1 Ipũ mera Jesucristo ĩgʉ yarãre masicʉ̃ iirare were gojabeogʉ iiaa. Mari Pagʉ Goãmʉpʉ irire weredoregʉ apipʉ Jesucristore. Ĩgʉ yarãre ĩgʉ pohro majarãre masicʉ̃ iidoregʉ apipʉ. Eropigʉ pʉhrʉ waburire marire masicʉ̃ iidoregʉ apipʉ Jesucristore. Eropigʉ Jesucristo marire eropa masicʉ̃ iibu ĩgʉ anyure obeodigʉ árĩmi yʉre Ñure irire weredoregʉ. 2 Eropigʉ yʉhʉ Ñu baja ĩamʉhtabʉ Goãmʉ ĩgʉ dohpa iiburire. Goãmʉ ĩgʉ wereniguiri sãre peeabʉ. Eropigʉ árĩpehreri yʉ ĩarare yʉ peerare were gojabeogʉ iiaa. Jesucristo ĩgʉ basi ta diaye arĩrare were gojabeogʉ iiaa.

3 Ipũ mera pʉhrʉgue dohpa waburire were gojagʉ iiaa. Merogã dʉhyaro iiaa iri árĩpehrero eropa waboro. Eropirã árĩpehrerã ipũre buherã, yʉ wererire õaro yʉhrirã õaro mucubirirã árĩrãcoma.

4 Yʉhʉ Ñu mʉare siete cururi majarãre Jesu yarãre Asia yeba majarãre gojabeoa. Goãmʉ ĩgʉ mahiri mera mʉare õadorea. Eropirã ĩgʉ itamuri mera õaro árĩque mʉa. Ĩgʉ negohraguere eropa árĩniguidigʉ árĩñumi. Dohpague sãre eropa ta árĩniguimi. Pʉhrʉgue sãre eropa ta árĩniguigʉcumi. Goãmʉ ĩgʉ opʉ doaro core Espíritu Santo ãhrimi. Siete suburi maja turari árĩpehreri opagʉ ãhrimi. Ĩgʉ mera sãre yʉ mʉare õadorea daja. 5 Cristo ĩgʉ mahiri mera mʉare õadorea daja. Ĩgʉ Cristo Goãmʉ yare gʉyaro mariro weregʉ ãhrimi. Eropigʉ ĩgʉ sĩridigʉ ĩgʉ masa mʉriadigʉ ne dipaturi sĩrisome ĩgʉ. Ĩgʉ yarã waborore masa mʉriamʉhtadigʉ ãhrimi. Eropigʉ i yeba majarã árĩpehrerã oparã tauro opʉ ãhrimi ĩgʉ. Marire mahigʉ ĩgʉ di cóãra mera mari ñeri iirare cóãdi árĩmi ĩgʉ. 6 Eropa cóãgʉ marire oparã wamorãre wacʉ̃ iidigʉ árĩmi ĩgʉ. Eropigʉ marire pahia masare Goãmʉre serẽbasarã wamorã sãre wacʉ̃ iidigʉ árĩmi. Eropigʉ Goãmʉ mari Pagʉ yare iimorãre wacʉ̃ iidigʉ árĩmi ĩgʉ eropa sĩrigʉ. Ĩgʉ eropa iidigʉre õaro werenigui umupeoro gahmea árĩpehrerinʉri. Árĩpehrerã tauro opʉ eropa árĩniguimi ĩgʉ. Eropa ta árĩporo.

7 Õaro pee masi coreque mʉa. Imica cururi weca dijarigʉcumi Cristo. Ĩgʉ eropa aricʉ̃ ĩarãcoma árĩpehrerã. Ĩgʉre crusague pabia wejẽnirã mʉra sã ĩarãcoma. Eropirã ĩgʉ aricʉ̃ ĩarã i yeba majarã árĩpehreri cururi majarã orerãcoma güirã. Eropa ta árĩporo.

8 Õpa arĩmi mari Opʉ Goãmʉ: “Yʉhʉ árĩpehrerire ĩhacũnugudigʉ ãhraa. Eropigʉ árĩpehrerire pehrecʉ̃ iibu ãhraa, arĩmi. Iribojegue sãre eropa árĩniguimʉribʉ. Dohpague sãre eropa ãhraa. Pʉhrʉgue sãre árĩgʉra,” arĩmi Goãmʉ.

9 Yʉhʉ Ñu mʉa acaweregʉ Jesu yagʉ ãhraa. Eropigʉ mʉa iro dopa ta yʉ sã Jesu ya árĩburire yʉ iira dipuwaja ñero taribʉ. Eropigʉ mʉa iro dopa ta yʉre erã ñero iiquerecʉ̃ ĩgʉ itamuri mera Jesure cóãbiribʉ. Mari yujuro mera ĩgʉ Opʉ árĩro majarã árĩmorã ãhraa. Yaha yeba majarã erã cóãdigʉ árĩgʉ Patmo waĩcʉri nʉgʉrogue ãhraa. Goãmʉ yare Jesucristo ĩgʉ werera sãre gajirãre yʉ wereri dipuwaja õgue erã cóãbeodigʉ ãhraa. 10 Ohõ yujunʉ soorinʉ árĩcʉ̃ Espíritu Santo yʉre quẽrogue ĩhmuami. Ĩgʉ eropa ĩhmucʉ̃ yʉ pʉrʉpʉpʉ bʉrigã wereniguiri bʉsʉro dopa carabʉ. Corneta turaro bʉsʉro dopa eropa ta bʉsʉro carabʉ ĩgʉ wereniguicʉ̃. 11 Õpa arĩgʉ carami yʉ peecʉ̃:

—Yʉhʉ árĩpehrerire ĩhacũnugudigʉ ãhraa. Eropigʉ yʉhʉ árĩpehrerire pehrecʉ̃ iibu ãhraa. Dohpague mʉ ĩaburire gojaripũgue goja aĩque. Mʉ eropa goja aĩra pʉhrʉ siete cururi majarãre Goãmʉ yarãre obeoque iripũre. Erã siete cururi majarã Asia yeba árĩri macari majarã ãhrima. Eropigʉ Efeso majarãre, Esmirna majarãre, Pérgamo majarãre, Tiatira majarãre, Sardis majarãre, Filadelfia majarãre, Laodicea majarãre mʉ ĩaburire gojabeoque, arĩgʉ carami yʉre.

12 Ĩgʉ eroparĩcʉ̃ peegʉ majinʉgajabʉ yʉre wereniguigʉre ĩabu. Eropa majinʉgajagʉ siete sihãgori yucʉre erã duhpeora yucʉre oro mera erã iira yucʉre ĩhabʉ. 13 Iri yucʉ watope masʉ iro dopa bejagʉre ĩhabʉ yʉhʉ. Ĩgʉ yoari suhriro sañagʉ ãhrami. Ĩgʉ guburigue dijimerejabʉ ĩgʉ suhriro. Eropigʉ oro mera erã iira gasiro mera ĩgʉ coretihbire tʉãdiudigʉ ãhrami. 14 Eropiro ĩgʉ poari yaji poari iro dopa boreabʉ. Ĩgʉ cuiri peame porã iro dopa goseabʉ. 15 Ĩgʉ guburi bronce waĩcʉri come timura come iro dopa gosesiriabʉ. Eropiro ĩgʉ wereniguiri baja ʉtã dipabu iro dopa bʉsʉro carabʉ. 16 Ĩgʉ mojoto diaye maja mojotopʉ siete necã opámi. Eropiro ĩgʉ disirore ñoserimiji pepʉri usirimiji cuñuami. Eropiro abe ʉmʉ majagʉ ĩgʉ cuimijuro dopa ĩgʉ diapo turaro gosesiriami.

17 Eropigʉ ĩgʉre ĩagʉ ʉca waha ĩgʉ guburi pohro mehmerejabʉ sĩrigʉ iro dopa. Yʉ eropa mehmerejacʉ̃ ĩagʉ ĩgʉ, ĩgʉ mojoto diayepʉ mera yʉre duhpeo õpa arãmi:

—Ʉcabita. Yʉ árĩpehrerire ĩhacũnugudigʉ ãhraa. Eropigʉ árĩpehrerire pehrecʉ̃ iibu ãhraa. 18 Ojocariniguigʉ ãhraa yʉhʉ. Sĩridigʉ árĩribʉ. Dohpaguere ĩaque. Árĩpehrerinʉri eropa ojocariniguicãa yʉhʉ. Sĩridi dipaturi masagʉ dipaturi masare sĩribiricʉ̃ iimasia yʉhʉ. Eropigʉ masare peamegue wabiricʉ̃ iigʉ ãhraa yʉhʉ. 19 Eropigʉ dohpague mʉ ĩarare gojaque. Pʉhrʉgue eropa waboro sãre ĩagʉ gojaque. 20 Oã siete necãre yʉ mojoto diayepʉ oparãre weregʉra mʉre. Eropigʉ siete sihãgori yucʉre erã duhpeora yucʉ oro yucʉ sãre weregʉra. Yʉ õpa arĩ wererire iribojegue majarãre ne werebirimʉribʉ. Õpa ãhraa iri: Siete necã siete cururi majarã yaharã oparã árĩrã iro dopa ãhrima. Eropiro siete sihãgori yucʉre erã duhpeora yucʉ siete cururi majarã yaharã iro dopa ãhrima, arãmi yʉre Jesucristo.