊yɔɔn 'ö ꞊wɛnng‑ zë ‑dhɛ 'gü bha ꞊në kwa ‑gɔta dhɔ, 'yö Atanna ‑yö kwaa‑ 'wɔn yaa ‑nu ‑mawɔn to. ‑Yö ö ‑bha "klʋsëdhɛ ‑ziisü bha‑ ‑zɔn kwa ‑dhɛ ‑kɔ bha ꞊në‑ 'gü, 8 'wɔndɔdhe waa‑ ‑gleng 'gbɛ ꞊dede ꞊gban suu 'do 'do ‑nu kwa ‑dhɛ ‑sü 'ka. 9 'Wɔn 'ö gun ‑bin ‑sü 'ka Atanna zuë" "piʋ̈ yi 'bha 'ka, 'ö yöö do ꞊në gun ö ‑bha pë dɔ sië bha, ꞊yaa‑ ‑zɔn kwa ‑dhɛ dɔ 'kwa‑ wo ꞊dɛɛ ya‑ 'gü. 10 'Wɔn 'ö "dhʋ̈ bha yö ‑mü ꞊dhɛ ‑yö ‑gun Atanna "piʋ̈ ꞊dhɛ pë "pɛpɛ 'ö dhang‑ 'gü, "ɛɛn 'ö "kpʋng ꞊taa, 'ö‑ ꞊gban "pɛpɛ ꞊loo 'ko ‑ta kö ‑a "tʋ̈ng ꞊ya ꞊loo, kö‑ ‑gɔmɛ ‑yö kë doseng, kö ‑yö kë Klisi ꞊në‑ 'ka.

11 'Mɛ 'kwa 'dhang bho Klisi "dhiʋ̈ Zuifö ‑nu kpö 'gü bha kwa kwa ‑bha 'wɔn ‑së ‑nu 'ö Atanna ‑ya "plüün bho kwa ‑dhɛ bha‑ ‑slɔɔ kwa ‑bha 'dhang ‑bho ‑a "dhiʋ̈ ‑sü bha ꞊në 'saa‑ 'gü; ‑a ‑gɛn ‑mü ꞊dhɛ Atanna ‑yö kwa ‑ya bha‑ ‑wo ‑dɩ ‑ta "dhʋ̈ yi 'bha 'ka ꞊dhɛ ‑kɔ 'ö gun‑ 'ka‑ zuë" "piʋ̈ ꞊në‑ 'dhö, "kɛɛ 'sa 'wɔn "ʋʋ 'wɔn 'ö‑ ‑ya ö ‑zʋ "piʋ̈, ‑ya ‑kë 'pö yö ꞊në‑ ‑kɔ ‑bha. 12 Kë "dhʋ̈ kö 'mɛ 'kwa ‑kë mɛ ‑blɛɛsü 'wo 'dhang bho Klisi ‑wɔn "dhiʋ̈ ‑a ‑nu 'ka bha 'kwa kë‑ 'tɔ ‑bhɔbhamɛ 'ka.

13 ‑Kɔ do bha‑ 'gü, 'mɛ 'ö 'kaa Zuifö 'ka kaa ‑dɩ 'pö, ꞊dhɛ 'ö 'ka bo tɛanwɔn 'ö ‑gban Atanna ‑bha, 'ö ‑kë 'wɔn ‑taɔng ‑së 'ö ‑gban Klisi ‑wɔn ‑bha, 'ö dhasü nu ka ‑dhɛ bha‑ bha‑ ma ‑sü 'ka, 'yö 'ka 'dhang bho Yesu bha‑ "dhiʋ̈, 'yö Atanna ‑yö ö ‑bha 'Nii‑ "slʋ̈ʋ̈slʋ̈ 'ö‑ "plüün bho mɛ "bhɩɩ‑ ‑nu ‑dhɛ, 'ö ꞊dhɛ‑ ‑kɔ "gblʋʋ 'dhö bha‑ ‑ya ka 'gü. 14 'Nii‑ 'ö "dhʋ̈ bha ꞊në ꞊dhɛ 'wɔn ‑së ‑nu 'ö Atanna ‑ya "plüün bho kwa ‑dhɛ bha‑ taɔng 'dhö, 'yö 'dhang bho ‑sü 'ö‑ "dhiʋ̈ ꞊dhɛ ‑yö ‑dho 'wɔn ‑së ‑nu bha‑ kë mɛ "pɛpɛ 'ö kwa ‑ya ö 'tɔbhɔbhamɛ 'ka bha kwa ‑dhɛ dhasü bha‑ ‑gɔ ‑da 'plöö ‑yi 'ka bha‑ nu kwa ‑dhɛ.

15 'Wɔn 'ö‑ ‑wɔn 'gü 'yö ꞊dhɛ 'ö mang ‑dɩ 'pö 'ma ka 'dhang ‑bho kwa Dëmɛ Yesu "dhiʋ̈ ‑kɔ bha‑ ma, 'ö 'ma‑ ma 'zü ꞊dhɛ mɛ "pɛpɛ 'wo bɔ Atanna 'ka ‑a ‑nu ‑dhɔ ‑yö ka ‑kë ꞊dedewo, 16 'yö n 'gü 'yaa ga Atanna nuɛ" bho ‑sü 'ka ka ‑wɔn 'gü, 'yö 'a bhɛa" sië‑ ‑dhɛ ‑kɔ "ʋʋ ‑kɔ 'ö‑ 'gü 'yö 'a ka ‑bha ‑da 'gü bha 'yö bha. 17 Kë "dhʋ̈ kö kwa Dëmɛ Yesu Klisi ‑bha Atanna 'ö kwa Dë 'ka 'ö‑ ‑bha 'tɔbhɔdhe 'dhö ‑ziisü bha ‑yö ka gba 'wɔndɔdhe 'ka, kö ‑yö ö dɔ ‑sü bha‑ ‑bhɔdhɛ bhɔ ka ‑dhɛ, 18 kö ‑yö ka zuë" "dhiʋ̈ "pʋ, kö 'wɔn 'ö ‑zʋgɔndhɛwɔn 'ka ‑a ‑bha kwa ‑dhɛ 'ö‑ wo bha‑ 'gü bha, 'ka‑ yö kö 'ka‑ ꞊bhlëë dɔ, kö 'tɔbhɔdhe 'ö 'wɔn ‑së ‑nu 'ö‑ ‑ya mɛ "pɛpɛ 'wo bɔ Yesu Klisi 'ka ‑a ‑nu ‑gɔ bha‑ ‑kë ‑ziisü ‑kɔ bha 'ka‑ dɔ 'pö 19 kö 'ka‑ 'wɔn dɔ 'pö 'kpakpadhö ꞊dhɛ ‑a ‑bha 'gügbɩɩdhɛ bha ‑yö ‑ziisü, ‑a "dhiʋ̈todhɛ 'yaa 'dhö 'mɛ 'kwa bɔ‑ 'ka bha kwa ‑dhɛ, "kɛɛ ‑yö ‑kë "dhʋ̈ faan 'ö‑ 'gü bha ꞊në‑ ‑wɔn 'gü. 20 "Kɛɛ 'sa 'gügbɩɩdhɛ 'ö "dhʋ̈ bha ‑ya ‑zɔn kwa ‑dhɛ Klisi ꞊në‑ 'saa‑ 'gü, ‑a ‑bho ga 'gü ‑sü kö ‑ya ‑bö, kö ‑ya 'sü ‑ya ‑ya ‑yɛa ‑së 'ö‑ "piʋ̈ dhang‑ 'gü bha‑ 'gü, 21 ‑ziömɛgɔpë ‑nu oo, 'gügbɩɩdhɛ ‑pë ‑nu waa‑ faanpë ‑nu oo, ꞊bhlëë ‑pë ‑nu waa‑ 'tɔ suu "pɛpɛ 'wo ꞊mɔɔ‑ ‑bha 'wo‑ kpɔ "tʋ̈ng 'kwa dɔ‑ 'ka ya‑ 'gü, "ɛɛn ‑dhɛ 'bha ꞊kpaɔ ‑yi ‑zian ‑bha bha‑ ‑nu ‑gɔ "dhiʋ̈ ‑sü ꞊në‑ 'ka. 22 Klisi bha ꞊në Atanna 'dhö pë ꞊gban "pɛpɛ suu ‑da ‑sü 'ka‑ ‑gɛn ꞊wlöö, 'yö‑ 'sü ‑sü 'ka 'yö‑ ‑ya mɛ "pɛpɛ 'wo bɔ‑ 'ka ‑a ‑nu ‑gɔmɛ 'kpii‑ ‑sü 'ka. 23 "Kɛɛ 'sa Atanna ‑bha mɛ "pɛpɛ ꞊gban ‑loo 'ko ‑ta ‑sü 'ö "dhʋ̈ bha ꞊në ꞊dhɛ yöö Klisi ‑mɛ 'ö "kpʋngtaadhɛ ‑todhʋ̈sü pa ‑sü 'ka bha‑ ‑dhü 'ö ‑tosɛa ‑kë 'gü waa‑ ö ‑bha 'gügbɩɩdhɛ ꞊gban 'dhö ‑a 'ka.