1 Įłàà Nǫ̀htsı̨ Dzęę̀ k'e Zezì, Pharısee ı̨łè dǫ wet'àaɂàa gha wııtà xè shètı̨ ha yekǫ̀ nàhtła. Ekǫ gogà wheda ekò hotıì gıxoehdı. 2 Dǫ ı̨łè wekw'ǫǫ̀ hazǫǫ̀ į̀ghà Zezì ts'ǫ̀ ehkw'ıeht'į̀ wheda. 3 Pharısee gı̨ı̨lı̨ı̨ eyıts'ǫ Nǫ̀htsı̨-yatıì-k'ègedìı-dǫǫ̀ goxè geèhkw'e. Zezì dagoehke, “Moses wenàowoò k'ę̀ę̀, asį̀į̀ Nǫ̀htsı̨ Dzęę̀ k'e dǫ k'aàt'ıì ats'ele ha dìì-le?” gòhdı. 4 Hanìkò t'asagıìhdı-le. Eyıt'à Zezì dǫ eyaelı̨ı̨ k'e daèhdì gà k'aàt'ıì ayį̀į̀là eyıts'ǫ nayeèhɂà.

5 Eyı tł'axǫǫ̀ gots'ǫ̀ hadı, “Edahxǫ Nǫ̀htsı̨ Dzęę̀ k'e naxıza hanì-le-ı̨dè naxıtłı̨tsoa tı k'è tekw'o nı̨dè, ekòet'ıì tekàahtè ha-le nì?” gòhdı. 6 Hagòhdı t'à agııdì whìle.

7 Dǫ gokàgehɂàa sìı eyı nègı̨ı̨de ekò ı̨daà dǫ wet'àaɂàa gha daèhchı̨ whelaa sìı k'e nègı̨ı̨de. Zezì goghàeda t'à dıı hadıì goxè godo: 8 “Nàsı̨deè gha nekàgehɂà nı̨dè dǫ wet'àaɂàa gha daèhchı̨ whelaa sìı k'e wheęda-le, dǫ nenahk'e wet'àaɂà eyı nììtła ha tahkò. 9 Hagòjà nı̨dè dǫ naxıkayaı̨htıı sìı nets'ǫ̀ dıı hadı ha, ‘Dıı dǫ nedaèhchı̨į̀ k'e wedà,’ nèhdı nı̨dè edeghǫ į̀į̀zhanelı̨ ha. Dǫ wet'àaɂà-le gha gòɂǫǫ sìı ekǫ wheędaà anegele ha. 10 Ekò nekàgehɂà nı̨dè ı̨dè gòɂǫǫ sìı ekǫ wheęda. Nàsı̨ ts'ǫ̀ k'àowo nììtła nı̨dè nets'ǫ̀ dıı hadı ha, ‘Seàgı̨ą, ı̨daà daèhchı̨ nezı̨ı̨ k'e wheęda,’ nèhdı ha. Hanì-ı̨dè dǫ hazǫǫ̀ goyìı geèhkw'ee sìı dǫ wet'àaɂàa anet'e negı̨ı̨hwhǫ ha. 11 Dǫ wet'àaɂàa edeewǫǫ sìı į̀į̀zhaelı̨į̀ awedle ha, eyıts'ǫ amìı k'èeweèt'ı̨ k'ę̀ę̀ edaa sìı wet'àaɂà awedle ha,” Zezì hadıì dǫ xè godo.

12 Eyı tł'axǫǫ̀ Zezì Pharısee wekǫ̀ agǫ̀ht'ee sìı ts'ǫ̀ hadı, “Nekǫ̀ dǫ shègezhe ha nı̨dè neàgı̨ą, nechı, nèot'ı̨ eyıts'ǫ dǫ ahxee gı̨ı̨lı̨ı̨ sìı gıkàɂı̨hɂà-le. Hagèneelà nı̨dè ededı̨ ek'èt'à nekàgehɂà ha, eyıts'ǫ ek'èt'à neghǫ̀geedı ha. 13 Hanìkò nàsı̨ hoı̨htsı̨ nı̨dè dǫ etegeèt'ı̨ı̨, dǫ k'egedè-le, dǫ gıdaà goìlee, dǫ hanıı gıkàı̨hɂà. 14 Hanejà nı̨dè nexè sìghà agode ha. Ek'èt'à neghǫ̀geedì ha dìì kò nǫǫde dzęę̀ k'e dǫ ehkw'ı geedaa sìı nagìdà nı̨dè ek'èt'à nets'àɂeedì ha hǫt'e,” Zezì yèhdı.

15 Dǫ ı̨łè yexè whedaa sìı hadı yıìkw'o ekò Zezì ts'ǫ̀ hadı, “Nǫ̀htsı̨ Wenàowoò k'ę̀ę̀ hòɂǫ nı̨dè dǫ wexè nàsı̨ hòèlı̨ı̨ sìı wexè sìghà ha hǫt'e,” yèhdı.

16 Eyıt'à Zezì dıı hadıì goxè godo, “Dǫ ı̨łè nàsı̨deè whehtsı̨ t'à dǫ łǫ gokayaı̨htı. 17 Nàsı̨ hołè ha nìkw'o ekò dǫ goxè shègezhe ha sìı edecheekeè gots'ǫ̀ yeèhɂà, ‘Jǫ nàahdè, hòt'a nàsı̨ gha sınìhòt'ǫ,’ gòhdı.

18 “Hanìkò hazǫǫ̀ ełèht'eè nàsı̨ nàgedè ha dìì gedı. Dǫ ı̨łè hadı, ‘Dıìhk'ǫ̀ą dèè nàgoèhdì. Ekǫ weghàehda ha t'à nàsı̨ nàhtła ha dìì,’ hadı.

19 “Eyıts'ǫ k'achı̨ dǫ ı̨łè hadı, ‘Dıìhk'ǫ̀ą ejıe hoònǫ nàehdì. Asį̀į̀ k'egedlı ha dìì-le geèhdzà ha t'à nàsı̨ nàhtła ha dìì,’ hadı.

20 “K'achı̨ ı̨łaà dǫ ı̨łè hadı, ‘Dıìhk'ǫ̀ą honìehdza, eyıt'à nàsı̨ nàhtła ha dìì,’ hadı.

21 “Dǫ wecheekeè nǫ̀ǫtła ekò dǫ dàgedıı sìı hazǫǫ̀ edets'ǫ k'àowo ts'ǫ̀ hadı. Eyıt'à k'àowo sıì ìch'è, edecheekeè ts'ǫ̀ hadı, ‘Įwhąą̀ kǫ̀ta tı̨lı gòlaa gots'ǫ dǫ-teèt'ı̨ı̨, dǫ k'egedè-le eyıts'ǫ dǫ gıdaà goìlee sìı jǫ nègı̨ı̨wa,’ yèhdı.

22 “Wecheekeè nǫ̀ǫtła ekò hadı, ‘K'àowo, ayìı dàsį̀ı̨dıı sìı hòt'a hahłà, hanìkò ı̨łaà gòɂǫ,’ yèhdı.

23 “Eyıt'à k'àowo edecheekeè ts'ǫ̀ hadı, ‘Yeè ekìı-ka tı̨lı nıɂàa gots'ǫ dǫ t'alàa-sìı jǫ goyagııdè agı̨ı̨le, sekǫ̀ dǫ dagoòɂǫ ha dehwhǫ. 24 Ehkw'ı anaxèehsı̨, dǫ t'akwełǫ̀ǫ̀ gıkàgòhdìı sìı ı̨łè kò senàsı̨į̀ gıwàhodı ha-le,’ yèhdı,” Zezì hadıì goxè godo.

25 Ekìıyeè k'e dǫ łǫ Zezì xè k'egedè. Dǫ hazǫǫ̀ ts'ǫ̀ hadı, 26 “Amìı sets'ǫ̀ at'ı̨ı̨ sìı edetà, edemǫ, edets'èkeè, edeza, edechı eyıts'ǫ ededè wegha gıdę ha hǫt'e. Ededı̨ kò edeghǫ nànıwo ha-le. Dǫ hade ha dìì sìı secheekeè elı̨ ha dìì. 27 Amìı edechı̨et'aà sek'èè nayatı̨-le sìı secheekeè elı̨ ha dìì.

28 “Dǫ kǫ̀ danı̨ı̨dèe gohtsı̨ ha nıwǫ nı̨dè t'akwełǫ̀ǫ̀ kǫ̀ dànìı̨htìı sìı yesǫǫ̀mbaà naehtà ha-le nì? Kǫ̀ ghǫ nǫǫt'e ha asį̀į̀ sǫǫ̀mba deghàà whehła? 29 Kǫ̀ yetł'a nèyı̨ı̨tǫ tł'axǫǫ̀ kǫ̀ ghǫ nǫǫt'e ha dìì nı̨dè dǫ gıghàedaa sìı gıghaedlò ha. 30 Dıı hagedı ha, ‘Eyı dǫ kǫ̀ gohtsı̨ xèhoį̀hwho, hanìkò yeghǫ nǫǫt'e ha dìì,’ gedı ha.

31 “K'àowocho ı̨łè, k'àowocho eyıì-le xè ełegegǫ ha nı̨dè asį̀į̀ t'akwełǫ̀ǫ̀ yedaànıwo ha? Ededı̨ dǫ hoònǫ-lemì wets'ǫ, ekò k'àowocho eyıì-le sìı dǫ naènǫ-lemì wets'ǫ, asį̀į̀ hoehnè ha dìì-le? 32 Ededı̨ hoehnè ha-le yek'èezǫ nı̨dè k'àowocho eyıì-le ı̨łaà wets'ǫ̀ nıwà et'ıì edecheekeè yets'ǫ̀ yeehɂà ha. Yexè ts'èwhı̨į̀ hohtsı̨ gha yexè sıìgole ha. 33 Eyı lanì, t'asìı hazǫǫ̀ naxıgha wedę lenǫsıı secheekeè aahłı̨ ha dìì.

34 “Dewa sìı nezı̨ hǫt'e, hanìkò dewa łedì-le ajà nı̨dè dànì k'achı̨ łedì anajà lì? 35 Eyı dewa łedì-le sìı t'asìı gha nezı̨ nıìle t'à xàahtł'ì.

“Amìı wedzıì gǫ̀hłı̨ı̨ sìı eèhkw'ǫ welè,” Zezì gòhdı.