2 PITA
Pita ok mega derewa
1
Ne Saimon Pita God nao mega ayamase tainawa amba Iesu Keriso watu enamot mega apanewa da, ok ma enan enuiangin. Ame God ge wat inakam nuga Ayopewa Iesu Keriso inak tamanagaet ame anu tumasitoni gapan kakae guragut mega nu waratoni mini e warayana nagirewa.
God wat aipakam ge nonup mega garaetawa ame aigap aigap di ene aiwandan, iwa e Mamanua God amba Iesu Keriso e asigiap di ta kakayaseana menan.
God nunan wa om enunen
God aroewa gapan, nu wan dim dim men inak nuga menan anu guritoni ame nuniwan, ap nunini gapan tumap waninet God nao mega ta aninampen, ap menan wan dim dim ma tambutoni iwa nu me asigip taton, Iesu oya oyae den kakae guragut megawa gapan nunan venanu wan. Negin ma miniwa gapan wa agiat mega kakaewa ame yan kakae guragut mega aigap iragenawa nunen. Ap nunini gapan piup ma anut mega koewa one ya ta koeam nimaneta. Ame gapan God imua anuini mini nu imunu wat entanep.
Iwa mame menan ta ta kakayat tan anu tumat ega gapan guegue ega kakaewa tobot tan. Amba ap tane gapan aigap sia anut tobot tan. Amba ap tane aigap sia ginap menawaet ya wa tane ae anu guran. Ap tane aigap sia aro tan inak ega Iesu menan wat kaimagamen amba aigap sia imuya ega God inap wat entanep. Ap tane aigap sia tatae gwani Keriso yaua gapan baiganamu taiana umap waran tan, amba aigap sia imuya waenapan munan anu guriana waran ginap use intum den tan. Ap guegue kakae guragut mame potayap kai ware wat agoat imaepi gapan e Ayop Iesu Keriso anu kakayasiwania gapan tavewa iai. Go orup da da guegue mame iravi potayap ya wandepiwa me yangut ya ta kakayasiwandata, ap gapan me yamewa boraseni mini amba den me koewa mega namua taiwandiniwa gaset bigi wareni imua sia borasen.
10 Ap menan tatan gwanin, kin kin tan ae yon kakayasen, ap gapan e gaset God om enue venaya di wan, waenapan ewamon, amba e guegue mame iravi di tanewa, e onana da ya geai. 11 Ap tane gapan, e atonuya aigap iragen anu waupaep Ayop nuga Iesu Keriso wat inakam nimaniniwa ame tunano toemu mega posewa unugai.
God nop oit mega tavewa namu yawane nagirewa
12 Nop mame tavewa e gaseget asigip ta kakayasean, ap gapan kaimakaet di amuyan yoniwanin, go ne ago tae darine enuen di ta angingat anuivin. 13 Menan ne anuingina kakaewa, ne piupa kasiga wanik angina gapan ago enap darine enuen taet anuivin. 14 Nop mame waingina iwa bop nega wamewa konintu taiwan, ame Ayop nuga Iesu Keriso aroga wadianegen. 15 Ap menan ne epara taingan ep, wa ewaep amba bop ta angepenawa, gatawan guegue nega mame gapan anuiwaniampen.
16 Amba Ayop nuga Iesu Keriso aro amun megawa ge sia tauepi oisewa wadiaintoni ame gutut nop monamon anune waine nagirewa mini ya wadiaeton, go Iesu oya oya mega ganasewa baware yamanup yawatoni ame oisewa wadiaivin. 17 Iwa God otua Iesu yaua ao ware den oya oya mega waneni wamewa nu ap mepe den waineton amba nop da kimani oya oyae den anega tauen, “Ma ne Otun iragenawa, imuna wat kakayasen, me inap ne imuna ae bigaren.” 18 Nu Iesu den tanat virip tunupewa dot anetoni gapan nop mame taueni nu nuk den anuton.
19 Nop mame tauen anutoni gapan, nu God nop mega ame watagaet God oise waiwanumune nagirewa ae seane, tavewa ame ase yamanup yawaton amba e imuya upan sean nop mame menan ae anu kakayasen. Ap gapan sisip arewa dun yagiren wandini mini yagit aisiwanian, amba woup pogagaewa men enugusin buanae orewa dotouini mini Keriso woup menan bumagayap dotoueta. 20 Aigap iragenawa, e ae anu kakayasen, watagaet God nop mega waiwanumune nagirewa, God nop mega enoga yawan seane go yaunewa mu muk aro muga gapan ya anu warane gapan seane iwa 21 God nop mega namumup oniwandini enoga yawan waiwanumune ame muk anuine gapan ya anu waiwanumun. Go God Guewa Woup Seni ame waenapan wadiam oniwandini gapan di yawan waiwanumun.