1 ꞊Ya 'go yö ‑zë 'gü, n dheebhang ‑nu, a‑ ‑pö ka ‑dhɛ ꞊dhɛ 'ka ka "dhia bho ka ‑bha ‑kë kwa Dëmɛ ‑bha zian ‑ta ‑sü ‑wɔn 'gü. 'Ma‑ ‑blɛɛsü pö ka ‑dhɛ 'sëëdhɛ ‑blɛɛsü 'a‑ bɔ ka ‑dhɛ bha‑ 'gü, "kɛɛ n 'gü 'yii 'dho ga ‑a ‑pö ka ‑dhɛ "dhʋ̈ ‑sü 'ka, ‑a ‑gɛn ‑mü ꞊dhɛ yö ꞊në ꞊ya kë "dhʋ̈, 'yö 'kii 'dho ‑da mɛpömɛ ‑nu ‑wʋ "piʋ̈, 'ö 'ka ‑pö. 2 Atanna ‑bha yëseemɛ ‑nu bha ‑ka ka ‑dɩ 'kun‑ ‑nu ‑gɔ ‑së, ‑ka ka ‑dɩ 'kun 'gbɛn‑ ‑nu bha‑ ‑nu ‑gɔ, ‑a ‑gɛn ‑mü ꞊dhɛ mɛpömɛ ‑nu ‑mü. ‑Yö ‑kë ‑nu 'gü ꞊dhɛ ‑go 'gbannë 'gü ‑sü ꞊në mɛ dha Atanna wëëdhö, "kɛɛ "yaaki 'ö 'yaa‑ ‑nu ‑bha bha 'yö ‑kë. 3 A‑ ‑pö ka ‑dhɛ ꞊dhɛ ‑go 'gbannë 'gü ‑mɛ ꞊dede 'ö Atanna ‑ya dɔ, yö ‑mü kwa ꞊në kwa 'ka, ‑a ‑gɛn ‑mü ꞊dhɛ kwa ‑zë kwa Atanna ‑dhɔkë ‑a ‑bha 'Nii‑ "slʋ̈ʋ̈slʋ̈ bha ꞊në‑ ‑kɔ 'ka, 'ö 'kwa kwa "dhia bho kwa ‑bha ‑kë Yesu Klisi ‑bha 'ka ‑wɔn ꞊në‑ 'gü, 'ö 'kwaa kwa ‑zʋ 'gɔn mɛ "bhɩɩ‑ ‑nu wɔ ‑kɔ ‑dhɛ. 'Mɛ 'kwa "dhʋ̈ bha ꞊në 'kwa ‑go 'gbannë 'gü ‑mɛ ꞊dede 'ka Atanna ‑zë 'gü. 4 Mang ‑dɩ 'pö a ‑mɔɔ ‑bha 'nu 'a n ‑zʋ yö mɛ "bhɩɩ‑ ‑nu wɔ ‑kɔ ‑dhɛ 'a n ‑dɩ sü‑ 'gü 'kpii‑. ‑A ‑gɛn ‑mü ꞊dhɛ ‑yö ‑kë mɛ 'bha ‑nu 'gü ꞊dhɛ Zuifö ‑nu kwa ‑bha Atanna ‑bha 'tɔng‑ ‑nu ‑ya ꞊bhlëë 'gü ‑sü bha ꞊në dho‑ ‑nu dha. "Kɛɛ 'sa ꞊ya 'to 'nu‑ 'dhɛ 'kö bha‑ ‑bha kö ma ‑zë n ‑bha "dhiʋ̈‑ ‑ziö ‑nu ꞊gban "pɛpɛ ‑bha ‑ta ꞊gblɛɛn. 5 ‑A ‑gɛn ‑mü ꞊dhɛ ma ‑zë a ‑to 'në "blë ‑dee 'ka 'a dho 'gbannë 'gü, 'ö "dhʋ̈ kö 'a bhɔ ‑a ‑dhɛkpaɔyi ꞊ya kë "saaga. 'Ö ‑ya mü 'zü 'a ‑kë Izraɛdhö mi ꞊dede 'ka, Bɛnngzamɛ suu 'gü. N 'kpɔmɛ ‑nu ꞊gban ‑wo Eblö ꞊në‑ 'ka, ꞊ya kë "dhʋ̈ kö Eblö mi tüütüü ꞊dede ‑mü n 'ka. ꞊Ya zun 'zü Atanna ‑bha 'tɔng‑ ‑nu 'ö Zuifö ‑nu 'wo‑ 'kun sië bha yö ‑zë ‑bha kö ꞊ya ‑loo, ‑a ‑gɛn ‑mü ꞊dhɛ ‑a ‑takɔɔmɛ ‑nu 'wo‑ ‑nu Fadhiziɛn ‑nu ‑kë bha‑ mɛ do ‑mü n 'ka. 6 ꞊Ya 'to 'zü 'wɔn ‑pɛng ‑dɔ wo ꞊gbin‑ ‑sü ‑bha, kö mɛ‑ ‑dho kë n "dhiʋ̈, "kɛɛ kö 'waa 'gbɛ, ‑a ‑gɛn ‑mü ꞊dhɛ ꞊gbaɔn 'a‑ wo Atanna ‑bha 'kɔdhigümɛ ‑nu ‑ta, ‑a "sinma 'yaa 'dhö. ꞊Ya 'to 'zü Atanna ‑bha 'tɔng‑ 'kun ‑sü ‑zë ‑bha, n ‑mɔɔ 'ka 'yaa 'dhö. 7 "Kɛɛ 'wɔn "pɛpɛ 'wo gun n 'gü ꞊bhlëësü ‑blɛɛsü "dhʋ̈ bha‑ ꞊gbaan kë n 'gü "wlaawɔn ꞊në‑ 'ka "tʋ̈ng ya‑ 'gü Klisi ‑wɔn 'gü. 8 ꞊Ya 'to ‑zian wo‑ 'dhɛ 'kö 'a‑ pö bha‑ ‑bha kö‑ fië‑ 'bha‑ ‑dhö, "kɛɛ 'wɔn "pɛpɛ ꞊gban ꞊në ꞊ya kë n 'gü ꞊taamasü ya‑ 'gü "wlaawɔn 'ka, n Dëmɛ Yesu dɔ ‑sü ‑bha ‑kë ‑së ‑kɔ yaa 'gü yaa bha‑ ‑wɔn 'gü. Yö ꞊në‑ ‑wɔn 'gü 'yö 'ma n ꞊taa zun 'wɔn ꞊gban "pɛpɛ suu ‑gɔ ꞊dɛɛ, 'yö 'a‑ ‑ga sië ꞊dhɛ gbo 'dhö, kë "dhʋ̈ kö 'a 'to ‑kplü ‑sü 'ka Klisi ‑wɔn ꞊në‑ ‑bha (‑a ‑gɛn ‑mü ꞊dhɛ ‑a 'dhɛ 'kö bha 'bha 'yaa mɛ dha). 9 Kë "dhʋ̈ 'zü kö 'a 'to‑ ꞊kwɛɛ‑. ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ 'maa n ‑zʋ 'gɔn ꞊taamasü ya‑ 'gü ꞊dhɛ Atanna ‑bha 'tɔng‑ 'kun ‑sü ꞊në n "sɛɛdhɛ ꞊gban bho n ‑bha ‑a wëëdhö, "kɛɛ 'dhang 'a‑ bho Klisi "dhiʋ̈ ꞊në n "sɛɛdhɛ ꞊gban bho n ‑bha, ‑a ‑gɛn ‑mü ꞊dhɛ mɛ "sɛɛdhɛ ‑bho mɛ ‑bha ‑kɔ 'dhɛ kö bha ‑yö ‑go Atanna ꞊në‑ 'gü, mɛ ‑dɩ faan 'yaa ‑mü, ‑ya ‑kë "dhʋ̈ 'mɛ 'ö 'dhang bho Klisi "dhiʋ̈ ꞊në‑ ‑dhɛ. 10 'Wɔn 'ö 'ma kë 'a n ‑zʋ gɔn‑ 'ka ‑yö doseng. Yö ‑mü ꞊dhɛ kö 'a Klisi dɔ, kë "dhʋ̈ kö 'gügbɩɩdhɛ 'ö Atanna ‑ya bho‑ 'ka ga 'gü bha ‑yö ‑da n 'gü, kö ‑wëëdhɛ 'ö‑ yö bha 'a n ‑bha yö 'pö, kö 'a n bo 'wɔn yaa kë ‑sü 'ka, (kö 'a kë‑ ‑gɔ ꞊dhɛ 'mɛ ꞊ya ga‑ 'dhö ꞊dhɛ ‑kɔ 'ö yöö ‑dɩ 'pö 'ö ga‑ 'ka bha‑ 'dhö). 11 Kë "dhʋ̈ kö ꞊ya kë ‑mɔɔ "kwëë ‑wɔn 'ka n ‑gɔ, kö 'a ‑bö 'pö (Yesu nu ‑yi 'ka).

12 ‑A pö 'a‑ wo "dhʋ̈ bha 'yii kë ꞊dhɛ ‑yɛa 'a‑ mɔɔ‑ sië bha 'ma‑ ꞊slɔɔ ꞊në‑ wo 'nu, "ɛɛn ꞊dhɛ 'ma Atanna dhɔɔbhaawɔn ꞊gban kë, ꞊dhɛ pö 'aa n ‑bha 'zü ‑a wëëdhö, ‑abin! "Kɛɛ ‑bɛang ꞊në 'a‑ 'sü sië, kë "dhʋ̈ kö 'a n 'gü dɔ "gbɩɩ‑ 'a ‑kpan ‑bha, ꞊dhɛ 'ö ‑kë ꞊dhɛ Yesu Klisi ꞊ya mang ‑dɩ 'pö n 'san n ‑kɔ ‑bha bha‑ ‑wɔn 'gü. 13 N dheebhang ‑nu, 'yii kë n 'gü ꞊dhɛ n ‑kɔ ꞊ya ꞊mɔɔ‑ ‑bha 'nu, "kɛɛ a‑ ‑dɔ ꞊dhɛ 'wɔn do 'bha ‑zë a‑ kë sië. 'Ö "dhʋ̈ bha kö a ‑dho n kwaa‑ 'dhɛ 'kö 'ma ziö‑ ‑ta 'nu bha‑ ‑zü, 'ö n ‑zʋ ‑zian ‑yö bhɔ yö ‑zë 'ka, kë "dhʋ̈ kö n "yaaki ‑yö 'to ‑a 'dhɛ 'ö n "dhiʋ̈ bha ꞊në‑ 'gü.

14 Yö ꞊në‑ ‑wɔn 'gü 'yö 'a ‑bɛang 'sü sië 'a dho n "dhiʋ̈ ꞊në‑ wo ‑kpɛawo, kë "dhʋ̈ kö 'a‑ ꞊la ꞊slɔɔ dhang‑ 'gü, kö Atanna 'dhö Yesu Klisi bɔ kwa ‑dhɛ ‑dhɛ 'gü ‑yɛa 'ö‑ ‑wɔn 'ka dhang‑ 'gü bha 'a‑ ꞊slɔɔ.

15 ꞊Dhɛ 'ö "dhʋ̈ ‑a ‑dhɛa ‑bha ꞊dhɛ mɛ "pɛpɛ 'dhɛ 'kö 'kwa ‑kian ‑a ‑bha zian ‑ta bha kwa ‑wʋ ‑yö kë‑ 'dhɛ 'kö bha‑ 'gü do. ꞊Ya kë 'zü ꞊dhɛ mɛ 'bha 'dhö ‑tun ka kpö 'gü 'ö ‑zʋtadhe suu bha 'yaa‑ ‑gɔ, Atanna ‑dho ‑a ‑ta "pʋ‑ ‑mɛ ‑dhɛ 'kpakpadhö. 16 "Kɛɛ kö 'zü 'ö ‑kë ‑kɔ "ʋʋ ‑kɔ 'ö‑ 'gü, ‑naa 'dhɛ 'kö 'kwa ‑wo ‑ta ya, kwa "ta ‑gɛn ‑yö kë do kö 'kwa 'dho‑ 'ka "dhiʋ̈.

17 N dheebhang ‑nu, ‑ka ka "ta ‑kɔ 'sü n ‑bha ‑bha. ‑Kaa 'suan‑ bho 'mɛ 'wo wo ‑bha "ta ‑kɔ sü yi ‑bha ‑bha 'wo ka kpö 'gü bha ꞊në‑ ‑nu ‑bha. 18 ‑A ‑gɛn ‑mü ꞊dhɛ mɛ 'gbɛ ‑wo ‑dhö 'ö‑ ‑nu "ta ‑kɔ 'yaa bhɔ Klisi ‑bha mɛ ‑nu ‑bha ‑bha, "kɛɛ ‑wo ‑kë ꞊dhɛ 'pë 'wo Klisi ‑bha ‑ga "dhü ‑bha ‑sü bha‑ 'yaɔ‑ ꞊në‑ 'ka ‑a 'dhö. 'Ma‑ pö ka ‑dhɛ "dhʋ̈ pinngdhö, yö ꞊në 'a ‑tun 'bha pö 'zü ka ‑dhɛ "gbʋ 'ka ꞊dɛɛ bha. 19 'Mɛ 'wo "dhʋ̈ bha‑ ‑nu "dhiʋ̈ ta ‑dhɛ ‑mü ‑dho pɛng 'gü ‑sü ꞊në‑ 'ka, ‑a ‑gɛn ‑mü ꞊dhɛ ‑a ‑nu ‑dɩ ‑dhidhɛwɔn ‑nu ꞊në 'wo‑ ‑dhɔkë (꞊dhɛ‑ ‑nu ‑bha ‑zlan 'dhö). 'Wɔn ‑nu 'ö ꞊waa‑ kë 'ö 'yiʋ̈‑ dho dɔ‑ ‑nu ‑bha bha ꞊në 'wo wo ‑dɩ 'tɔ bhɔ ‑zian mɔɔ‑ 'gü. 'Waa kë ‑a ‑nu ‑zʋ 'yaa ‑da pë "wɛwɛ 'bha ‑wɔn ‑ta kö 'yii kë "kpʋngtaapë ‑nu ‑wɔn 'ka. 20 "Kɛɛ kwa ‑zë kwa Dë ‑pö ꞊dede 'ö 'dhö, 'yö dhang‑ 'gü ‑dhɛ 'ka, kwa Dëmɛ Yesu Klisi 'ö kwa Dhamɛ 'ka 'ö 'kwa kwa "yan 'to sië‑ ‑gɔ bha ‑yö ‑dho 'go mü ꞊naa 'ö nu. 21 Yö ꞊në dho nu 'yö kwa kwi 'ö "sɛ 'ka 'ö ga ‑kwi 'ka 'ö "sɩ 'yaa‑ ‑dhɛ ya‑ ‑gla, 'yö‑ ‑kë ꞊dhɛ ‑a ‑dɩ kwi ꞊bhlëësü 'ö 'yaa ga 'ö mɛdhɛ kë sië‑ 'gü bha‑ 'dhö, faan 'ö Atanna ‑ya nu‑ ‑dhɛ 'ö‑ ‑kɔ ‑yö ‑ziö 'ka pë suu ꞊gban "pɛpɛ ‑gɔ bha‑ 'ka.