1 Bhi ‑zë ‑bhö mɛ draan‑ mɛ draan‑ ‑kɔ ‑së 'ö "slʋ̈ʋ̈slʋ̈ 'ö go Atanna "piʋ̈ bha ꞊në‑ ‑bha. 2 ‑Bhö ‑a pö ‑kwɛazë ‑nu ‑dhɛ ‑wo kë ‑kɔ ‑mɔɔ wo ‑dɩ ‑bha ‑mɛ 'ka (we mü ‑sü 'gü), "kɛɛ ‑wo kë 'mɛ 'ö mɛ ‑nu dho‑ ‑nu ꞊bhlëë ‑ya, 'ö 'wɔndɔdhe 'dhö‑ ‑nu ‑gɔ ‑a ‑nu këwɔn ‑nu waa‑ ‑a ‑nu ‑zʋgɔngüwɔn ‑nu 'gü, "kɛɛ 'ö 'wo wo ‑zʋ yö Atanna ‑dhɛ ꞊dedewo, 'ö ‑dhɔ 'dhö‑ ‑nu 'gü ꞊në‑ 'ka, kö‑ ‑nu zuë" ‑yö kë ‑sɛa 'mɛ 'wo 'wɔn yaa ‑kë ‑nu 'ka ‑a ‑nu "piʋ̈. 3 ‑A pö 'pö dhong ‑nu ‑zʋgbansü ‑nu ‑dhɛ ‑wo ‑tosɛa 'ö pö 'aa‑ ‑bha ꞊në‑ kë, 'wa 'dho dhiang yaa zë mɛ ‑nu ‑bha 'wo‑ ‑nu kwi zë‑ 'ka, 'wa 'dho ꞊nëng we ‑ta, ‑wo kë ‑dhio ‑së ‑dɔ gwaangɔdhe "gbɔnggbɔng ‑nu ‑ta ‑mɛ ꞊në‑ 'ka. 4 Kë "dhʋ̈ kö ‑wa ‑zɔn ‑nu ‑dhɛ ꞊dhɛ ‑a ‑dhɛa ‑bha ꞊dhɛ ‑a ‑nu ‑bha gɔɔn‑ ‑nu ‑dhɔ ‑ya ‑nu kë waa‑ ‑nu ‑bha 'në ‑nu 'dhö. 5 ‑A ‑dhɛa ‑bha ꞊dhɛ ‑a ‑nu këwɔn ‑nu waa‑ ‑nu ‑zʋgɔngüwɔn ‑nu ‑wa ‑zɔn ꞊dhɛ ‑wo ꞊kpaɔsü. 'Wa 'dho ‑zua zë, ‑wo ‑ya woo‑ 'kɔ ‑wɔn zuën ‑ta kö ‑wo woo‑ yë ‑nu ‑wɔn 'kun "gbɩɩ‑, kö ‑wo woo‑ gɔɔn‑ ‑nu ꞊bhlëë ‑ya, kö ‑wo wo ‑gɔ 'dho‑ ‑nu ‑dhɛ "sia‑, kë "dhʋ̈ kö mɛ 'bha 'ya 'dho Atanna ‑wʋ ‑dhiang yaa zë.

6 ‑Bhö ‑a pö 'nëglɔɔn ‑nu ‑dhɛ ‑kɔ do bha‑ 'gü 'pö ꞊dhɛ ‑wo kë ꞊kpaɔsü ‑a ‑nu këwɔn ‑nu waa‑ ‑nu ‑zʋgɔngüwɔn ‑nu 'gü. 7 (꞊Dhɛ 'ö ‑kë ꞊dhɛ bhii ‑dɩ 'pö i ‑kë 'nëglɔɔnnë 'ka bha,) ‑bhö ‑gleng ‑dhɛ ‑wɔn kë kö i ‑mɔɔ "kwëë "yɔɔ ‑nu ‑wo ‑tosɛa kë ‑kɔ 'sü i ‑bha ‑bha. ‑Bhö mɛ ‑nu draan‑ tɛanwɔn ‑dɩ ‑slɔɔ ꞊në‑ 'ka, ‑kɔ 'i dho‑ kë‑ 'ka kö mɛ ‑nu ‑wo i ꞊bhlëë ‑ya ꞊në ‑bhö ‑a mɔɔ‑ "tʋ̈ng ꞊gban 'gü. 8 ‑Bhö ‑a kë ‑së kö 'wa 'dho "yi yö i zë ‑dhiang ‑nu "piʋ̈ 'ö 'wo i ꞊tɔɔ ‑kë 'ka, kë "dhʋ̈ kö 'yiʋ̈‑ ‑yö dɔ kwa ‑dhiang yaa zë ‑mɛ ‑nu ‑bha kö 'wa 'dho pë 'bha ꞊slɔɔ 'wo‑ pö kwa ‑bha.

9 ‑Bhö ‑a pö 'pö ꞊dhuëng ‑nu ‑dhɛ ‑wo wo dëmɛ ‑nu ꞊bhlëë ‑ya ‑kpɛawo kö 'pë 'ö dho‑ ‑nu ‑zʋ 'kun ꞊në ‑wa kë, ‑a ‑nu "yan 'ya 'dho ziö wo dëmɛ ‑nu 'gü ('ö 'wo dhiang zë‑ ‑nu ‑wʋ ꞊wlöö). 10 'Wa 'dho ꞊kwaan bho‑ ‑nu ‑ta, "kɛɛ ‑wa "slë mɔɔ‑ ‑kpɛawo kö‑ ‑nu dëmɛ ‑nu ‑wo 'dhang bho‑ ‑nu "dhiʋ̈ ‑a ‑nu këwɔn ‑nu "piʋ̈. Kë "dhʋ̈ kö mɛ ‑nu ꞊waa‑ ‑dhɛ yö kö ‑wo mɛ draan ‑wʋ 'ö go kwa Dhamɛ, kwa ‑bha Atanna "piʋ̈ bha‑ ‑dhiang ‑së zë.

11 (‑Kɔ 'ö 'dhang ‑bho Yesu "dhiʋ̈ ‑mɛ ‑nu dho ‑tosɛa kë‑ 'ka ꞊në bha.) ‑A ‑gɛn ‑mü ꞊dhɛ Atanna ‑ya ‑zɔn mɛ "pɛpɛ ꞊gban ‑dhɛ ꞊dhɛ ö ‑dho ö ‑bha ‑gasitɛ kë‑ ‑nu ‑dhɛ kö ꞊wa bɔ ö 'ka ‑wo dha ‑sü ꞊slɔɔ. 12 ‑Gasitɛ 'ö "dhʋ̈ bha ꞊në kwa ꞊klang ‑kë pë ‑nu 'ö‑ ‑dhɔ ‑yö Atanna ‑kë ‑a kë ‑sü 'ka, waa‑ ‑tosɛa kë ‑kɔ yaa 'ö "kpʋng ꞊taa yö bha‑ 'dhö. Yöö do bha 'zü ꞊në kwa ꞊klang ‑kë ‑ta "yaaki 'ka ‑sü 'ö pö 'aa kë mɛ ‑bha, "kɛɛ 'ö mɛ ‑yö Atanna ꞊bhlëë ‑ya bha‑ 'ka. 13 ‑Kɔ bha ꞊në 'kwa dho ‑tosɛa kë‑ 'gü 'ö dho‑ 'ka "dhʋ̈ 'ö zun‑ 'ka ‑dhɛkpaɔyi ‑së 'ö kwa ‑zʋ 'dhö‑ 'gü, 'ö nu sië, 'ö kwa ‑bha Atanna 'ö 'kpii‑, kwa Dhamɛ Yesu Klisi dho nu‑ 'ka ö ‑bha 'tɔbhɔdhe 'gü bha‑ ‑bha. 14 Yesu ‑yö ö ‑dɩ ‑nu mɛ "bhɩɩ‑ ‑nu kwa ‑dhɛ kö 'ö kwa dha ꞊në‑ wo 'wɔn yaa suu "pɛpɛ ꞊gban ‑gɔ, kö 'kwa kë "slʋ̈ʋ̈slʋ̈, kö 'kwa kë yöö do ꞊në ö ‑bha 'ka, kö 'wɔn ‑së ꞊në‑ kë ‑pɛng ‑yö dɔ kwa ‑ta.

15 'Wɔn suu bha ꞊në 'i dho mɛ ‑nu ꞊klang kë‑ 'ka kö 'dhang ‑bho Yesu "dhiʋ̈ ‑mɛ ‑nu ‑wa kë ꞊dhɛ ‑kɔ bha‑ 'dhö. 'Mɛ 'wii "wɩ‑ ‑bha kö ‑wa kë ꞊dhɛ ‑kɔ bha‑ 'dhö, ‑bhö ‑ya ‑nu "yan 'gü, ‑bhö ‑a pö glɔglɔdhö kö ‑yö 'to i ‑bha ‑bha, kë "dhʋ̈ kö mɛ 'bha 'ya 'dho ꞊slɔɔ‑ ‑nu kpö 'gü 'ö i ꞊bhlëë ‑siö, 'ö 'i ‑kë ‑bhaasü, 'ö‑ pö ꞊dhɛ 'bhaa mɛ ‑draan 'wɔn ‑nu bha‑ ‑bha ‑mɛ 'ka.