1 हेनको चुखा करने क ज काम तुखे हेनुक कोरनो छे की हुये मार लिय याजक क काम कोरे हुये ये छे: एक चुखला गिदल्यो आरु दुय चुखला गाडरा लेनो, 2 आरु अखमीरी रुटा, आरु तेल सी चुपड़ायला हांवदान अखमीर वाळा पुरी, आरु तेल सी चुपेड़ली अखमीरी पपड़ियाँ वी लेनो। ये आखा गंहवन हांवदान बनवाड़जो। 3 एनुक एक खिल्‌ला मा मेकिन हेनु खिल्‌ला क हेनु बछड़ा आरु हेनु दुयु गाडरा भेळ धोडे ली आवजो। 4 ओळतेन हारुन आरु हेरा पुर्या क मिलापवाळा तम्बु क झोपला क धोड़ ली आविन पानी सी उँगवावजु। 5 ती हेनु लुगड़ा क लीन हारुन क झोगलो आरु एपोद क कुरतो पेहरावजु, आरु एपोद आरु छातिये बांदनीयो, आरु एपोद क बनावलो पाटो वी बाधनु; 6 आरु उना मुनका पोर पागड़ी मेलजी, आरु पागड़ी पर चुखला मुकुट क मेकजो। 7 तव चुखला तेल लीन उका मुनका पर नांखीन उको अभिषेक कोरनो।

8 ओळतेन हेरा पोर्यान को पास मा लावीन हेनको चोगला पेहरावजी, 9 आरु उका मतलब की हारुन आरु उना पोर्यान को कड़ीया मा बाँधजी आरु हेनका मुनका पर टुपीया मेलजी; जिना सी पुजारान पद पर जलेमको हेनको हक रये। इनीये रीतिये सी हारु आरु उना पोर्यान को रीती करजो।

10 तव बछड़ा को परमेश्वरन होजरी वाळा तम्बुन अगळ धोड़े ली आवजी। आरु हारुन आरु उना पोर्या बछड़ान मुनका पर आपसा-आपसाहात मेले, 11 तव उना बछड़ा को योहोवा भगवानन सामने मिलापवाळा तम्बुन झपला पर बली करजी, 12 आरु बछड़ान लुहुय मा सी थुड़क लीन आँगळीया सी वेदीन सींगड़ा पर लगाड़जी, आरु बाकी रयलो सब लुहुय को वेदीन पाया पर रेड़ देजी। 13 आरु जिनी चर्बी सी आतड़ीया ढाकाय रये, आरु जी जाळ काळजान ऊपर रये, हेनकोप आरु दुयु गुरदा को हेनकी चर्बीन क सात मा लीन सबन को वेदी पर धपाड़जी। 14 पुण बछड़ान मास को, आरु खाल, आरु गुबर, छावनी सी खयड़े आगठा मा धपाड़ देजी; काहकी यो पापबलि हुयसे। 15 ओळते एक गाडरो लेजी, आरु हारुन आरु उना पोर्यान गाडरान मुनका पर आपसा-आपसा हात मेले, 16 तव उना गाडरा को बलि करजी, आरु उना लुहुय लीन वेदी पर च्यारो मेर छिड़कजो। 17 आरु उना गाडरा को टुकड़ा-टुकड़ा करीन काटजी, आरु ओकी आंतड़ा आरु पाय को धुवीन उका टुकड़ा आरु मुनका साथ मा मेलजो। 18 उना पुरा गाडरा को वेदी पर धपाड़जी; त्यो ते योहोवा भगवान क लियन होमबली हुयसे; त्यो वारु गंदायन्यो वाळो आरु योहोवा भगवान क लियन हवन*29:18 हवन वारु गंदायनीयो, आरु तेल नाखीन भोगवाग जुगु होमबली। हुयसे।✡29:18 इफिसियो 5:2

19 ओळी दिसरा गाडरा को लेजी; हारुन आरु उना मुनका पर आपसा- आपसा हात मेले, 20 तव उना गाडरा को बलि करजी, आरु उना लुहुय मा सी थुड़क लीन हारुन आरु उना पोर्यान मुनका पर, आरु हेनका जेवड़ा हात आरु जेवड़ा पायन उमठा पर लगाड़जो, आरु लुहुय को वेदी पर च्यारो मेर छिड़कजो। 21 ओली वेदी परुन लुहुयय को, आरु अभिषेकन तेल को, इनु दुय मा सी थुड़क-थुड़क लीन हारुन आरु उना छिंदरा पोर वी आरु पोर्या आरु हेनका छिंदरा पर बी छिड़की देजो; तव त्यो आप-सा छिन्दरान क सात मा चुखो हुय जासे। 22 तव गाडरा को रीती वाळो जानीन उना मा सी चर्बी आरु जाडली छेमटी को, आरु जिनी चर्बी सी आतड़ीया ढाकाय रये उको, आरु काळजा पर वाळी जाळी को, आरु चर्बीन को सात मा दुयु गुरदा को, आरु जेवड़ीया कड़ीया को लेजो। 23 आरु अखमीरी रोटान टुपलो जो योहोवा भगवानन अगोळ मेकली हसे उना मा बी एक रोटो आरु तेल सी सेकायला मेदान एक पुरी आरु एक पापड़ी लीन, 24 इनु सबन को हारुन आरु उना पोर्यान को हात मा मेलीन उतारनेन भेट बनावीन योहोवा भगवान को ओगळ उतारनो जुळे। 25 तव उनी आखी चीजन कोब हेनका हातो मा सी लीन होमबली न वेदी पर धपाड़ देजो, जिना सी त्यो योहोवा भगवान को सामने वारु गंदायन्यो वाळो बनसे; त्यो ते योहोवा भगवान क लियन हवन बनसे। 26 ओळी हारुनन रीतीन जो गाडरो हुयसे ओकी छाती को लीन हालेवनेन भेट क लियन योहोवा भगवानन अगोळ हालेवजो; आरु त्यो तारो भाग बनसे।

27 आरु हारुन आरु उना पोर्यान रीतीन जो गाडरो हुयसे, उना मा सी हालेवनेन भेटवाळी छाती जो हालेवने क लियन रये, आरु उठावनेन भेटवाळा कड़ीयो जो उठायो जाय इनु दुयन को चुखो बनसे। 28 आरु ये जलोमन विधि आरु रीति पडर इसराएलीयान तरफ सी हारुन आरु उना पोर्यान भाग बने, काहकी यो उठावी जानेन भेट बनली छे; आरु यो इसराएलीन तरफ सी हेनको मेलबलिया मा सी योहोवा बगवान क लियन उठावी जानेन भेट हुयसे। 29 हारुनन जो चुखलो बछिंदरो हसे‍ त्यो उना बाद मा उना पोर्या आरु पोर्यान पोर्या आरु घण झाजा को जड़तो रये, जिना सी हेनकोत् अभिषेक हेनको नियुक्त आरु रीती करीयो जाय। 30 उना पोर्यान जो उना जागा पर जो पुजारो हुयसे, त्यो जव‍ चुखला जागा मका सेवा चाकरी करने करीन मिलापवाळा तम्बु मा पेहल आवे, तव उना छिंदरा को सात दाहड़ा तक पेहरला रये। 31 ओळी पुजारान संस्कार को जो गाडरान हयसे उको लीन हेनको मास कोय चुखला जागा मा चुड़ावजो। 32 तव हारुन उना पोर्यान को सात मा उना गाडरान मास आरु टुपला माईन रोटा, दुयन को मिलापवाळा तम्बुन झपला पर खाय। 33 जिनी चीजन सी हेनको संस्कार आरु हेनको चुखो करने करीन पछतावो करे ती उको त्या खाय, पुण पारका जातन कोय बी नी खानो जुळे, काहकी त्या चुखला रयसे। 34 कदाम संस्कार वाळा मास या रोटा मा सी थुड़क सन्दारे तक वाचाड़ रये, ती उना वाचला को नागठा मा धपाड़ देजो, त्यो खानो नी खाय; काहकी‍ त्यो चुखलो रयसे। 35 “हांव तुको जो-जो हुकुम आपलो छे, उना आखा हुकुमन अनसारे तु हारुन आरु उका पोर्यान सी करजी; आरु सात दाहड़ा तक हेनको संस्कार करतो रयजी, 36 मतलब पापबलिन एक बछड़ो पछतावा क लियन दाहड़ीन चढ़ावजी। आरु वेदी को बी पछतावो करनेन टेम पर चुखो करजी, आरु उको चुखो करने करीन उको अभिषेक करजी। 37 सा दाहड़ा तक वेदीन पछतावो करीन उको चुखो करजी आरु वेदी चुखामा चुखी बनसे; आरु जो काय उना सी छिमायसे त्यो बी चुखो हुय जासे।

38 “जो तुको वेदी पर दाहड़ीन चढावो चढ़ावनो रयसे त्यो यो छे; मतलब कि दाहड़ीन एक-एक सालन दुय गाडरान पीला। 39 एक गाडरान पीलाक ते भोळभाकाम आरु दिसरा गाडरान पीलाक सान्ती टेम पर चढ़ावजी। 40 आरु एक गाडरान पीलान को सात मा दुय लिटर तेल सी झारलो एक किलो मैदो आरु बलिन करता दुय किलो दाखमधु चढ़वनो। 41 आरु दिसरा गाडरान पीला को सान्ते टेमे चढ़ावजी, आरु उना सात मा भोळभाकान रीतिन अनसारे अन्नबलि आरु अर्घ दुयु आपजो, जिना सी कि त्यो वारु गंदायन्या वाळो आरु योहोवा भगवान क लियन हवन ठहरे। 42 तुमरी पीढ़ी सी पीढ़ी मा योहोवा भगवानन अगोळ मिलापवाळा तम्बुन झोपला पर लोगत असोत् होमबली हुया करे; यो त्यो जागो छे जिनाम तुम लोगहन सी अतरान करीन मेञळ भेट करतो रयीस कि तुमरे सी वात करीया करो। 43 हांव इसराएलीयान सी वाँत् मेळ भेट करीया करीस, आरु त्यो तम्बु म्हारा सेक सी चुखलो हुय जासे। 44 आरु हांव मिलापवाळा तम्बु आरु वेदी को चुखो करीया करीस, आरु हारुन आरु उना पोर्या को बी चुखो करीया करीस कि त्या म्हारे लिये पुजारान को काम करे। 45 आरु हांव इसराएलीयान वीच मा रया करीस, आरु हेनको योहोवा भगवान बनीस। 46 तव त्या लोगहन जान जासे कि हांव हेनको योहोवा भगवान छे, जो हेनको मिसर देश सी निकाळीन ली आयो, कि हांवत् हेनको योहोवा भगवान छे।