MAKUHA
Yuk Thangkdaw
Pyenhlüma
Makuha yuk thangkdaw “Hin hin Mhnama capa Jesuh Khritawa mawng, thangkdaw ni” tia cuteiki. Jesuh cun khutbinak la ana takia khyanga ngdangsaka kyaki. A ana cun a mtheimthangnake, ngmüimkhya kse he a ja nängnak, la khyang hea katnak he a jah mhlätnak üng hmuha kyaki. Jesuh naw amät cun katnak üngka naw jah mhlät lü a xünnak jah pe khaia lawkia khyanga capa, ti lü a pyen.
Makuh naw Jesuha jah mtheimthangnak la a ngthukhyü hea kthaka, Jesuha a bilawh he ngsingkhai bawk khaia jah mdangki. Baptican pekia Johan, Baptican a khannak la Jesuh naw hlawhlep a khamnaka mawng aktawia a jah pyen käna, Jesuha khutbi, a jah yaisaknak la a jah mtheimthangnake jah mdangki. Akcün bäih läk läk se Jesuha a hnukläk he naw ani cun akdawa ami ksing law däm däm. Cunsepi Jesuh am hlüeiki he naw hneng law ksehlenkie. Abäihnaka akyangdäm üng Jesuh khawmdeka a xün a bäihnaka khyün üng, ami taihnak la a thawhnak bea mawng he mi jah hmuki.
Thangkdawa bäihnak nghngih cun, Makuh naw am yuk lü khyang kcea yuk bea ngaiha kyaki.
Amawng Ktawi he
Thangkdawa cuteinak (1:1-13)
Jesuh Kalile khaw üng khut a binak (1:14—9:50)
Kalile üngka naw Jerusalem mlüha (10:1-52)
Abäihnaka khyün la Jerusalema pipei (11:1—15:47)
Jesuha thawhnak be (16:1-8)
Thobeki Bawipa ngdangnak la khana a kainak be (16:9-20)
1
Baptican Saja Johana Ngthu pyen
(Mt 3:1-12; Lk 3:1-18; Jn 1:19-28)
1 Hin hin Pamhnama Capa*Pamhnama Capa tia avang üng am ami yuk si. Jesuh Khritawa mawng Thangkdaw ni.
2 Mal 3:1“Pamhnam naw, ‘na maa ka ngsä,
lam pyang khaia ka tüi law khai.’
3 Hesa 40:3 (LXX)Khyang mat, khawkhyawng khawa ngpyangki naw,
‘Bawipa a lam pyang ua;
a cehnak vai lam ngdüngsak ua!’ a ti” tia, akphyüma sahma Hesajah naw, a yuka kba.
4 Acunüng, Johan khawkhyawng khawa ngdang law lü, baptican jah pe law lü, jah mtheimthang law lü,†Johan khawkhyawng khawa ngdang law lü, baptican jah pe law lü, jah mtheimthang law lü ft ti cun avang üng Johan khawkhyawng khawa ngdang law lü, jah mtheimthang law lü tia ng'yuki. “Nami katnak nghlata u lü Baptican khan ua, Pamhnam naw nami katnak he ning jah mhlät khai ni,” a ti. 5 Acunüng, Judah khaw la Jerusalem mlüha khyang he ngthu ngai khaia Johana veia citki he. Ami katnak he jah phyeh u se Jordan tuinu üng Johan naw baptican a jah khansak.
6 2Sang 1:8Johan cun samu am ami pyan suisak suisa lü, savunksawmyüi a kcawi üng vawp lü, mkhaü he la mawkpyawnga khawitui jah ei awki. 7 Johan naw sang lü, “Ka hnua law khaia khyang ta keia kthaka kyäp bawk ve, kei cun kawp lü a khawdawkyüi ka kphyan pe khaia pi am ka ngkawihki ni. 8 Kei naw tui am baptican ka ning jah peki, cunsepi ani naw Ngmüimkhya Ngcim am Baptican ning jah pe khai,” a ti.
Baptican la Jesuh hlawhlepnak
(Mt 3:13—4:11; Lk 3:21,22; 4:1-13)
9 Acun käna ivei am ngsawk se, Jesuh Kalile khaw Nazaret üngka naw law se, Johan naw Jordan tuinu üng baptican a pet. 10 Tui üngka naw angxita a thawh law be üng, khankhaw nghmawng law lü, Ngmüimkhya cun mümca kba a khana kyum law se a hmuh. 11 Gen 22:2; Sal 2:7; Hesa 42:1; Mt 3:17; 12:18; Mk 9:7; Lk 3:22Acunüng khankhaw üngka kthai naw, “Nang, ka ning jawng'engnak kcanga ka Capa, na khana ka je leng lengki,” tia, ngthang lawki.
12 Acun la Ngmüimkhya naw khawkhyawng khawa a tüih. 13 Acuia khawmhmüp kphyükip khawyam naw hlawhlep se awmki. Khisa he pi awmki he, acunüngpi khankhawngsä he naw law u lü ami msümcei law.
Jesuh naw ngaksui kphyü a jah khü
(Mt 4:12-22; Lk 4:14,15; 5:1-11)
14 Johan thawngim üng ami khyum käna, Jesuh Kalile khawa cit lü, Mhnama Thangkdaw pyen hü lü, 15 Mt 3:2“Akcün pha lawpäng ve, Mhnama khaw ng’et law ve! Nami katnak he jah nghlata u lü, thangkdaw jum ua!” a ti.
16 Kalile tuili kama Jesuh a ceh üng, Sihmon la a na Andru ngvai vawiki xawi jah hmu lü, 17 Jesuh naw, “Na läk law nia, kei naw khyang man khaia ka ning jah mthei khai,” a ti. 18 Acunüng angxita ani ngvai jah yawk hüt ni lü, Jesuha hnu läki xawi.
19 Acun üngka naw, asäng va cit lü, Zebedea capa Jakuk la a na Johan, mlawnga khana ani ngvai jah na pyangei ni se a jah hmuh. 20 Jesuh naw a jah hmuh la jah khü se, ani pa Zebede la mlawnga khana ani jah ngvaha khyang he jah yawk hüt ni lü, Jesuha hnu läki xawi.
Ngmüimkhyakse Mata Awmnaka Khyang Mat
(Lk 4:31-37)
21 Jesuh la axüisaw he Kapenawm mlüha law u se, angawi Sabbath mhmüp üng Jesuh naw Sinakok k’uma lut lü, a jah mthei. 22 Mt 7:28,29Thum jah mtheiki hea kba am kya lü, ana takia kba jah mthei se khyang he aktäa cäiki he.
23 Acunüng, ami Sinakoka k’uma khyang mat, ngmüimkhyaksea awmnak naw, 24 “Nazaret Jesuh aw, i mi nglak ve se ja? Na jah kpyeh khaia na lawki aw? Nang u ti ka ksingki. Nang cun Mhnama ngsä ngcim ni!” ti lü, ngpyangki.
25 Jesuh naw, “Ä khihkhe lü, a k’um üngka naw, angxita lut lawa,” ti lü, ngmüimkhya kse a ksät. 26 Khawyai naw acuna khyang cun ksün lü, angsanga ngpyang lü, lut lawki. 27 Khyang he ami van cäi law u lü, “Hin hin ia ngkhaw ni? Ahina mtheimthangnak hin akthai am niki aw? Ana takia kba khawyai he pi jah ksät se, a pyen ngaiki he hin,” tia mat la mat ngthähki he.
28 Acun la angxita, Kalile khaw avan üng Jesuha mawng ngthang hüki.
Jesuh naw Khyang Khawjah a jah M’yai
(Mt 8:14-17; Lk 4:38-41)
29 Jesuh la axüisaw he Sinakok üngka naw lut law u lü, Jakuk la Johan am, Sihmon la Andrua ima cit ktäiki he. 30 Sihmona pi, mhnatei se ngjänki, Jesuh a pha law la ami mtheh. 31 Jesuh naw a veia cit lü, a kut üng kaih lü, a mthawh la mhnat naw khya se, acun la a jah khinak.
32 Mü lam khawkyak käna, am phetki he avan la khawyai he naw a jah awmnak avan he cun Jesuha veia ami jah lawpüi. 33 Mlüh üngka khyang avan mkawt maa ngcun lawki he. 34 Jesuh naw natnak ahmäi hmäia phäha am phetki he jah m’yai be lü khawyai he a jah ksät. Khawyai he naw ani cun ami ksinga phäha ani naw ä a jah ngthuheisak.
Jesuh Kalilea Ngthu pyenki
(Lk 4:42-44)
35 Ngawi lam khaw am a thaih phat üng, Jesuh tho law lü im ceh ta lü, anghinaka hmüna cit lü, va ktaiyüki. 36 Cunsepi Sihmon la a püi he cun Jesuh sui khai hea citki he. 37 Acunüng, ami hmuh law üng, “Khyang avan naw ning suihüki he ni,” ami ti.
38 Cunsepi, Jesuh naw, “Ahina pipei ngnam hea pi, ngthu ka pyen khaia mi cit khai, acun vaia ni kei ka law,” a ti.
39 Mt 4:23; 9:35Acukba, Jesuh cun Kalile khaw avan üng cit hü lü, Sinakok hea ngthu pyen hü lü, khawyai he pi jah ksätki.
Jesuh naw Khyang mat a M’yai
(Mt 8:1-4; Lk 5:12-16)
40 Mnehkse mnehki khyang mat Jesuha veia law lü, a mkhuk ngdäng lü, “Na hlüei üng ta, na na ngcimcaihsak theiki ni,” ti lü, a nghuinak.
41 Jesuh naw m'yeneinak‡m'yeneinak avang üng mlungsonak tia ng'yuki. am a kut sängki naw hnet lü, “Ä, hlüei veng, ngcima,” a ti. 42 Acukba a pyen la angxita mnehkse cun khyük se, ani cun ngcimcai law beki. 43 Acunüng Jesuh naw ksükki naw a tüih be. 44 Lev 14:1-32Acukba a pyen käna, “U am icapi ä na mtheh vai, cit lü, ktaiyü am na va ngtengei kyusak vai, acunüng Mosi naw a jah mtheha kba, na ngcimcainak ami msingnak vaia ngkengnak va pawha,” ti lü a tüih be.
45 Cunsepi, acuna khyang naw cit lü acuna mawng cun avan üng va sang hü se, Jesuh angdanga mlüh k’uma am lut thei lü anghinaka awmki. Acuia, khyang pung akce kce üngka he naw ami ceh si.
*1:1 Pamhnama Capa tia avang üng am ami yuk si.
1:2 Mal 3:1
1:3 Hesa 40:3 (LXX)
†1:4 Johan khawkhyawng khawa ngdang law lü, baptican jah pe law lü, jah mtheimthang law lü ft ti cun avang üng Johan khawkhyawng khawa ngdang law lü, jah mtheimthang law lü tia ng'yuki.
1:6 2Sang 1:8
1:11 Gen 22:2; Sal 2:7; Hesa 42:1; Mt 3:17; 12:18; Mk 9:7; Lk 3:22
1:15 Mt 3:2
1:22 Mt 7:28,29
1:39 Mt 4:23; 9:35
‡1:41 m'yeneinak avang üng mlungsonak tia ng'yuki.
1:44 Lev 14:1-32