AROGAMENI
Iesu Keriso Dion arogameni noa
1
Ok ma Iesu Keriso wat arogameni noa. God nop mame Iesu wanen me ago mega nagirewa dim da konintu tauepi ewamopen menan. Wam da Keriso anea mega da nao mega apanewa Dion inap watu enen nop mame wat arogamepen wadien. Menan God Dion inap me nop mega amba Iesu Keriso oit megawa wat arogameni ame Dion wan dim dim iravi yave anuni oisewa wadianen.
Waenapan da da nop oit mame anupi aton anuin iwa evi tauepi noa mame namu batnak anupi menan. Anupi nagire den aton anuin amba anu tapi nagirewa den aton anuin iwa wam konintu taiwan.
Dion gaun megawa
Apan Dion Iesu dugup mega nagirewa nani yamu dere at Eisia wanumone gaun inamup anega watu enen,
God wataget iragen endi den wandiniwa amba evi tauepiwa garaet wat aipakam imaep baigan mega enep. Ayop watarewa namup guewa kakaewa nani yamu dere, ame Guewa Woup Seniwa di, wanumene den gaun inayap waiwanum. Iesu Keriso Mamewa oisewa negin tamana wadianeni apanewa gaun inayap waiwan. Me bop nagirewa nimakamup namu inakae sia yon wanden. Piup gapan namu yoyo taine nagirewa mu ayop mugawa me di.
Me nunan anu guriwandini gapan me boeni deniwa gapan koewa nuga vetanen. Nu Mamewa God nao mega tapen men God pirisi mega nagirewa dianen menan waenapan kwayup tamopen aroewa nunen. Iesu Keriso me oya oya ge aro amun mega usenagaet wande aiwandan, wam wam pot pot yaua ao warinain. Ame umap. Ao yawan irikup potap oniwan waenapan at at iravi itaya enune nagirewa den yawain. Mu Iesu yavepi menan waenapan piup at at iragi bagu sisi anu irip turup wain. E, ap anega di venaseta.
Ayop nuga God aigap iragenawa anega wan, “Ne wam ibariwa amba wam verisi apanewa.” Me wataget iragen endi den wandiniwa amba evi tauepi apanewa. Me Ayop God, aro aigap iragena apanewa.
Dion bet ine Iesu yaven
Ne Dion e dugup ega daitonawa. Nu Iesu den intum tatoni gapan God toemu mega gapan entaneneni menan ugu vegaek bagu sisi anu tanivin, Iesu menan kaimake taton yaentuk mantuk wanin anivin. Ne God nop megawa amba Iesu oit megawa, ame God arogameni noa, waenapan opata wadidiamuingina menan upi waranegen puiman topaneniwa at yaua Patmos gapan bat nimanegene iwa ne nop ame sia ya wapen menan. 10 Pura bawarewa wamewa gapan, God Guewa imuna potana waren. Nop baware da pum ununkewa mini garinap anega anun, 11 “Dim dim yawawa ame iravi ok se amba Iesu dugup mega nagirewa nani yamu dere at ugup ugup wanumene inamup watu en. Waenapan ameme pa muga yaumua Epesas ge Simona ge Pogamam ge Tayataira ge Sadis ge Piladelopia ge Leodasia.” Nop ap anega tauen.
12 Da inanap wani yawapen men yamu entanen. Dun kaime gwayayame yananagaet den nani yamu dere yoniwanumune yawamon. 13 Dun yaumakamup apan da mini yonen yawan. Wanup mega pomponu nononga pusip tauen berit mega gwayayame yananagaet den toganep panen. 14 Iwa i gume ame pomponugaet irikup umap. Yamewa oma merao yagiriwandini mini. 15 Pusiwa gwat bangae ganasewa umap amba nop mega tapan baware ununkewa umap. 16 Naniwa nutup gapan buanae nani yamu dere tamen. Nonokap kereba yamu yamu wani warane ame tauen. Gine namu wam ianupe warini ananewa mini ganase wan.
17 Apan ameme yawana gapan ne namup seke tan bop mini geanegen. Amba me naniwa nutup aiganap bare anega wadianegen, “Tap ya anu. Ma ne wam ibariwa amba wam verisiwa apanewa. 18 Ne wanik iram apanewa. Wataget bonigasen go endi yawanek ne wainge angingain sia ya bonigatain. Waenapan borit wapi o ya borit wapi amunewa ne inanap wandia. Borit waine arewa ayopewa ne. 19 Endi ma yaviana amba dim da evi venasepi yawawa iravi ok se. 20 Nanina nutup gapan buanae nani yamu dere taman amba dun kaime gwayayame den yananagaet nani yamu dere yawaana ame iwa muga gungunua endi wadiagain. Buanae nani yamu dere ameme ne dugup nega nagirewa nani yamu dere kwayupe taine anea mugawa. Dun kaime den nani yamu dere yonane ameme dugup nega nagirewa.”