1 ꞊Dhɛ 'ö 'wɔn 'dhɛ ‑nu bha ꞊wa bo kë ‑sü 'ka ꞊dhɛ ‑kɔ ‑nu bha‑ 'dhö, 'a dho "kan n ‑ta kö dhang‑ "dhi ꞊ya "pʋ, kö mɛ do 'ö gun dhiang zë sië n ‑dhɛ, 'ö‑ ‑wʋ ‑kë ꞊dhɛ "truu ‑wʋ 'dhö bha ‑ya pö sië n ‑dhɛ 'ö‑ pö: «‑Bhö ‑tɔn 'kun kö 'i nu yö kö 'wɔn 'dhɛ ‑nu 'wo dho kë ‑a 'dhɛ bha‑ zian‑ ‑ta bha 'a‑ ‑nu ‑zɔn i ‑dhɛ.»

2 'Ö ö bo‑ ‑pö n ‑dhɛ "dhʋ̈ ‑sü 'ka bhoo, 'yö 'Nii‑ "slʋ̈ʋ̈slʋ̈ ‑yö n sü ꞊dhɛ 'gbʋ‑ ‑yö mɛ sü, 'yö dho n 'ka dhang‑ 'gü. ‑Dhɛ 'ö dho n 'ka‑ 'gü bha 'a dho ‑dhɛ ‑ga mü kö ‑blüdëdhɛ ‑gbloo do ‑yö ‑ya sü 'ka mü, kö mɛ do 'bha ‑yö ‑ya ‑sü 'ka‑ ‑ta. 3 "Kɛɛ 'mɛ 'ö gun ‑ya ‑sü 'ka‑ ‑ta "dhʋ̈ bha‑ wëëdhɛ "yan‑ ‑bhɔ ‑glënglëndhö ꞊dhɛ ‑gwë ꞊bhlëësü ꞊gblɛyidhe suu 'bha 'wo‑ Zasipö ‑kë bha waa‑ ‑zaɔndhö 'wo‑ Saaduanö ‑kë bha‑ ‑nu "yan bhɔ ‑kɔ bha‑ 'dhö. Kö ꞊kpöng 'ö dɔ dha ‑gɔ bha‑ 'dhɛ 'ö ꞊klëën ‑sü 'ka ‑gbloo bha‑ ‑zü bha‑ "yan‑ bhɔ sië 'pö ‑glënglëndhö ꞊dhɛ gënng' ‑gwë bha‑ 'dhɛ 'wo‑ ‑dhɛ Medhodö bha‑ 'dhö. 4 Kö ‑gbloo "wɛɛ ‑kaɔng ꞊plɛ ga ‑yiisiö 'bha ‑wo ꞊klëën ‑sü 'ka 'zü ‑a 'kpiisü bha‑ ‑zü, 'ö mɛ zizi ‑nu ‑kaɔng ꞊plɛ ga ‑yiisiö 'ö sɔ "puu 'dhö‑ ‑nu ‑bha bha 'wo ‑ya ‑sü 'ka‑ ‑ta 'dɔɔndhö, kö "sënng faan‑ ‑ya ‑nu ‑gɔ ‑bha. 5 Kö dha ‑yö "yan 'kun sië ‑dhɛ 'ö ‑gbloo 'kpiisü bha 'ö gun ‑ya sië‑ ‑bha bha‑ 'gü, 'ö ‑gbla, 'ö pë 'bha ‑nu ‑wo ‑wɩ mü ‑nu wo 'ö mɛ "tʋ‑ ‑da ‑wʋ 'gü ‑wuudhö. Kö "sɔng "saɔplɛ ‑wo 'pu sië ‑gbloo 'kpiisü bha‑ wëëdhö. 'Nii‑ "saɔplɛ 'ö go Atanna "piʋ̈ bha ꞊në 'wo gun 'pu sië "dhʋ̈ bha. 6 Kö ‑gbloo 'kpiisü bha‑ wëëdhɛ "yan‑ bhɔ sië ‑mina ‑minadhö ‑dhɛ ꞊gban 'gü mɔɔdhö ꞊dhɛ 'pë 'ö gënng' ‑gwë "puu 'ö ꞊dhɛ "dënggbɔ 'dhö bha ꞊në ꞊waa‑ zun 'kwëë‑ ‑dhɛ ꞊gban 'gü 'ö ꞊ya kë ꞊dhɛ "yitagbɛa 'bha 'dhö ‑a 'dhö. Kö pë "yaandhe 'bha ‑nu 'ö‑ ‑nu "yan 'dhö ꞊loo ‑sü 'ka‑ ‑nu kwi ‑bha ‑yëën 'këëndhö ‑a ‑nu "dhiʋ̈ ‑dhɛ waa‑ ‑nu ꞊taama ‑dhɛ ‑nu ꞊gban 'gü bha‑ ‑yiisiö ‑wo ꞊klëën ‑sü 'ka ‑gbloo bha‑ ‑zü "pɛan ꞊gban "piʋ̈. 7 Pë "yaandhe ‑nu 'wo "dhʋ̈ bha‑ ‑blɛɛsü 'a‑ yö bha ‑yö ‑bhɔ laa ꞊në‑ ‑bha. 'Yö‑ ꞊plɛ ‑naa ‑yö bhɔ ‑du 'në ‑bha. 'Yö‑ ‑yaaga ‑naa wëëdhɛ ‑yö bhɔ mɛbhɩɩdhe ‑bha ‑bha. 'Yö‑ ‑yiisiö ‑naa ‑yö bhɔ "gblëë‑ 'ö ‑wlö sië‑ ‑bha. 8 Pë "yaandhe ‑yiisiö 'wo "dhʋ̈ bha‑ do gban‑ ‑gun "saɔdo, 'yö‑ ‑nu "yan 'dhö gun ꞊mɔɔ ‑sü 'ka‑ ‑nu kwi 'gü ‑dhɛ ꞊gban "pɛpɛ 'gü. ‑Yö ‑gun ‑nu kwi 'gü 'kɔɔdhö 'ö gun‑ ‑nu ‑bha "kpɛnngdhɛ ‑nu ꞊gban 'gü. ‑A ‑nu ‑bha yë 'ö 'dhö, 'ö 'wo ꞊gloo‑ ‑bha 'wo ‑wɔ 'gü "yaan yö ‑mü 'tɔ ‑loo 'mɛ 'ö ‑ya ‑sü 'ka ‑gbloo 'kpiisü bha‑ ‑ta bha ꞊në‑ ‑bha ‑sü 'ka 'wo‑ pö: «'Mɛ 'ö "slʋ̈ʋ̈slʋ̈, 'ö "slʋ̈ʋ̈slʋ̈, 'ö "slʋ̈ʋ̈slʋ̈, yö ‑mü kwa Dëmɛ, kwa ‑bha Atanna 'gü "gbɩɩsü 'ö gun, 'ö 'dhö ‑kpɛawo, 'ö dho 'to ‑todhʋ̈ 'ka bha ꞊në‑ 'ka.» 9 'Mɛ 'ö ‑ya ‑sü 'ka ‑gbloo 'kpiisü bha‑ 'gü 'ö‑ bhɔ ‑yi 'yaa 'dhö kö yöö ‑nu 'to ga ‑yi ꞊në‑ ‑bha bha, pë "yaandhe ‑yiisiö bha ꞊wa "wɩ‑ "piʋ̈, ꞊wa 'tɔ ꞊loo‑ ‑bha kö ‑wa nuɛ" bho ‑kɔ 'ö‑ 'gü 'do 'do, 10 'Yö mɛ zizi ‑nu ‑kaɔng ꞊plɛ ga ‑yiisiö bha 'wo zun wo kpiö 'gü 'mɛ 'ö ‑ya ‑sü 'ka ‑gbloo 'kpii‑ bha‑ 'gü, 'ö 'dhö ‑todhʋ̈ 'ka bha‑ ‑kuu "dhiʋ̈, 'yö 'wo‑ ‑dhɔkë. 'Yö 'wo woo‑ "sënng 'faan‑ ‑nu 'ö‑ ‑nu ‑gɔ ‑bha bha‑ bho mü 'yö 'wo‑ ‑zuö ‑gbloo 'kpiisü bha‑ wëëdhö kö ‑wa pö sië: 11 «'Aa! Yi Dëmɛ, yi ‑bha Atanna, ‑a ‑dhɛ ‑mü ꞊dedewo. ‑A ‑dhɛ ‑mü kö bhi ꞊në i 'tɔ ‑yö bhɔ, kö ꞊bhlëë ‑yö ‑ya i ‑bha, kö 'gügbɩɩdhɛ ‑yö kë i ‑gɔ. ‑A ‑gɛn ‑mü ꞊dhɛ bhi ꞊në 'i pë suu ꞊gban "pɛpɛ ‑da. ‑A ‑nu ‑bha kë ‑sü 'ö 'wo ‑tosɛa ‑kë bha ‑yö ‑ga bhi ꞊në i 'gü.»