1 ओळतेन योहोवा न मुसा सी कोयो, “तु हेनु मानसो क जेनुक मिसर देश सी छुड़ाय लायो छे पुठी लिन हेना देश क लिजा, जेरे वाराम हांवन अब्राहम, इसहाक, आरु याकुब सी शपथ खाईन कोयो हुतो कि हांव ओक तारी ओवलियाद क आपीस। 2 आरु हांव तारे ओगळ ओगळ एक दुत क मुकलीस, आरु कनानी, एमोरी, हित्ती, परिज्जी, हिब्बी आरु यबुसी मानसो क उतवाळीयो निकाळ दिस। 3 तुमु मानसे हेना देश क जाऊ जेरेम दुध आरु मधु क धारा उहवे छे; बाखुन तुमु एक होटीया छे, एर कोरीन हांव तुमरे विच मा होईन नी चालीस, असो नी होये की हांव वाट मा तुमरो नास कोर दोम।”

4 यी बुरी खोबोर सोमळीन हुये मानसे दु;ख कोरने लाग्या; आरु काहिय आपने गहने पेहरला हुया नी रोहे। 5 एकालिय योहोवा न मुसा सी कोय देदो हुतो, “इसराएलीयो क मारो यो बुल सोमळ्यो, तुमु मानसे ते होटीया होये; काहमाइन हांव पल भर क लिय तुमरे वीच होईन चालो, ती तुमरो नास कोर नाखीस। एकालिय हेमी आपना आपना गोहना आपना पिलो सी उतार देवु की हांव जानो की तुमरे पुठी काय कोरनो चाहजे।” 6 एकालिय इसराएली होरेब*33:6 सिने पर्वत को होरेब कहते हे, सिने बोयड़ा सी लिन ओगोळ क आपना गोहना उतारला रोहे।

7 मुसा तम्बु क छावनी सी खोयड़े बाकुन नांबे उबो कोराया कोरतो हुतो, आरु ओक मिलापवाळा तम्बु कोहतो हुतो। आरु ज काई योहोवा क हेरतो हुयो हेना मिलापवाळा तमबु क पास ज छावनी क पास क छावन ई क खोयड़े हुतो, निकळ जातो हुतो। 8 जब जब मुसा तम्बु क पास जातो, तब तब आखा मानसे उठिन आपना आपसो डेरा क झोपला पोर उबा होय जाता, आरु जब लोगुन मुसा हेना तम्बु मा भोराये नी कोरतो हुतो ती लोगुन हेरे भिनी देखतु रोहता होता। 9 जब मुसा हेना तम्बु मा भोराये कोरतो हुतो, तब वादळा क खाम्बा उतरीन क तम्बु क झोपला पोर उबोरह जातो हुतो, आरु योहोवा मुसा सी वात कोरने लागतो हुतो। 10 आरु आखा मानसे जोत्यार वादळा क खाम्बा क तम्बु क झोपला देखता हुता, तोत्यार उठिन आपना आपना डेरा क झोपला पोर सी वाद्या कोरता हुता। 11 आरु योहोवा मुसा सी ओस कोरिन आंबा-सांबा वार कोरता हुता, जोस कोरिन कोय आपना भास्यो सी वात कोरे। आरु मुसा ते छावनी मा पोछो आत रोहतलो, बाखुन योहोसु नावोन एक जुवान, ज नुन क पुर्य आरु मुसा क सेवक हुतो, हुये तम्बु मा सी नी निकळता हुता।✡33:11 गिनती 12:8; व्यवस्थाविवरण 34:10

12 मुसा न योहोवा सी कोयो, “सोमोळ तु मार सि कोयलो छे, ‘एनु मानसो क लि चाल;’ बाखुन यो नी देखाड़्यो की तु मारे पुठी कुनिक मुकलिस। तेवी तुन कोयो छे, ‘तारो नाव मारे चित्त मा बोसलो छे, आरु तारे पोर मारी गिन क निगाह छे।’ 13 आरु हेमी काहमाइन मार पोर तारी गिनोन निगाह होय, ती मेसे आपसी गति सोमझाड़ दे, जेरेसी हांव तारो गियान पावो तोत्यर तारी गिन क निगाह मार पोर बोनली रोहे। ओळतेन यो वी धियान राखो की यी मनख्या तारी पोरजा छे।” 14 योहोवा न कोयो, “हांव आप तारे पुठी चालीस आरु तुसे आराम आपीस।” 15 हुयो हेरेसी कोयो, “काहमाइन तु आपसु नी चाले, ती हामु याँसी ओगा मा लि जाय। 16 यो कोसो जाने पाये की तारे गिनोन क निगाह मार पोर आरु आपनी प्रजा पोर छे? काय एरेसी नी की तु आमरे पुठी पुठी चाले, जेरेसी हांव आरु तारु प्रजा क मानस ए कळ भोरिन क सब मानसो सी ओलग कोहायजे?”

17 योहोवा न मुसा सी कोयो, “हांव यो काम वी, जेरे वाराम तु कोर्‌यो छे क, कोरिस; काहकी मारी गिन क निगाह तार पोर छे, आरु तारो नाव मारे मन मा बोसलो छे, हांव तुखे नाव सी जानतु छे।” 18 मुसा न कोयो, मखे उका मोहिमा क तेज देखाड़ दे। 19 हुयो कयो, “हांव तारे ओगळ होईन चालता होईन तुसे आपनी आखी भोलाई देखाड़िस, आरु तारे ओगळ योहोवा नाव क पोरचार कोरिस; आरु जेर पोर हांव गिन कोरनो चाहो हेर पोर गिन कोरिस, आरु जेर पोर दया कोरनो चाहो तेर पोर दया कोरिस।”✡33:19 रोमियो 9:15 20 ओळतेन हुयो कोयो, “तु मारा मुख क दोरसोन नी कोय सोके; काहकी मानुस मारा मुख क दोरसोन कोरन जिवतलो नी रोय सोके।” 21 अळतेन योहोवा न कोयो, “सोमोळ, मारे पास एक जागो छे, याँ तु हेर पोर चट्टान पोर उबो होय; 22 आरु जोत्यार लोगुन मारो सेक तारे ओगळ होईन चालतो रोहे, तोत्यार लगुन हांव तुसे चट्टान क दरार मा राखुस आरु जोत्यार लोगुन हांव तारे अगळ सि होईन नी निकळी जाम तोत्यार लोगुन आपना हातो सी तुसे ढाकिन रोहजी; 23 ओळतेन हांव आपनो हात चुट लिस, तोत्यार तु मारा वासा क ते दोरसोन पाविस; बाखुन मारो मुख क दोरसोन नी मिळसे।”