1 Goxı̨ Nǫ̀htsı̨ gha ełexè eghàlats'eedaa ts'ı̨ı̨lı̨ı̨ sìı Nǫ̀htsı̨ wesǫnıwǫ k'ètł'ǫ̀ naxıts'ǫ̀ awede-le, naxèts'edıì naxıghǫnàdats'eetì. 2 Nǫ̀htsı̨ ededı̨ dıı hadı,

3 T'asìı wı̨ı̨zìı t'à dǫnì tsį̀ts'ehwhı ha ts'ı̨ı̨wǫ-le, hanì-ı̨dè godı nezı̨ı̨ gha eghàlats'eedaa sìı wets'ıhɂǫ̀ t'asìı nezı̨-le t'à dǫ gok'e nìdahogeeɂà ha-le. 4 Hanìkò t'asìı hazǫǫ̀ ghàlats'eeda weghàà Nǫ̀htsı̨ xàè wecheekeè ats'ı̨ı̨t'ee sìı dǫ gık'èezǫ ha: dànì ts'èwhı̨į̀ dats'ı̨ı̨ɂa t'à, dànì goxè hoìla łǫ t'à, dànì gogha dìì agot'į̀ t'à, dànì goxè hoejı̨ k'ehokw'o t'à; 5 gokwǫ̀ǫyaà-gogehɂı̨ t'à, dǫ-danìı̨laa-kǫ̀ nègogı̨ı̨le t'à, gots'ıhɂǫ̀ dǫ xè nàdahoowo hogehtsı̨ t'à; la nàtso ghàlats'eeda t'à, łǫ-eht'aà to ts'ete-le eyıts'ǫ dets'eèhdì t'à; 6 dànì degaı k'ę̀ę̀ ts'eedaa, Nǫ̀htsı̨ yatıì nıts'eedìı, dǫ xè ts'èwhı̨į̀ hots'èhɂǫǫ xè etegets'eèɂı̨ı̨; dànì Yedàyeh Nezı̨ı̨ k'ę̀ę̀ ts'eedaa eyıts'ǫ dànì hotıì dǫ ghǫnets'eètǫǫ; 7 dǫ ts'ǫ̀ ehkw'ı gots'edee t'à, eyıts'ǫ dànì Nǫ̀htsı̨ wedahxà eghàlats'ı̨ı̨dàa t'à; nàowo ehkw'ıı wet'à ełets'egǫ lanì nàgòts'ehnèe eyıts'ǫ gots'ı̨hts'ǫ wet'à-ats'et'ı̨ı̨; 8 dǫ goghǫ nezı̨į̀ agedıı hanì-le-ı̨dè gok'adageedèe, goghǫ nezı̨į̀ agedıı hanì-le-ı̨dè goghǫ nezı̨į̀ agedı-le; godzeè t'à ehkw'ı gots'ede hanìkò dǫ mǫ̀hdaa eghǫyaeɂàa-dǫǫ̀ ats'ı̨ı̨t'e gògedı; 9 dǫ gok'ègeezǫ kò gok'ègeezǫ-le lanì gots'ǫ̀ nageɂa; ełaàts'ede ha welì lanì hanìkò ı̨łaà ts'eeda hǫt'e; nàgoakwa hanìkò ełaàts'ı̨ı̨dè-le, 10 dats'ı̨ı̨ɂà hanìkò t'aats'ǫǫ̀ sìts'eèt'ı̨; etets'eèt'ı̨ hanìkò dǫ łǫ ahxeè lagets'į̀į̀là; t'asìı wı̨ı̨zìı gots'ǫ-le hanìkò t'asìı hazǫǫ̀ gots'ǫ hǫt'e. Eyı hazǫǫ̀ weghàà xàè Nǫ̀htsı̨ wecheekeè ats'ı̨ı̨t'ee sìı dǫ gık'èezǫ ha.

11 Naxı̨ Corınth got'ı̨į̀ yàahłı̨ı̨ sìı edèdats'eedı-le xè naxıts'ǫ̀ gots'ı̨ı̨de hǫt'e, eyıts'ǫ godzeè t'à naxıts'ǫ̀ nezı̨į̀ ats'ı̨ı̨wǫ hǫt'e. 12 Godzeè t'à t'aats'ǫǫ̀ naxıghǫnets'eètǫ hǫt'e, hanìkò naxı̨ sìı goghǫnıahtǫ gha edèdaahdı. 13 Seza laaht'e lanì dıı hanaxèehsı̨ ha: Goxı̨ naxıghǫnets'eètǫ xèht'eè goghǫnıahtǫ ha dehwhǫ, gots'ǫ̀ naxıdzeè nechà aahłe.

14 Dǫ gıgha ehkw'ı-ahodı-le sìı gıxè ı̨łè laaht'e-le. Dǫ ehkw'ı geedaa eyıts'ǫ dǫ nàowołı̨ı̨ k'ę̀ę̀ geedaa sìı ełexègı̨ı̨ht'e nıìle. Dzęh eyıts'ǫ togoòtł'òo sìı ełèht'eè nıìle. 15 Zezì-Krı eyıts'ǫ wehłı̨ı̨ sìı ełek'ę̀ę̀ agı̨ı̨wǫ nıìle. Dǫ wegha ehkw'ı-ahodıı eyıts'ǫ dǫ wegha ehkw'ı-ahodı-le sìı ełègı̨ı̨ht'e hǫı̨lı̨ nıìle. 16 Nǫ̀htsı̨kǫ̀-gocho eyıts'ǫ nǫ̀htsı̨ hòèlı̨ı̨ wets'ǫ yahtıı-kǫ̀ sìı ełek'ę̀ę̀ agı̨ı̨wǫ nıìle. Goxı̨ sìı Nǫ̀htsı̨ edaa wekǫ̀ lats'ı̨ı̨t'e hǫt'e. Nǫ̀htsı̨ dıı hadı ı̨lè,