1 शमौन पतरस आरू छे, जो ईशु मसीह क दास आरू प्रेरित छे,

उन मानसे क नाव जिन्होने हामरा यहोवा–भगवान आरू उध्दारकरता

ईशु मसीह की न्यायपन द्वारा हामरे समान मोंगलो विश्वास हासिल कर्‍या छे।

2 यहोवा–भगवान की आरू हामरा पोरबु की उवख क द्वारा फोकटन दया आरू शांती तुमू मा बहुतायत छे बढ़ती जाय।

3 काहकि ओकी ईश्वरीय शक्ति ने सब काही जो जीवन आरू भक्ति छे सम्बन्ध राखतो छे, हामु तीनी की उवखाय क द्वारा दिदा छे, जो हामु आपसी ही महिमा आरू सद्गुण क लारे बुलाया छे। 4 जेका द्वारा त्यो हामु मोंगलो आरू घोणा ही मोटी प्रतिज्ञा देदी छे: ताकि इन्दरे लारे तुमू उना भ्रष्टचार छुड़ीन, जो संसार मा बुरी लालोच छे होयती छे, ईश्वरीय स्वभाव क साजलीया होय जावु। 5 इनी कारण तुमू सब प्रकार क यत्न करीन आपसा विश्वास पर सद्गुण, आरू सद्गुण पर ज्ञान क जुडू। 6 आरू समझ पर संयम, आरू संयम पर धीरज, धीरज आरू भक्ति। 7 आरू भक्ति पर भाईचारे की प्रेम आरू भाईचारे की प्रेम आरू मोंग बड़ावता जावु। 8 काहकि यदि यी वात तुमू मा वर्तमान रये आरू बड़ावता जाय तो तुमू हामरा पोरबु ईशु मसीह की उवख मा निकम्मी आरू निष्फल नी हुयने देसे। 9 काहकि जिनामा यी वात नी, वो आँधवो छे आरू धुधवो देखतो छे, आरू आपने पछव पाप छे धुवीन चुखो हुयने क भूल बठ्या छे।

10 इनीये कारण हे भाईस, आपने बुलाय जाने, आरू त्योन करता जाने क सिध्द करने क भली भाति यन्त करता जावु, काहकि यदि ओसो करसे तो कदी ठुकर नी खाय। 11 वरना इनीये रीति छे तुमू हामरा पोरबु आरू उध्दारकरता ईशु मसीह क अमरकाय राज मा मोटो विजुत क साथे भरायने करने देखछे।

12 एरकरीन यद्यपि तुमू यो वात जानता होय, आरू जो सच्चाई वचन तुमू मिव्या छे उनमा बन रयता होय, तव हाव तुमू इन वात की याद आपाड़ने क सर्वदा तीयार रोवछे। 13 हाव यो आपने करता न्यायी समझता छे कि जव तक हाव इनीये डेरा मा छे, तव तक तुमू याद आपी आपीन उभारता रोवछे। 14 काहकि यो जानता छे कि मारा डेरा क नाखीन जाने क टेहाव शीघ्र आवनेवाळा छे, जोसो कि हामरा पोरबु ईशु मसीह ने मखे पर प्रगट कर्‍या छे। 15 एरकरीन हाव ओसो यत्न करसे कि मारो कूच करने क बाद तुमू इन सब बात क सर्वदा स्मरण कर सकु।

16 काहकि जव हामु ने तुमू आपसा पोरबु ईशु मसीह की शक्ति क आरू आवनो क खबर दिदा हुता, तो वो चालाक छे बनावली होयी काहनी क गती नी हुता वरना हामु ने आप ही ओका प्रताप क देख्या हुता। 17 ✡मत्ती 17:1-5; मरकुस 9:2-7; लूका 9:28-35काहकि जव त्यो यहोवा–भगवान बास छे विजुत आरू महिमा देखी आरू उना प्रतापमय महिमा मा छे यो वाणी आवी, “यो मारो मोंगावु पोर्‍य छे, जिनासे हाव खुश छे।” 18 तव हामु ओका साथे चुखलो बयड़ा पर हुता आरू सोरगदूत छे योही वाणी आवती सोमवी।

19 हामरे साथे जो भविष्यवक्ता क वचन छे, वो इनीये घटना छे दृढ़ ठराय। तुमू यो वारलो करता होय जो यो समझीन ओको पर ध्यान करता होय कि वो एक दिया छे, जो आंधारा स्थान मा ओको टेहाव तक प्रकाश देता रयता छे जव तक कि पौ नी फाटे आरू भोर क तारा तुमरे दिल मा नी चमक उठे। 20 पर पेहल यो जान लेय कि चुखलो शास्त्र की काही भी भविष्यव्दाणी काही क आपने ही विचार धार क आधार पर निकवती नी होती। 21 काहकि काही भी भविष्यव्दाणी मानुस की मरजी छे किही नी होयी, पर भक्त जन चुखलो आत्मा क द्वारा जुए देवाड़े जाईन यहोवा–भगवान की आरू छे बुलता हुता।