LUHKA
Yuk Thangkdaw
Pyenhlüma
Thangkdaw Luhka naw Jesuh cun Isarela ngthumkhän küikyanbawi la nghngicim khyang avana küikyanbawia pyenki. Jesuh cun Bawipa Ngmüimkhya naw “M'yenkseki hea veia thangkdaw sang khaia” a khü; acuna thangkdaw cun khyang avana hama kyaki tia Luhka naw yuki. Jekyainaka mawng pi aktäa Luhka üng ngdangki. Aktunga acuteinaka kyangkdäm he üng Jesuha lawnak pyen lü, akdüta Jesuh khankhawa a kai be üng pi pyen beki. Jesuh khankhawa a kai be käna Khritjan jumeinak la Khritjana dämduh lawnaka mawng pi ahin yuki bä naw “Ngsä hea khutbi” tia cauk üng a yuka kyaki.
Khankhawngsä hea ng’äinak, toksäm he Jesuha hminaka ami cehnak, Temple k'uma hnasena kba Jesuha cehnak, Samarih khyang kdaw am msuimcäpnak a pyenak la Capa khyüka mawng he cun ahina Thangkdaw däng üng va jah hmuha kyaki. Thangkdaw akyang avan üng ktaiyünak, Ngmüimkhya Ngcim, Jesuha khutbi üng nghnumi hea bilawhnak he la katnaka phäh Mhnama mhlätnak he cun aktunga jah mdanga kyaki.
Amawng Ktawi he
Pyenhlüma (1:1-4)
Baptican Johan la Jesuha hminaka mawng (1:5—2:52)
Baptican Johana khutbi (3:1-20)
Jesuh baptican a khanak la hlawhlep a khameinak (3:21—4:13)
Jesuh naw Kalile khawa angdanga khutbi a binak (4:14—9:50)
Kalile üngka naw Jerusalema (9:51—19:27)
Anghnu säiha pat la Jerusalema peia (19:28—23:56)
Bawipa thawhnak be, ngdangnak, la khankhawa a kainak (24:1-53)
1
1 Ka püi Theophiluh aw; ajana thawn khawikia mawng cun, khyang khawjah naw mi ksunga pyena ngthu yu khai hea ana ktha na khawiki he. 2 Akcüka ana hmu u lü ngthu ana sang khawiki he naw mi veia ami pyen ana yuki he. 3 Acunakyase nang angvai aw, angsinga ka ngaihkyu käna, acuna mawng cun, angsinga na hama yuk üng daw khaia ngaikyu veng. 4 Ajana ngthu ami ning mthei he cen ngthungtak ni ti na ksingnak vaia ka yuka kyaki ni.
Baptican Johana Hmi law vaia Mawng
5 1Khro 24:10 Judah khawa sangpuxang Herod a bawi kcün üng, ktaiyü Abijaha khuikyawng üngka ktaiyü mat Zakharih ngming naki awmki; acun naw ktaiyüa khuikyawng üngka a khyunak, a ngming cun Elizabeta kyaki. 6 Ani nghngih Pamhnama mik hmuha akdawa xüngseiki xawi, pyen vai am hlü khaia Bawipa ngthupet la, ngthummkhän avan läki xawi. 7 Elizabet cingkia kyase am ca ni lü, aktäa xüki xawi.
8 Mhmüp mat üng Zakharih cun ktaiyüa khüih khawia kba Pamhnama Temple k'uma a khüih k'um üng, 9 ktaiyüa thuma Bawipa Temple k'uma lut lü, ng'uinghnam mkhih khaia xüa kyaki. 10 Acunüng, ng'uinghnam a mkhih k'um üng khyang he ami van kpunga ktaiyüki he.
11 Acunüng, Bawipa khankhawngsä mat Zakhariha veia ngdang law lü, ng'uinghnam mkhihnaka kpat lama ngdüi lawki. 12 Zakharih naw khankhawngsä a hmuh üng kyüh lü ngxetki. 13 Acunüng, khankhawngsä naw, “Zakharih, ä kyüa, na ktaiyünak ngjak pänga kya ve, acunakyase na khyu Elizabet naw cangpyang mat ca na se, Johana na sui khai. 14 Nang jekyai lü na hlim khai, khyang khawjah ania hmi lawa phäha jekyai khai he. 15 Num 6:3 Ani cun Bawipa ngaiha kyäp khai, ju naki i am ei aw khai. A nua puk k'um üng tün lü ngcimcaihkia ngmüimkhya am be khai. 16 Acunüng ani naw Isarela ca he khawjah, ami Bawipa Pamhnama veia jah nghlat sak be khai. 17 Mal 4:5,6Ani naw pa he la ca he alanga jah lawpüi be lü, am cingcaihki he ngsungpyunak ksingnaka lam üng jah nghlat sak be lü, khyang he Pamhnama phäha jah ngtünngceisak khai, Elijaha ngmüimkhya la khyaihbahnak am Pamhnama maa cit khai,” a ti.
18 Acunüng Zakharih naw khankhawngsä üng, “Ikba acun ka ksing vai aw? Kei pakse ni, ka xü pängki, ka khyu pi nukpüi lü, a khawkum xü pängki ni,” a ti.
19 Dan 8:16; 9:2Khankhawngsä naw, “Kei Kabriel, Pamhnama ma ngdüikia ka kyaki, nanga veia hina jekyainaka ngthu lawpüi khaia tüih lawa ka kyaki.
20 Cunsepi Ngaia, ka ngthu akcün üng kümkawi law khai am na juma phäha, hina ka ngthu am a kümkawi law ham üng am ngthuhei thei lü, na ang khai,” a ti.
21 Khyang he Zakharih kpunga ana ngängki he, Temple k'uma a di lawa phäha aktäa cäiki he.
22 Acunüng, a luh law be üng ami veia am ngthuhei thei lü, a kut am jah kha hü se, Temple k'uma mdannak hmukia ami ksing.
23 Acunüng, ktaiyü a binaka kcün ngpäng se a ima cit beki. 24 Acunkäna a khyu Elizabet m’yai law lü im k'uma khya mhma ngküpki. 25 Acunüng Elizabet naw “Khyang hea ami na ksekhanak Pamhnam naw na kpüi lü a na lawhin pet ni,” a ti.
Jesuha Mmi law vaia Mawng
26 Acunüng, akhya khyuk üng Pamhnam naw khankhawngsä Kabriel Kalile khaw, Nazareta a tüih. 27 Mt 1:18Acuna nglami cun Davita pakhui üngka, Josep ngming nakia khyu vaia ami mkhyäpa kyaki. Nglamia ngming cun Marih naki. 28 Acunüng, khankhawngsä naw Mariha veia lut lü, “Pamhnama hlüei la jekyainak, dim’yenak am awma, Pamhnam na veia awm ve, nghnumi he avan üng na josen säih ve,” a ti.
29 Acuna khankhawngsäng naw i a ti hlünak am ksing lü aktäa cäi lü kyüki. 30 Acunüng, khankhawngsä naw, “Marih aw, ä kyüa; Pamhnam na veia dawki ni, 31 Mt 1:21 m’yai lü, kpamica na ca khai, a ngming Jesuha na sui khai. 32 2Sam 7:12,13,16; Hesa 9:7 Ani cun kyäpsawk law se, ak'hlüng säiha Capa ti khai he, Bawipa Pamhnam naw a pu Davita mäiha sangpuxanga pawh law khai. 33 Ani naw Jakopa mjü he angläta jah uk se, a khaw am düt khai ni,” a ti.
34 Marih naw, khankhawngsä üng, “Kei am ka ceimahki hin ikba acunkba kya thei khai aw?” a ti.
35 Khankhawngsä naw msang lü, “Ngmüimkhya Ngcim na khana pha law se, hlüng säihkia johit naw ning hlawp tawm law khai, acunakyase hmi law khaia khyang ngcim pi Mhnama Capa ti khai he. 36 Acunüng ngaia, cingki ami ti khawi na püi Elizabet pi a xü käna kpamica m’yai na se atuh khya khyuk law pängki. 37 Gen 18:14Pamhnama am a ti thei i am awm naw,” a ti. 38 Marih naw, “Kei Bawipa ana m’ya nu ni, na ngthua kba ka khana kya kawm,” ti se, acunüng khankhawngsä naw a ceh tak.
Elizabeta veia Marih Citki
39 Acunüng, Marih tho law lü, angxita mcunga awmkia mlüh, Judah khawnu mata cit lü, 40 Zakhariha ima lutki naw, Elizabet a hnukset. 41 Acunüng, Elizabet naw Marih a hnukset a sim la, a puk k'uma naca ngsün law se, Elizabet ngmüimkhya Ngcim am be law lü, 42 angsanga, “Nghnumi he avan üng na jo sen säih ve, na canak vai pi a jo sen ve! 43 Ka Bawipaa nu, ka veia na lawnak sen vaia ta ia ngjo ni? 44 Na na hnuksetnak ka hnga üng a luh la hnasen jekyai lü ka k'uma ngsün ve. 45 Jumeikia nghnumi pi a jo sen ve, isetiakyaküng a veia Bawipa naw ngthu a pyen he cun kümkawi law khai hea akya phäha kyaki” a ti.
Mariha Mküimtonak Ng'äi
46 1Sam 2:1-10 Acunüng Marih naw,
“Ka mlungmthin naw Bawipa mküimto ve;
47 ka ngmüimkhya pi na küikyankia Pamhnama khana aktäa jekyai ve,
48 1Sam 1:11a na m'yanua hnemnak hmu lü, na süm ve;
atuh üng tün lü, khyang avan naw a jo senki na ti na khai he.
49 Akyan säih naw ka khana akyäp säih na pawh pe ve,
A ngming pi, ngcimcaiki ni;
50 A m’yeneinak cun angsawn täh se
amät kyühki hea khana awmsaki.
51 “A ban am a kyannak mdang lü,
khyang awhcaki he cun ami ngaikyunak am akcea a jah ngtaisak.
52 Job 5:11; 12:19“Ami bawingawhnak üng ngawki hea bawi he a hnemnaka jah khya lü,
ami mlung hnemsaki he a jah mhlünmtai.
53 “Ami ei cawiki he, akdaw am jah kphü lü,
bawimangki he, ami kut xawnga a jah tüih.
54 “Mi pupa he, a jah na khyütamnakpüi kümkawisak lü,
a m'ya Isarel he jah kpüi khaia law ve.
55 Gen 17:7 A jah m'yeneinak Abraham
la a ngsawn hea veia angläta süm ve” a ti.
56 Acunüng Marih, Elizabeta veia khya kthum awm lü a ima cit beki.
Baptican Johana Hmi lawa Mawng
57 Elizabet na a hmi vai kha law se, kpamicaa caki. 58 A impeiloceng he la, a paca he naw, Pamhnam naw a m'yenei ni ti ksing u lü, aktäa ami jekyaipüi.
59 Lev 12:3Acunüng pat mat küm se, naca a vun mawih vaia law u lü, a ngming a pa ngminga kba Zakhariha sui vaia ami bü. 60 Acunüng a nu naw, “Ka! Johana sui vai,” a ti.
61 Acunüng amimi naw, “Na ngsawn, na khui üngka, acunkba ngming naki u am ve khawi naw,” ami ti. 62 Acunüng a pa ami kut am, “A ngming ua sui üng daw khai aw?” tia ami kthäh.
63 Zakharih naw, a yuknak vai lungphek kthäh lü, “A ngming Johan,” ti lü yu se, ami van cäi lawki he. 64 Acunüng angxita ngthuhei law be thei lü Pamhnam mküimto lawki. 65 Acunüng, ami van cäicah lawki he. Acuna mawng cun Judah khaw avan üng ngthang hüki. 66 Acun ngjaki avan naw, ami mlung k'uma ta u lü, “Acuna hnasen cun ia mäih vai ni?” ami ti. Ani cun Pamhnam naw a johit am awmpüiki tia ami van naw ksingki he.
Zakhariha Malam Pyenak
67 Johana pa Zakharih cun ngmüimkhya Ngcim am be lü,
68 “Isarel hea Bawipa Pamhnam cun mi mhlünmtai vai,
a khyang he jah law si lü, jah mhlät be ve,
69 A m'ya Davita ngsawn he
ak'hlüngtaia Küikyan bawi jah pe ve,
70 Acun cun a sahma ngcim he üng
ajana a jah na khyütamnaka kba,
71 mi ye he la jah hnengkiea kut üngka naw
la küikyan khaia,
72 mi pupa hea veia m'yeneinaka ngthumkhän ana tak a kümsak vai la,
a khyütam ngcim a sümnak vaia,
73 mi pa Abrahama veia a
khyütamnaka kba,
74 mi ye hea kut üng mi lät lü,
am kyü u lü,
75 mi xüna küt üng ngcimcaihnak la,
ngsungpyunak am a ma a khut mi pawhnak vaia,
76 Mal 3:1nang ka ca, Bawipa a lam pyang khaia na cit ma khaia kyase,
ak'hlüng säih Mhnama sahma ning ti na khai he,
77 ami katnak he jah mhlätnak am,
küikyanak, a khyang he üng jah ksingsak khai,
78 mi Pamhnam cun m'yeneinak la hniphnawinak am bebang lü mi khana küikyanaka nghngi vai law sak khai,
79 Hesa 9:2 a nghmüpnak la, thihnaka k'uma awmki he, akvai jah pe khai la, mlung üpnaka lama jah cehpüi khai” a ti.
80 Acunüng, a nghmaw cun ngbaü law lü, a mlung ngaihnak kyan law ksetam lü, Isarel hea veia am a ngdang law hama üng khawkhyawng khawa awmki.