1 अतरान करीन बाद पौलुस एथेंस न छुड़ीन कुरिन्थस मा आश। 2 आरू वाँ अक्विला नावन एक यहूदि मिव्यो, जेरो जनम पुन्तुस मा हुयो होतो; आरू आपसी बायर प्रिस्किल्लान साथे इतालिया छे हाल ही मा आश हुता, काहकि क्लौदियुस ने आखा यहूदि याक रोम छे निकवी जानेन हुकुम आपी होती, अतरान करीन वो तींदरा याहा गयो। 3 आरू तेरा आरू तीन्दरो व्यापार होतो; अतरान करीन वो इन्दरे साथे रया, आरू वो काम करने लाग्या, आरू हिन्डरो काम तम्बू बनावनेन थो। 4 आरू वो हर आरामन दाहड़े आराधना घर मा वाद विवाद करीन यहूदि आरू यूनानीन भी समझाडता हुता।

5 जव सीलास आरू तीमुथियुस मकिदुनिया छे आयो, ती पौलुस वचन सोमवावने धुन मा लागाड़ीन यहूदि याक गवा देता हुता कि ईशु ही मसीह छे। 6 पुन जव वो विरोध आरू निंदा करने लाग्या, ती त्यो आपसा छिंदरा ढाकीन तीनुछे कयो, “तुमरो लुहूय यो तुमरी मुनका पर रये! हाव निर्दोष छे। हिमी छे हाव गैरयहुदीन साथे जाईस।” 7 आरू वाँ सी चालीन वो तीतुस यूस्तुस नावन यहोवा–भगवानन एक भक्तन घर मा आयो, ओको घर आराधना घर सी लाग्या होया हुता। 8 तव आराधना घर सरदार क्रिस्पुस ने सब घराना सहावत पोरबु पर विश्वास कर्‍या; आरू घोणा छे आरू घना सवटा कुरिन्थियो वावा ने समवीन विश्वास कर्‍या आरू बपतिस्मा लेदु।

9 आरू पोरबु ने रात मा दर्शनन लारे पौलुस छे कयो मा डर बाकीन कवतु जा ने आरू हुगो मा रहवे; 10 काहकि हाव तारे साथ छे; आरू काहनुस तार पर चढ़ाई कयी तारू घाटु नी करे काहकि इना गाँव मा मारा घण सवटा मानसे छे। 11 अतरान करीन त्यो तीना चाँ यहोवा–भगवान वचन सिखतु डेढ़ साल तक रयु।

12 “तव गल्‍लियो अखाया देशन राज्यपाल हुता अळतेन यहूदि मानसे एका करीन पौलुस पर चढ़ आश आरू उको नियाव नी गाद्दीन सामने लावीन कवेने लागिया” 13 चाँ मानसक काजे समजाड़े की यहोवा–भगवान भक्ति असी रीति सी करतलो ची व्यवस्था क उलटी सी।

14 तव पौलुस बुलने वावा हुता तव गल्‍लियो ने यहूदि यो सी कयो ए यहूदि यो अळतेन काह्‍य अन्याय या दुष्‍टता वात होयती, तव होयत वारलो की हाव तुमरी सुनतो। 15 “बाकीन अळतेन इन वातन–वातन बुलन आरू नाव आरू व्यवस्थान बाराम मा तुमो जानो काहकि हाव इन वातन न्यायी बन्ने चाहतलू।” 16 आरू त्यो उको नियावन गाद्दी सामने से निकाव दिदा। 17 अळतेन सब मानसी आराधना घर सरदार सोस्‍थिनेस काजे धरने ने नियावन गाद्दी सामने दिदा। बाकीन गल्‍लियो ने इनान वातन कायनी चिंता करीया।

18 बाकीन पौलुस लेके दाहड़ा तक वा रयु अळतेन भाईस्‍योक वाट लागाड़ीन किंख्रिया हाव इनानकरता मुन्‍क बुड़ायु काहकि त्यो मानता मान्यु आरू जाहजम पर सीरिया भुनी चाल दिदा आरू तेरे साथमा प्रिस्किल्ला आरू अक्विला हुता। 19 आरू त्यो इफिसुस मा पुगिन तीनक त्या छुड़ियो आरू त्योत आराधना घर मा जायन यहूदि यो छे झगड़ा करने लागु। 20 जव हेकोने उकासे रावन्या की, “हामरे साथे आरू काहय दाहाड़े रया।” ते त्यो स्वीकार नी कर्‍या; 21 पुन यो कयीन त्यो विदा होयु “यहोवा–भगवान चाह ते हाव तुमरे जु पछु आवीस।” तव इफिसुस पर रईन ढोंड्या खुलीन चाल देदु;

22 आरू कैसरिया मा उतरीन (यरूशलेम) गयु आरू मंडळी काजे नमस्कार करीन अन्तकिया मा आयु। 23 अळी काहय दाहाड़ा रहवीन त्या वा सी जात रीया, आरू एक तरफ सी गलातिया आरू फ्रूगिया मा सब चेला काजे बाताड़्या करता फिरीया।

24 अपुल्लोस नावन एक यहूदि जेरो जनम अलेक्जेन्द्रिया मा होया हुता, जु विद्वान मानसे हुता आरू चुखलो शास्त्र काजे वारलो जानतो होतो इफिसुस मा आया। 25 चाँ पोरबुन वाटन शिक्षा सापड़ी होती, आरू मन लागाड़ ़ीन ईशुन विषय मा ठीक–ठीक सोमवतु आरू सिखाड़तु हतु, पुन चाँ सिर्फ यहुन्ना न बपतिस्मा वात जानता हता। 26 चाँ आराधना घर मा निडर होईन बुलने लाग्या, पर प्रिस्किल्ला आरू अक्विला ओको वात सोमवीन, ओका सी आपने या ली गया आरू यहोवा–भगवानन वाट ओका सी आरू भी स्पष्ट रीति सी कयो। 27 आरू जव त्यो छाचो कर्‍या कि पार उतरीन अखाया काजे जाए ते भाईस्यो उका हिमत आपीन चेला काजे लिख्या कि चाँ उकासे वारला मिवाया, आरू त्यो पुगीन चाँ तिनुक मानसोन मोटली मदत कर्‍या जा फुकट दया कारण विश्वास कर्‍या हुता। 28 अपुल्लोस आपसी शक्ति आरू कौशलन साथे यहूदि या आखे भातिये शास्त्र रईन प्रमाण दिदा की इसुत मसीह सी।