1 नोव्वे सालोन दोसवे मोहनेन दोसवे दाहड़े, योहोवान यो बुल मारे यां पुग्या: 2 हे मानसोन ओवलियाद, आजुन दाहड़ु लिखिन मेक, काहकी आजुन दाहड़े बेबीलोनोन राजा योरुसालेम आवीन घेरोव कोरलो छे। 3 यी काहानी तेना घोराना सी कोव जे हुकुम नी माए। तेंदरे सी यी वात कोव।

6 कोरीन पोरबु योहोवा ओसु कोवे: हाय, तेनी खुनी सोहोर पोर! हाय तेना हान्डा पोर! तेरे किटी लागली छे आरु निकळी नी; हेरेम सी भुकरा भुकरा कोरीन निकाव लेवु, हेरे पोर चिट्ठी झुन नाखता। 7 काहकी हेना सोहोर मा कोरलो खुन हेरेम छे; हुयो तेना जागा पोर धुळी नाखीन वी नी ढाक्या, पुन उगाड़ा चाफरिया पोर मेक देदा। 8 कोरीन हांव वी हेरो लुहुय उगाड़ा चाफरीया पोर मेकलो छे, कि हुये ढांक नी सोके आरु कि बोदलो लेनेन कोरता रीस भोड़के।

9 पोरबु योहोवा ओसु कोवे: हाय हेनी खुनी सोहोर पोर! हांव वी ढीग काजे मोटो कोरीस। 10 आरु जादा लाकड़ा नाख, आकठाक जादा कोर, मास वारु चुड़े तोसे आरु मोसालु भेसोक, आरु हाड़काक धोपाड़ देवु। 11 ऐरे वाद हान्डान नोवराड़ु, आरु नोवरा हान्डाक इंगावा पोर मेकु, जेरेसी तातो होये, हेरो पीतोळ रातो होय जाय, हेरो मोयोव गोवे, आरु हेरे माहाय वावी किटी धोप जाय। 12 हांव ते घोनो कुशिश कोरीन देख लेदु, पुन हेरी किटी निकेवती नी, किटी बेस जाडी छे, होयी आकठा सी वी नी निकेवती। 13 हे योरुसालेम सोहोर तारी विटोळ मोटला पापोन छे। हांव ते तुसे चुखो कोरने चाहतेलो, पुन तु चुखी नी होयी, कोरीन जोत्यार लोगुन हांव आपसी रीस तारे पोर सी सेवी नी कोर लोम, ती लोगुन तु ओळी चुखी नी कोरी जायीस। 14 हांव योहोवात यो कोवलु छे; आरु हुयो होयसे; हांव ओसोत कोरीस, हांव तुसेक नी छुड़ो, नी तारे पोर गीन खायीस, नी पोसतायो; तारा चालचालोन आरु कामोन ओनसारे तारो नियाव कोर्‌यो जासे, पोरबु योहोवान यो बुल छे।

15 योहोवान यो वी बुल मारे यां पुग्यो: 16 हे मानसोन ओवलियाद, देख, हांव तारा डुळान मोंगावाक मारीन तारेन चा रोहीन लेनेम छे; पुन नी तु रोड़जी आरु नी आसा उहवाड़जी। 17 नांबो दोम ते लेजी, पुन हुयो सोमवायनो नी जुवे; मोरला जुगु वी विलाप नी कोरनो। मुनका पोर पागड़ी बांदली आरु पायोम खासड़ा पेहेरला रोवे; आरु नी ते आपसा हुटड़ा काजे ढाकजी नी कोलेपना जोसा रुटा खानो।

18 तोत्यार हांव सोंदारे लोगहन सी कोहीस, आरु सान्तो मारी लाड़ी मोर गोय। तोत्यार सोंदारे हांव हुकुमोन ओनसारे कोर्यु।

19 तोत्यार मानसे मार सी कोहने लाग्या, काय तु हामुक नी देखाड़े की यो जो तु कोरे, ऐरो हामरे जुगु काय मोतलोब।

20 हांव हेनुक जोपाप देदु, योहोवान यो बुल मारे यां पुग्यो: 21 तु इसराएलोन घोराना सी कोव: पोरबु योहोवा ओसु कोवे: देखु, हांव आपसा चुखला जागान जेरो गोट होयने पोर तुमु खुस होय रोया; आरु जे तुमरा डुळान मोंगावा होयला छे, आरु जेनुक तुमरे मोन गोंहाड़े, तिनाक हांव विटोळ कोरनेम छे; आरु आपसा जिनाक पुर्या-पोरायटाक तुमु होंया मेक आवला छे, चे तोलवार सी मार्या जासे। 22 जोसु हांव कोरलु छे तोसात तुमु लोगहन कोरसु; तुमु वी आपसा हुटड़ा नी ढाकसु, नी कोलेपनेन जोसा रुटा खासु। 23 तुमु मुनका पोर पागड़ी बांदला आरु पायोम खासड़ा पेहेरला रोहसु, नी तुमु रोड़सु, नी छाती ठुकसु, पुन आपसा पापन कामोम फोसला गोवता जासु आरु एक दिसरा भेनी वेला कोरता रोहसु। 24 एने रीते योहेजकेल तुमरे जुगु सोहलानी कोहायसे; जोसो हुयो कोर्‌यो, ठीक तोसात तुमु वी कोरसु। जोत्यार यो होय जाय, तोत्यार तुमु जान लेसु की हांव परमेश्वर योहोवा छे।

25 हे मानसोन ओवलियाद, काय यो छाचो नी, की जेने दाहड़े हांव हेंदरो वातड़ो घाटाळु जागु, हेंदरी सुबा, आरु खुशीन कारन आरु हेंदरा पुर्या पोरायटा जे हेंदरी सुबा, हेंदरा डुळान खुशी, आरु मोनो चाह छे, हेनुक हांव हेंदरे सी मांग लीस, 26 तेने दाहड़े जो ढासीन वाचसे, चो तारे यां आवीन तुसेक खोबोर सोमवाड़े। 27 तेने दाहड़े तारो मुय उगेड़से, आरु तु ओळी हुगु नी रोवीस पुन हेनु वाचला पुठी वात कोरीस। एने रीते तु एनु मानसो जुगु सोहलानी कोवायीस; आरु ये जान लेसे की हांव परमेश्वर योहोवा छे।