10
Sèot'ı̨ı̨, Israel got'ı̨į̀ edaxàgeedè gha sedzeè nànııtì, eyı gha gıgha yahtı hǫt'e. Gıghǫ dıı haehsı̨ ha: Ededzeè t'à Nǫ̀htsı̨ wınì k'ę̀ę̀ eghàlageeda ha gı̨ı̨wǫ. Nǫ̀htsı̨ gha hòtł'ò eghàlageeda kò Nǫ̀htsı̨ wenàowoò deghàà k'ègeezǫ-le. Dànì Nǫ̀htsı̨ ehkw'ı agohɂį̀ı̨ sìı gık'èezǫ-le, hanìkò edek'ę̀ę̀ ehkw'ıì agede ha gı̨ı̨wǫ. Eyı ts'ıhɂǫ̀ Nǫ̀htsı̨ wek'ę̀ę̀ ehkw'ı ats'edee nàowoò k'èagı̨ı̨t'e-le. Zezì-Krı Moses wenàowoò deghàà yeghàlaı̨dà hǫt'e. Hajà t'à dǫ gıgha ehkw'ı-ahodıı sìı ehkw'ıì agede ha.
Eyı nàowo wet'à ts'eedaa t'à ehkw'ı ats'et'ı̨ı̨ sìı Moses yeghǫ ı̨ı̨tł'è ı̨lè, “Dǫ eyı nàowo hazǫǫ̀ yeghàlaeda nı̨dè, yek'èxa eda ha hǫt'e,” hadı ı̨lè. Hanìkò gogha ehkw'ı-ahodı t'à ehkw'ı agòìdlà nı̨dè, dıı hats'edı ha: “ ‘Amìı ı̨dòo yak'e ts'ǫ̀ ade ha, (Zezì-Krı hodàts'eechı ha t'à)?’ naxıdzeè yìı haahdı-le,” edèts'edı ha. Eyıts'ǫ dıı hats'edı ha: “ ‘Amìı ı̨zhıì gǫǫwà dèè yìı gǫǫ̀ɂàa ts'ǫ̀ ade ha, (Zezì-Krı k'achı̨ naìdà ats'ele gha)?’ haahdı-le,” edèts'edı ha. Hanìkò Nǫ̀htsı̨ Nı̨htł'è k'e dıı hanì dek'eèhtł'è: “Nǫ̀htsı̨ hòt'a yatı naxıghàehɂǫ ı̨lè. Eyı yatı sìı naxıwà yìı wheɂǫ, eyıts'ǫ naxıdzeè yìı wheɂǫ,” dek'eèhtł'è. Eyı yatı gogha ehkw'ı-ahodıı sìı weghǫ gots'edeè ats'edı, eyıts'ǫ wet'à hoghànaxets'eehtǫ. Naxıwà t'à, “Zezì gots'ǫ̀ K'àowo hǫt'e,” haahdı nı̨dè eyıts'ǫ Nǫ̀htsı̨ naìdà ayį̀į̀làa sìı naxıdzeè t'à naxıgha ehkw'ı-ahodı nı̨dè, edaxànaxeetè ha hǫt'e. 10 Naxıdzeè t'à Nǫ̀htsı̨ naxıgha ehkw'ı adı nı̨dè, ehkw'ı anaxedle ha hǫt'e, eyıts'ǫ naxıwà t'à “Segha ehkw'ı-ahodı,” dahdı nı̨dè Nǫ̀htsı̨ edaxànaxeehtè ha hǫt'e. 11 Nǫ̀htsı̨ Nı̨htł'è k'e dıı hanì dek'eèhtł'è, “Amìı wegha ehkw'ı-ahodıı sìı ayìı danaèhɂı̨ı̨ sìı weghǫ̀t'à ha hǫt'e,” dek'eèhtł'è. 12 Israel got'ı̨į̀ eyıts'ǫ dǫ eyıì-le xàɂaa sìı Nǫ̀htsı̨ eładı̨ gots'ǫ̀ eghàlaeda nıìle. Dǫ hazǫǫ̀ ełèht'eè gots'ǫ̀ K'àowo elı̨ hǫt'e, eyıts'ǫ dǫ hazǫǫ̀ weghǫ gınì nàtsoo sìı deɂǫ̀ǫ̀ gıxè sìghà hòɂǫ agohɂį̀. 13 Dıı hanì dek'eèhtł'è, “Dǫ hazǫǫ̀ gots'ǫ̀ K'àowo ghǫ gınì nàtsoo sìı edaxàgeedè ha hǫt'e,” dek'eèhtł'è.
14 Hanìkò gıgha ehkw'ı-ahodı-le nı̨dè, dànì weghǫ gınì nàtso ha welì? Eyıts'ǫ gots'ǫ̀ K'àowo ghǫ egıìkw'o-le nı̨dè dànì gıgha ehkw'ı-ahodı welì? Eyıts'ǫ wegodıì t'à dǫ gots'ǫ̀ goı̨de-le nı̨dè dànì egeèhkw'ǫ welì? 15 Eyıts'ǫ gots'ǫ̀ K'àowo dǫ goı̨hɂà-le nı̨dè, dànì wegodıì nezı̨ı̨ t'à gots'ǫ̀ gogede welì? Dıı hanì dek'eèhtł'è: “Dǫ godı nezı̨ı̨ gots'ǫ̀ nìı̨ɂǫǫ sìı weghǫ sıì goınà hǫt'e!” dek'eèhtł'è.
16 Hanìkò Israel got'ı̨į̀ hazǫǫ̀ godı nezı̨ı̨ gıgha ehkw'ı-ahodı nıìle. Nakwenàoɂǫǫ Isaıah dıı hadı ı̨lè, “Sets'ǫ̀ K'àowo, amìı goyatıì gıgha ehkw'ı-ahodı?” hadı, dek'eèhtł'è. 17 Eyıt'à godı nezı̨ı̨ ts'eèhkw'ǫ nı̨dè wet'à gogha ehkw'ı-ahodı ats'et'į̀, eyıts'ǫ Zezì-Krı wegodıì nezı̨ı̨ ghǫ gogede t'à dǫ yatı egıìkw'o hǫt'e. 18 Eyıt'à Israel got'ı̨į̀ godı nezı̨ı̨ egıìkw'o nì? Hęɂę, godı nezı̨ı̨ egıìkw'o ı̨lè. Eyı ghǫ dıı hanì dek'eèhtł'è,
“Dıı nèk'e dǫ hazǫǫ̀ ts'ǫ̀ agejà t'à, eyı godı nezı̨ı̨ t'à dǫ xè gogedo ı̨lè. Nıwàa nèk'e dǫ ts'ǫ̀ godı nezı̨ı̨ nègı̨ı̨ɂǫ ı̨lè,” dek'eèhtł'è.
19 Eyıts'ǫ Israel got'ı̨į̀ godı nezı̨ı̨ gınıedì-le nì? Hęɂę, godı nezı̨ı̨ gınıedì ı̨lè. Moses t'akwełǫ̀ǫ̀ yeghǫ dıı hadı ı̨lè,
“Naxı̨ Israel got'ı̨į̀ aaht'ee sìı dǫ t'asìı gı̨ı̨lı̨-le sìı gıghǫ ts'oxoahdıì anaxehłe ha. Dǫ Nǫ̀htsı̨ wenàowoò k'ègeezǫ-le sìı gıghǫ naxık'èch'a anaxehłe ha,” hadı, dek'eèhtł'è.
20 Eyıts'ǫ nakwenàoɂǫǫ Isaıah eyı ghǫ edèdaedı-le xè dıı hadıì xàyaı̨htı,
“Dǫ sehagı̨ı̨wǫ-le sìı segogį̀į̀hɂǫǫ̀ agèhłà, eyıts'ǫ dǫ seghǫ dageehke-le sìı sek'ègeezǫǫ̀ agèhłà,” hadı, dek'eèhtł'è.
21 Hanìkò Israel got'ı̨į̀ goghǫ dıı hadı,
“Dǫ sek'èagı̨ı̨t'e-le eyıts'ǫ sek'èch'a eghàlageedaa sìı t'aats'ǫǫ̀ sılà gıts'ǫ̀ aahwhǫ,” dek'eèhtł'è.