एस्तेर नी किताब
एस्तेर नी किताब
परिचय
एस्तेर न परिचय एस्तेर न किपात देखाडे की कोसा फारस मा बोंदी बोनाय लेदा इसराएली मानसोक एक ओसा वेरी सी वाचाड़्या जु हेनुक नास कोरने कोरीन जावसादी बोनाय रोया होता। पुन एस्तेर मा भोगवान नावोन काहीन नी देखाड़लो होय, पुन यो वार देखाड़े की भोगवान हेनुक हेनु आखाक मारनेन जावसादी गोथु वाचाड़्यु। कुदु नी जानतो कि एस्तेर न किपात कुन लिखलो छे। वापरेली हिबरु भासान रीते, घोना जानकार राय आपे की एस्तेर न किपात आंदार 400 साल इसुन आवने गोथो पेहेल लिखायली होती।
एस्तेरोन किपात मा होयली वात देखाड़े की योहुदी पुरीम तिहवार काजे कोसा वावे। हामान नावोन एक ओमालेकी न योहुदी मानसो काजे नास कोरनेन जावसादी बोनायु। इसराएली आरु ओमालेकी तोत्यार गोथा वेरी होता जोत्यार गोथा इसराएली रेवटाया गोथा होईन तिना मुलुक मा पुगला होता जेरु वायदु परमेश्वर हेनुसी कोरलु होतु (निर्गमन 17:8-16)। आंदास तेने टेमे जोत्यार हामान योहुदीयाक नास कोरनेन जावसादी बोनाय रोयु होतु, एस्तेर, जी एक योहुदी होती, फारस न रानी बोन गोय। आपसा सोगायता मोर्दके न राय सी, एस्तेर हामान न युजना काजे रुकने मा जीक गोय। योहुदीयान लारे आपसा वेरी पोर जीक हात कोरनेन ओळतेन (एस्तेर 9:20-22), मोर्दके हेनुक इनी जीकोन खुशी कोरने कोरीन कोयु। इने रीते योहुदीया पुरीम तिहवार वावने सुरु कोरला।
एस्तेर न रुपरेखा:
1. अध्याय 1 आरु 2 मा देखाड़े की एस्तेर फारस न रानी कोसी बोनी।
2. अध्याय 3 गोथो 7 मा देखाड़े की कोसा हामान न योहुदीया काजे नास कोरनेन युजना बोनाया आरु ओसो कोरनेन कोरता हेनुक मार देदा।
3. अध्याय 8 गोतो 10 मा देखाड़े की योहुदीया आपसा वेरी काजे कोसा हाराया आरु पुरीम तिहवार कोसा सुरु कोर्या।
1
वशती क पटरानी क पद सी उतार्यो जानो
1 क्षयर्ष नावोन राजान दाहड़ा मा यी वाते हयी; यो त्यो क्षयर्ष छे, जो एक सोव वीस ने सात देशो पर, मोतलोब इथियोपिया गोथु हिन्दुसतान लोगुन राज करतो हुतो। 2 राजा क्षयर्ष क राजोन राजधानी शुशन गढ़ हुतो, त्या राजगादी पोर बोठीन राज कोर रयो हुतो। 3 होंया हुयो आपसा राज क तीसरा साल मा आपसा आखा मुखी आरु कामकरन्या क भोज आप्यो। फारस आरु मादै क सेनापति आरु प्रान्त-प्रान्त क प्रधान आरु हाकिम ओका अगळ आय गुया। 4 भोज करवानेन तिहवार छोव महिना तक वाळीयो। आरु पाहंतीरियान को हेका राज वाड़ान धन आरु हेकी राज करनेन शान देखड़तो रियो। 5 ओतरा दाहड़ा क वितने पोर राजा न काय नाना काय मोटा उना आखा क वी ज शुशन नावोन राजगढ़ मा एकठा हुया हुता, राजभवन क वारी मा आँगना मा सात दाहड़ा लगुन भोज आप्यो। 6 होंया क परदा श्वेत आरु निळा सुत क हुता, आरु सन आरु जामन्या रोंगोन। बठनेन पाटला सी चाँदी क छल्ला मा, संगमरमर क बोनला फोरस्या पोर धरी हुयी हतली। 7 उना भोज मा राजा क योग्य दाखमधु भाति-भातिन रीते क सोना क टाहरा मा डालीन राजा क उदारता सी घनात भेळ पावतला। 8 पीनो ते कायदा ओनसारे हयतो हुतो, जोसो चाहे तोसो पाळतला हुता; काहकी राजा न ते आपसा भवन क आखा भण्डारियो क हुकुम आपता हुता, की ज पाहनतरीया जसा चाहे ओका भेळ तोसाज वेवहार कोरनो। 9 रानी वशती न वी राजा क्षयर्ष क भवन मा बायरा क भोज आप्या। 10 सातवे दाहड़े, जोत्यार राजा क मोन दाखमधु मा मगन हुतो, तोत्यार हुयो महुमान, बिजता, हर्बोन, बिगता, अबगता, जेतेर आरु कर्कस नावोन सातु गोतराड़ा क ज क्षयर्ष राजा क अगळ सेवा चाखरी कोर्या कोरता हुता, हुकुम, 11 की रानी वशती क राजमुकुट धारण कोर्यो हुयो राजा क अगळ ली आवु; जेरेसी कि देश-देश क लोगहन आरु हाकिमो पोर ओकी घाटाळो प्रगट होय जाय; काहकी हुये देखने मा घाटाळो हुतो। 12 खोजो क लारे राजा नी यी हुकुम मिळी रानी वशती न आवने सी मोना कोर्यो। एना पोर राजा मोटा रीसवाईन जळने लाग्यो। 13 तोत्यार राजा न टेमे-टेमे क भेद जाननेवाळा पंडितो सी पुछ्यो (राजा ते नीति आरु नियाव क आखा गियानियो सी असोज कोरतो हुतो। 14 ओका पास कर्शना, शेतार, अदमाता, तर्शीश, मेरेस, मर्सना, आरु ममुकान नावोन फारस, आरु मादै क सात प्रधान हुता, ज राजा क दर्शन कोरता आरु राज मा खास-खास पदो पोर नेवाड़ कोर्यो गया हुता।) 15 राजा न पुछ्या, “रानी वशती न राजा क्षयर्ष नु हेर लारे आपाड़ला हुकुम क तुड़नो कोर्या, ती नीतिन ओनसारे ओका भेळ काय कोर्यो जाय?” 16 तोत्यार ममुकान न राजा आरु हाकिमो नु हाजरी मा जपाप आप्यो, “रानी वशती न ज भुंडो काम कर्यो छे, हुयो नी केवल राजा सी बाखुन आखा हाकिमो सी आरु उना आखा देशों क लोगहन सी वी ज राजा क्षयर्ष क आखा प्रान्तो मा रोहे छे। 17 काहकी रानी क एना काम नु चर्चा आखा बायरा मा होयसे आरु जोत्यार यो कोयो जासे, ‘राजा क्षयर्ष न रानी वशती क आपसे अगळ ली आवने नु हुकुम आप्यो पुन हुयी नी आवी,’ ती हुये वी आपसा-आपसा घोरवाळा क तुच्छ जानने लागसे। 18 आजुन दाहड़े फारस आरु मादी हाकिमो नु बायरा जे रानी नु यी वात सोमळायो छे ती हुये वी राजा क आखा हाकिमो सी असोज कोहने लागसे; एने रीते घनात घाड़ाय आरु रीस पोयदा होयसे। 19 कदाम राजा क स्वीकार होय, ती यो हुकुम निकाळे, आरु फारसियो आरु मादीयो क कानुन मा लिखी वी जाय, जेरेसी कदाम बोदल नी सके, की रानी वशती राजा क्षयर्ष क अगळ ओळी कोदी आवने नी पावे, आरु राजा पटरानी क पद कुदा दिसरा क आप देये तेरेसी वारु होय। 20 अत: जोत्यार राजा नु यो हुकुम ओका आखा राज मा सोमळायो जासे, ती आखा बायरा, आपसा-आपसा घरवाळा क चाहे गरीब होय एने अमीर, आदरमान कोरती रोहसे।” 21 यी वात राजा आरु हाकिमो क पसन्द आवी आरु राजा न ममुकान नु सम्मति मान लेदो आरु आपसा राज मा, 22 अर्थात् होरीक राजोन क आकड़ा मा आरु होरीक जाति नु बुली मा चिट्ठियाँ मुकळ्या, की आखा मानसे आपसा-आपसा घर मा होक चालाड़े, आरु आपसी जाति नु बुली बुल्या कोरे।