19
दुखोन एक गीत
1 इसराएलोन डाहडान वाराम तु यो दुखोन गीत सोमवाड़:
2 तारी आइस एक कोसली नाहारनी हुती!
ची नाहरोन इचमा बोस्या कोरतेली आरु आपसा पीलाक जुवान नाहरोन इच मा पावतेली ने पुसतेली।
3 आपसा पीला मा सी होयी एकोक पाळी आरु
चो जुवान नाहार होय गोयो, आरु शिकार धोरनो सिक गोयो;
चो मानसोक वी शिकार कोरने लाग्यो।
4 आड़े धोड़े वावा मानसे हेरी वात सोमया,
आरु तीनाक आपसा खुंदला खाडाम फांदे पाड़्या, आरु हेरा नाकोम नाथ नाखीन मिसर देस मा ली गोया।
5 जोत्यार हेरी आइस देखी आरु वाट जुवती रोवी
तीवी तेरी होर नी भागी,
तोत्यार एक आपसो ओवी पुर्याक लीन तीनाक जुवान नाहार बोनाय देदी।
6 तोत्यार चो जुवान नाहार होईन नाहरोन विच मा चालने फिरने लाग्यो,
आरु चो वी शिकार कोरने सिक गोयो;
आरु मानसोन वी शिकार कोरने लाग्यो।
7 चु आपसा आड़े धोड़े वावा रोहनीयान घोरोक उजाड़ देदो,
आरु तिंदरा सोहोरोक उजाड़ देदो पुन गांगेरने लाग्यो
सोमवीन आखा देसोन मानसे बिकोम मारे उजड़ी गोया।
8 तोत्यार च्यारु मेरोन मानसे आपना आपना मुलुकोम तेरे जुगु जाव फांदे लागाड़ देदा,
आरु चो हेंदरा खंदला खाडाम फोस गोयो।
9 तोत्यार चे तेरा नाथ नाखीन
आरु कठघोरोम बोंद कोरीन बेबीलोनोन राजान चा ली गोया,
आरु पिंजरा मा बोंद कोर देदा,
की हेरो गांगेरनो आखा इसराएलोन बोयड़ा वावा देसोम सोमवाय नी देये।
10 तारी आइस जेरेसी तु पोयदा होयु,
चो पानी धोड़े लागलो हुतो।
भोरपुर पानी जोड़ने सी चो डाळ्या
आरु ओंगुर फोळो सी लोदायलो हुतो।
11 तेरी जाड जाडली डाळ्या,
राजान राज लाकुड़ बोनावे तोसी हुती।
ची ओतरी उची होती, की वादवाक छिम लेये।
आपसी उचाय आरु झाजला डाळ्यान कारण
हुयी वाटचाल्या ओका बोकी कोर देय।
12 पुन हेरा वेरी रीसोन मारिया हेनाक उखाय लेये,
आरु नेचा धोरती पोर नाख देय।
उगेवनीन वाहवी हेनुक सुकाड़ देये।
हेरा फोव तुड़ लेदा। हेरा जाडला डाळ्या सुक गोया, आगठाम रुखड़ु होय गोया।
13 हेमी चे जोंगोल मा, पुन उजाड़ी देसोम लागाड़ा छे।
14 हेरा डाळ्याम आगठो निकळे,
जेरेसी हेरा फोव सोर गोया आरु राजान राजोन लाकुड़ बोने ओसा हेमी काहनी वी जाडली डाळ नी रोवी।
यो दुखोन गीत छे, आरु यो दुखोन गीत बोनलो रोहसे।