1 Yi do 'ka 'yö Fadhiziɛn ‑nu ‑gɔmɛ do 'bha ‑yö Yesu ‑dhɛ ö ‑gɔ 'kɔɔdhö kö 'wo pë ‑bhö. ‑Yö ‑kë "dhʋ̈ Zuifö ‑nu ‑bha ꞊glooyi do 'ka. 'Yö dho 'yö ‑da 'kɔɔdhö. Yaa" kë 'wo wo sië bha Fadhiziɛn ‑nu ‑kpɛa 'wo to ‑wo Yesu 'suan‑ ꞊në‑ bho sië. 2 'Wo dho ‑dhɛ ‑ga kö mɛ do 'bha 'ö ‑bhla ‑yua 'dhö‑ 'gü ‑yö dɔ sië‑ wëëdhö. 3 'Yö 'tɔnggɔmɛ ‑nu waa‑ Fadhiziɛn ‑nu 'wo gun mü bha‑ ‑nu dhɛɛ" kpɔ 'ö‑ pö: «'Wɔn 'ö ‑gban "yuëdhi ‑nu dha ‑sü ‑bha ꞊glooyi 'ka bha kwa ‑bha 'tɔng‑ ‑ya ‑pö ꞊dhɛ ‑a ‑wɔn 'gü? 'Kwa‑ kë ‑ee "ɛɛn 'kwa 'dho‑ ‑kë ‑ee?»

4 'Yö ‑dhɛa ‑yö ga‑ ‑nu ‑ta, 'yö 'wo dɔ dingdhö. ‑Yö ‑to 'gü 'yö Yesu ‑yö ö ‑kɔ pa "yuëdhi bha‑ 'ka 'yö‑ dha, 'yö‑ pö‑ ‑dhɛ ‑yö 'dho. 5 ꞊Dhɛ 'ö ꞊ya bo ‑wʋ ‑kpɔ 'mɛ 'ö‑ ‑kë "klʋ̈ʋ̈klʋ̈ bha‑ ‑bha ‑sü 'ka, 'yö‑ pö 'mɛ 'wo to‑ ‑nu ‑dhɛ 'ö‑ pö: «'Mɛ 'ka bha de ‑mü 'ka ka kpö 'gü 'yö‑ ‑bha 'në "ɛɛn ‑a ‑bha ‑du ꞊ya ‑da ‑klɔng 'gü ꞊glooyi 'ka, 'yö 'yii 'dho 'to 'ö‑ bho mü?

6 ‑An dhɛɛ" 'ö‑ kpɔ "dhʋ̈ bha, ‑a ‑yɔ 'yii ꞊slɔɔ‑ ‑nu ‑gɔ kö ‑wa bɔ.

7 ꞊Dhɛ 'ö ꞊ya kë "dhʋ̈, 'yö "gwënng do ‑da 'mɛ 'wo‑ ‑nu ‑dhɛ ‑dhɔkëdhe ‑ta 'wo gun ‑yɛa ‑blɛɛsü kɔɔ‑ sië bha‑ ‑nu ‑dhɛ 'ö‑ pö: 8 «꞊Wa 'mɛ i ‑dhɛ ‑dhɔkëdhe ‑ta, ꞊dhɛ dhe dɔ ‑dhɛ ‑nu 'dhö, 'bha 'dho ‑yɛa ‑blɛɛsü mɔɔ‑, ‑a ‑gɛn ‑mü ꞊dhɛ 'kö 'mɛ 'wo ka ‑dhɛ bha‑ mɛ 'bha‑ mü 'ö‑ ꞊bhlëë 'dhö 'kpii‑ 'ö ‑ziö i ‑bha ‑ta 'bhaa‑ dɔ. 9 Kë "dhʋ̈ kö 'mɛ 'ö ka ‑dhɛ bha 'ya 'dho nu 'ö‑ pö i ‑dhɛ: ‹‑Bhö 'go ‑yɛa 'dhɛ bha‑ 'gü kö 'mɛ 'ö ya ‑yö ‑ya mü›. ꞊Ya kë "dhʋ̈ kö ꞊ya kë kpaɔ 'ka ꞊ya "pɛ i ‑bha. Kö i ‑bha ‑go ‑yɛa 'dhɛ bha‑ 'gü ‑sü kö 'i 'dho ‑ya ꞊taama bha‑ 'yiʋ̈‑ yöö i kë. 10 "Kɛɛ 'mɛ 'ö ꞊wa i ‑dhɛ ‑dhɔkëdhe ‑ta, ‑bhö 'dho kö 'i ‑ya ‑yɛa ‑totaamasü ꞊në‑ 'gü, kë "dhʋ̈ kö 'mɛ 'ö ka ‑dhɛ bha ꞊ya nu kö ‑ya pö i ‑dhɛ: «N "taɔngdë, ‑bhö bɔ "dhiʋ̈!» ꞊Ya kë "dhʋ̈, i ‑gɛngbɔ ‑dho kë "gblʋ̈gblʋ̈ mɛ "pɛpɛ 'wo ‑dhɔkëdhe ‑ta mü bha‑ ‑nu ꞊gban 'gü.» 11 'Yö‑ pö: «‑A pö 'a‑ wo ka ‑dhɛ "dhʋ̈ bha‑ ‑gɛn ‑mü ꞊dhɛ 'mɛ 'i dho i ‑dɩ 'sü ‑kiandhö i "tɛabɔ ‑nu ‑bha, Atanna ‑dho i ‑da ‑a ‑nu ꞊wlöö, "kɛɛ 'mɛ 'i dho i ‑dɩ ‑da i "tɛabɔ ‑nu ꞊wlöö, ‑yö ‑dho i gba ‑duɛ 'kpii‑ 'ka.»

12 ꞊Dhɛ 'ö ö bo‑ ‑pö "dhʋ̈ ‑sü 'ka, 'yö‑ pö 'mɛ 'ö‑ ‑dhɛ 'ö wɛng‑ ‑nu 'wo gun‑ ‑gɔ 'kɔɔdhö bha‑ ‑dhɛ 'ö‑ pö: «N "taɔngdë, ꞊ya kë ꞊dhɛ 'bha‑ pö 'i mɛ ‑nu ‑dhɔkë, "ɛɛn 'bha‑ pö 'i ‑dhɔkëdhe kë, 'bha 'dho i "taɔngdë ‑nu oo, i dheebhang ‑nu oo, i 'kɛ‑ ‑nu "ɛɛn i ‑yayɔɔ ‑nu 'wo ꞊naɔmɛ 'ka ‑a ‑nu ‑dhɛ ‑dhɔkëdhe ‑ta, kë "dhʋ̈ kö 'wa 'dho i ‑dhɛ 'pö 'ö 'wo 'wɔn 'i‑ ‑kë bha‑ ‑gɔyɔɔ dɔ i ‑gɔ. 13 "Kɛɛ 'bha‑ pö bhii ‑dhɔkëdhe kë, ‑bhö ‑wëëmɛ ‑nu waa‑ ꞊niɔɔmɛ ‑nu, "ta ‑sü 'bebedhö ‑mɛ ‑nu waa‑ "yanwlümɛ ‑nu ꞊në‑ ‑nu ‑dhɛ. 14 'Bha‑ kë "dhʋ̈, i zuë" ꞊nii ‑dho ‑da, ‑a ‑gɛn ‑mü ꞊dhɛ 'mɛ 'wo bha 'waa ꞊mɔɔ‑ ‑bha kö ‑wa ‑gɔyɔɔ dɔ i ‑dhɛ, ꞊ya 'go mü 'zü, Atanna ‑dho ‑a ‑gɔyɔɔ dɔ i ‑dhɛ, 'mɛ 'wo 'dhang bho‑ "dhiʋ̈ ‑a ‑nu ‑bö ‑yi 'ka.

15 ꞊Dhɛ 'ö 'mɛ 'ö wɛng‑ ‑nu ‑a ‑nu ‑kɔ ‑yö gun 'tɛa‑ do 'gü bha 'wo 'wɔn bha‑ ma, 'yö‑ mɛ do ‑ya pö Yesu ‑dhɛ: «꞊Ya kë "dhʋ̈ yö ‑zë 'gü 'sa kö 'mɛ 'ö dho pë ‑bhö Atanna ‑bha ‑gblüdëdhɛkëdhɛ 'gü kö‑ ‑mɛ ‑bha ‑së "dhɛ!»

16 'Yö‑ ‑yɔ bɔ‑ ‑gɔ 'ö‑ pö: «‑Bhö ‑dhɛ ‑ga zɔɔ, yi do 'ka 'yö mɛ do 'bha ‑yö ‑dhɔkëdhe 'kpii‑ do ‑kë, 'yö mɛ 'gbɛ ‑dhɛ. 17 ꞊Dhɛ 'ö pë ‑bhö "tʋ̈ng ꞊ya ꞊loo, 'yö ö ‑bha gwëëmi do bɔ 'mɛ 'ö‑ ‑nu ‑dhɛ bha‑ ‑nu ‑dhɛ ‑dhɛ 'gü 'yö‑ pö ‑wo nu, ‑bhöpë ꞊ya ma. 18 "Kɛɛ 'yö 'mɛ 'wo bha‑ ‑nu ꞊gban "pɛpɛ 'wo ‑kɔ 'dho ‑sü ‑bha. 'Yö mɛ ‑blɛɛsü ‑ya pö: «N ‑kpladhɛ ‑yö n ‑bha, 'bhlaadhɛ do 'bha 'a‑ dhɔ ya, ‑a ‑dhɛa ‑bha ꞊dhɛ 'a 'dho kö 'a ‑wo mü, ꞊dhɛ 'ö "dhʋ̈ ‑yö n ‑mawɔn 'to.» 19 'Yö‑ mɛ do 'bha ‑ya pö: «Mang ‑dɩ 'pö, ‑du ‑kaɔng do 'a‑ dhɔ ya, ‑yö n "piʋ̈ ꞊dhɛ 'a dho kö 'a‑ ‑nu draan‑ yë kë ‑sü ‑bha. 'Bha 'dho ‑bhö ‑a pö i dëmɛ ‑dhɛ 'mii 'dho nu.» 20 'Yö‑ mɛ ‑yaaga ‑naa ‑ya pö: «A ‑go dhe 'sü ‑dhɛ 'gü ‑dee 'gü, 'wɔn 'ö‑ ‑wɔn 'gü 'mii 'dho nu 'pö 'yö bha.» 21 'Yö‑ ‑bha gwëëmi bha 'ö ö yee kë 'ö nu 'ö ‑ziö 'wɔn bha‑ ꞊gban ‑gɛn 'gü "pɛɛpɛdhö ö dëmɛ ‑dhɛ, 'yö 'wɔn bha 'ö ‑siö 'mɛ 'ö ꞊dhiɔ kë bha‑ ‑dhɛ. 'Yö ‑wʋ ‑dee 'bha kpɔ gwëëmi bha‑ ‑bha 'ö‑ pö: «‑Bhö 'dho ‑bɛang 'ka "dhɛɛdhɛ waa‑ zian ‑gbeng ‑ta ‑dhɛ ‑nu 'gü kö 'i ‑wëëmɛ ‑nu, ꞊niɔɔmɛ ‑nu, "yanwlümɛ ‑nu waa‑ "ta ‑sü 'bebedhö ‑mɛ ‑nu ‑dhɛ kö 'ka nu.» 'Yö 'mɛ bha 'ö dho 'yö nu, 22 'yö‑ pö ö ‑gɔmɛ ‑dhɛ: «N dëmɛ, ‑kɔ 'i‑ pö 'a‑ kë‑ ‑bha bha 'ma‑ kë‑ ‑bha, "kɛɛ ‑yɛa 'bha ꞊ya 'to.» 23 'Yö‑ ‑gɔmɛ ‑ya pö‑ ‑dhɛ: «‑Bhö 'dho zian ‑gɔ ‑ta ‑dhɛ ‑nu waa‑ "yasa "piʋ̈ ‑dhɛ ‑nu 'gü kö 'i ꞊dhiɔ kë, mɛ "ʋʋ mɛ 'i dho ‑kpan ‑bha, ‑bhö ‑fɛɛ ‑ya ‑bha kö ‑yö nu kö ‑yö ‑da 'kɔɔdhö kö 'kɔ ‑yö pa; 24 ‑a ‑gɛn ‑mü ꞊dhɛ a‑ ‑pö ka ‑dhɛ ꞊dhɛ 'mɛ 'a‑ ‑nu ‑dhɛ ‑a ‑nu ꞊bhlëë ‑bha bha‑ mɛ do ‑zian 'yii dho 'pë 'wo‑ ‑kpa bha‑ din ‑zian ‑ga.»

25 Yi do 'ka kö mɛ ꞊ya ta Yesu ‑bha kö ‑wo 'dho sië zian ‑ta ‑yɛɛdhö, 'yö ꞊slëë ö 'gü 'yö‑ pö 'mɛ 'wo bha‑ ‑nu ‑dhɛ 'ö‑ pö: 26 «'Mɛ 'ka nu sië bha mɛ "ʋʋ mɛ 'ö‑ pö 'ö bɔ n 'ka, "kɛɛ 'ö‑ ‑mɛ ‑yö ö dë oo, ö dhe oo, ö ‑bha dhebhɔ oo, ö ‑bha 'në ‑nu oo, ö dheebhang gɔɔn‑ ‑nu "ɛɛn dhong ‑nu "ɛɛn ‑a ‑mɛ ‑dɩ ‑bha ‑tosɛa ꞊dede ‑zian fië bho n ‑bha, kö ma ꞊klangdhiʋ̈ 'yaa ‑mü. 27 "Ɛɛn 'zü 'mɛ 'yii "wɩ‑ ‑bha kö ‑yö saan" n ‑wɔn 'gü, kö 'yaa ꞊mɔɔ‑ ‑bha kö ‑yö kë ma ꞊klangdhiʋ̈ 'ka.» 28 'Yö‑ pö: «‑A pö 'a‑ wo ka ‑dhɛ "dhʋ̈ bha‑ ‑gɛn ‑mü ꞊dhɛ mɛ 'bha 'yaa 'dhö ka kpö 'gü bha kö ‑ya pö ꞊dhɛ yö ‑zë 'ya‑ pö 'ö 'kɔ dɔ, 'yaa 'yaanu kö ‑yö ö ‑zʋ 'gɔn 'pë 'ö dho ꞊mɔɔ 'kɔ bha‑ dɔ ‑sü ‑bha kö ‑yö bo‑ ‑wɔn ‑ta, 29 kë "dhʋ̈ kö 'ya 'dho ö bo 'kɔkpan ‑ya ‑sü 'ka 'ö 'wëë‑ ‑yö kɔn, 'ö ꞊fië‑ 'kɔ dɔ ‑sü ‑bha 'ö mɛ 'wo "yan ‑kpan bha kö ‑yö 'kɔ bha‑ dɔ sië bha 'wo ꞊wɛɛ dɔ ‑bha 'wo‑ pö: 30 «'Mɛ 'ö ya, ‑yö ‑gun 'kɔ dɔ sië "kɛɛ ꞊ya ꞊fië‑ ‑bha ‑wa! 31 "Ɛɛn 'zü ‑gblüdë ‑mɛɛ ‑mü, 'yö ꞊yaa‑ pö 'ö 'dho ‑gblü bha, "kɛɛ kö mɛ "gblü ‑kaɔng do ꞊në‑ ‑gɔ, 'yö 'yaa 'yaanu 'yaa ö ‑zʋ 'gɔn "ni 'ö‑ faan dho ꞊mɔɔ 'mɛ 'ö nu sië‑ ‑gɔ mɛ "gblü ‑kaɔng ꞊plɛ 'ka bha‑ ‑bha ‑sü ‑wɔn 'gü, 'yö 'yaa gun ‑na 'dho‑? 32 ‑A ‑mɛ ꞊yaa‑ yö ꞊në‑ kë "dhʋ̈, 'yö ꞊ya kë ꞊dhɛ 'yii 'dho ꞊mɔɔ‑ ‑bha, 'yö ‑gblüdë 'dhɛ bha‑ to ꞊gblɛɛn, 'yö mɛ bɔ‑ ‑dhɛ 'yö‑ pö: «‑Gblü 'yaa n "piʋ̈». 33 Yö ꞊në‑ ‑wɔn 'gü, 'yö 'a‑ pö ka ‑dhɛ ꞊dhɛ 'ö mɛ "ʋʋ mɛ 'ö‑ 'ka 'ö ka kpö 'gü 'ö 'yii ö kwaa‑ pë "pɛpɛ 'ö‑ ‑gɔ ‑a ꞊gban ‑zü, kö ‑yö ziö n ꞊keng‑, ‑a ‑mɛ 'yaa ꞊mɔɔ‑ ‑bha kö ‑yö kë ma ꞊klangdhiʋ̈ 'ka.»

34 'Yö‑ pö: «꞊Wee 'ö bha pë ‑së ‑mü, "ɛɛn 'yaa "dhʋ̈ ‑ee? "Kɛɛ ꞊ya kë ꞊dhɛ ꞊wee din ꞊ya 'go‑ ‑bha kö "slë "wɛɛ 'bha 'kö 'wo dho‑ kë ꞊taamasü 'gü kö‑ din ‑yö dhi 'yaa 'dhö 'zü. 35 Kö ꞊ya kë pë see‑ ‑sü ꞊në‑ 'ka bha, kö‑ ꞊trɔɔn 'yaa 'dhö 'zü "sɛ waa‑ "dung ‑zian 'bha ‑bha. Kö ꞊ya 'to ‑zuö "kpɛnng ‑pë ꞊në‑ 'ka.» 'Yö‑ pö: «'Ma‑ pö "dhʋ̈, 'wɔn ma ‑tʋ 'dhö 'mɛ 'ö‑ ‑gɔ ‑bha ‑ya 'gü ma!»