1 हामरी बांदवायीन पोच्चीसवे वोरीसोम योरुशोलेम सोहोर जुगु जानेन वाद चोवदे वोरीसोन पेहले मोहनेन दोसवे दाहड़े, योहोवान ताकोत मारेम आवी, आरु होयो मेसेक होंया पुगाड़्यो। 2 आपसा दोरसोन मा परमेश्वर मेसे इसराएलोन देसोम पुगाड़्यो आरु होया एक मोटला बोयड़ा पोर उबो कोर्‌यो, जेरे पोर दोखेवरे भेनी जोसो काहनला सोहोरो जोसो देखायतेलो। 3 जोत्यार होयो मेसे होंया ली गोयो, ती हांव काय देख्यो कि पीतोळोन जोसो आरु होतोम सोनोन बोंद आरु मापनेन वासुन लीन एक मानुस झोपलाम उबलु छे। 4 चो मानसु मारे सी कोयो, हे मानसोन ओवलियाद, आपसा डुळा सी देख, आरु आपसा कानटा सी सोमोळ: आरु जो काहिन हांव तुसे देखड़ो तेनु आखा पोर धीयान लागाड़, काहाकी तु ओतरान कोरीन यां पुगाड़्लुछे की हांव तुसे यी आखी वात देखाड़ो; आरु तु काहिन देखे जो इसराएलोन घोरानाक देखाड़े।

5 आरु देखु, भोवोनोन खोयड़े च्यारु मेर एक भितड़ो होतो, आरु तेना मानसोन हातो मा एक मापनेन वासुन होती, तेरी नांबाय ओसी छोव हात होती जे सुदा हातोन एक वेहेत गोथो जादा छे, तिना भितड़ाक जाडाय माप्या एक वासुनोन होतो, ओळी तेरी उचाय वी एक वासुनोन होती। 6 तोत्यार मानुस उगेनला झोपलाम गोयो। चो मानुस हेरा पोयड़्या पोर चोहड़ीयो आरु झोपलान देहलीक मापयो। यो एक लाकुड़ चोवड़ी होती। 7 पोहरा देन्या कोपरा वासुन भोरीन नांबा आरु वासुन भोरीन चोवड़ा होता; आरु दुय दुय कोपरान गावा पांच हातोन होता; आरु झोपलान पोयड़ी जी झोपलान ओसारेन धोड़े भोवनो भेनी होती, होयी वी वासुन भोरीन होती। 8 तोत्यार होयो झोपलान ओसारान जु भोवोनोन ओगोव होतु, मापीन एक वासुनोन होतो। 9 होयो झोपलान ओसाराक मापीन आठ हातोन होतो, आरु हेरा खांबा दुय दुय हातोन होता, आरु झोपलान ओसारा भोवनोन ओगोव होतो। 10 उगेनला झोपलान दुयो ओख्ये तीन तीन पोहरावाळान कोपरा होता जे आखा एकुत मापतीन होता, आरु दुयो ओख्येन खांबा वी एकुत मापतीन होता।

11 ओळी होये झोपलान झोपलान चोवड़ाय मापीन दोस हात होती आरु तेरे हातोन चोवड़ी होती। 12 आखा कोपरान ओगोळ एक नेचलो भितड़ो होतो। यो एक भितड़ो एक हात उचो आरु एक हात जाडो होतो। कोपरा च्यार खुट्या होता आरु होर ओख्ये सी छोव हात नांबा होता। 13 चो मानुस झोपलान एक कोपरान छोत सी दिसरा कोपरान छोत लोगुन माप्या। ये पोच्चीस हात होता। एक झोपलो दिसरा झोपला तोसोत सांबो होतो। 14 ओवी होयो तीन वीस हात खांबा माप्या, आरु आंगनो, झोपलान आड़े धोड़े, खांबे लोगुन होतो। 15 झोपलान खोयड़ेन झोपला सी लागाड़ीन हेरा माहायतेला ओसारेन ओगोळ लोगुन पोचास हातोन गावु होतु। 16 पोहरेवाळा कोपराम, आरु झोपलान माहाता च्यारु मेर, कोपरान इचमान खांबान इचमा झोळो झोळो कोरे ओसा खिड़किया होती, आरु खांबान ओसारे वी तोसीत होती; आरु झोपलान माहतेले च्यारु मेर खिड़किया होती, आरु होरीक खांबा पोर खोलेलान झाड़ गोंदलो होतो।

17 तोत्यार होयो मेसे खोयड़े आंगनाम ली गोयो, आरु हेना आंगनाम च्यारु मेर कोपरा होता, आरु एक फोरसी बोनली होती, जेनी पोर तीस कोपरा बोनला होता। 18 यी फोरसी निचला फोरसीयान झोपला सी लागली होती, आरु हेंदरी नांबायीन ओनसारे होती।

19 ओळी होयो नेचला झोपलान ओगोळ सी लीन माहायतेला आंगनाम खोयड़ेन आंगनान ओगोळ लोगुन माप्यो सोव हात होतो; होयो उगेनला आरु बोखेवरा दुयो ओख्यो ओसोत होतो।

20 तोत्यार होयो मानुस खोयड़ेन आंगनाम, जेरो मुय बोखेवरे ओख्ये छे, झोपलान नांबाय आरु चोवड़ाय माप्यो। 21 ऐरा होरिक धोड़े तीन कोपरा छे। ऐरा झोपला खांबान आरु भोरायनीया कोपरान मापती चीत होती जि पेहला झोपलान होती। झोपलान पोचास हात नांबो आरु पोच्चीस हात चोवड़ो होतो। 22 ऐरी वी खिड़किया आरु खांबान ओसारे आरु खोलेलान मापतीन उगेवने फिरीन मुयोन झोपला सारको होतो; आरु एना पोर चोहोड़नेन सात पांछिया होता; आरु हेंदरे ओगोळ ऐरो ओसारो होतो। 23 माहायतेला आंगनान बोखेवरे आरु उगेनला भेनीन दुसरा झोपलान ओगोळ झोपलो होतो आरु होयो झोपलान नांबाय माप्यो ती सोव हातोन होतो।

24 तोत्यार होयो मानुस मेसे दोखेवरे भेनी ली गोयो। हांव दोखेवराम एक झोपलो देख्यो। चो मानुस झोपला, खांबाक आरु भोरान्या कोपराक माप्यो। 25 हेरी मापती होतरीत होती जोतरी दिसरा झोपलान। खास झोपलान पोचास हात नांबो आरु पोच्चीस हात चोवड़ा होता। 26 सात पोयड़ीया एना झोपला लोगुन पुगाड़े। ऐरो भोरान्यो कोपरो माहाय होतो। होरीक धोड़े एक एक झोपलो खांबा पोर खोलेलान झाड़ गोंदलो होतो। 27 माहायतेला आंगनान दोखेवरेन एक झोपलो होतो चो मानुस दोखेवरे भेनीन एक झोपला सी दिसरे झोपलो लोगुन माप्यो। यो सोव हात चोवड़ो होतो।

28 तोत्यार होयो दोखेवरा झोपला सी होयीन मेसे माहायतेला आंगनाम ली गोयो, आरु होयो दोखेवरा झोपलान मापती होतरीन होती जोतरी दिसरा झोपलान होती। 29 दोखेवरान झोपलान कोपरा झोपलान खांबा आरु भोरायनेन कोपरान मापती होतरती होती जोतरी दिसरा झोपला होती। खिड़किया, झोपला आरु भोरान्या कोपरान च्यारु मेर होती। झोपला पोचास हात नांबा आरु पोच्चीस हात चोवड़ा होता। हेरे च्यारु मेर भोरायनेन झोपला होता। 30 भोरायने कोपरा पोच्चीस हात नांबा आरु पोचास हात चोवड़ा होता। 31 दोखेवरेन झोपलान भोरायानेन कोपरा ओगोळ खोयड़ेन आंगना भेनी होतो। ऐरा झोपला खांबा पोर खोलेलान झाड़ोन तोसो गोंदलो होतो। ऐरा पांछिया आठ पोयड़ीया होती।

32 चो मानुस मेसे उगेनले धोड़ेन माहातेला आंगनाम लायो। होयो झोपलाक माप्यो। हेरी मापती होतरीत होती जोतरी दिसरा झोपलान होती। 33 उगेनला झोपलान कोपरा, झोपला खांबा आरु भोरान्या कोपरान मापती तोतरीत होती जोतरी दिसरा झोपलान होती। झोपला आरु भोरान्या कोपरान च्यारु मेरोन खिड़किया होती। उगेनला झोपला पोचास हात नांबा आरु पोच्चीस हात चोवड़ा होता। 34 ऐरा भोरायनेन कोपरा ओगोळ खोयड़े ओख्ये होतो। होरीक धोड़े झोपला खांबा पोर खोलेलान झाड़ोन गोंदलो होतो। ऐरा पांछिया आठ पोयड़्या होती।

35 तोत्यार होयो मानुस मेसे बोखेवरा झोपला पोर लायो। होयो एनाक माप्यो। ऐरी मापती तोतरीत होती जोतरी दिसरा झोपलान होती। 36 ऐरा कोपरा, झोपला खांबा आरु भोरायनेन कोपरान। झोपलान‍ च्यारु मेर खिड़किया होता। ये पोचास हात नांबा आरु पोच्चीस हात चोवड़ा होता। 37 हेरा खांबान खोयड़ेन आंगना भेनी होतो, आरु हेनु पोर वी दुयो ओख्ये खोलेलान झाड़ोन गोंदलो होतो; आरु हेरेम चोहोड़नेन आठ पांछिया होता।

38 ओळी झोपला धोड़ेन खांबान धोड़े झोपला भेळ कोपरो होतो, जां होमनबादा धुवतेला। 39 होमबली, पापनबादा, आरु गुनाननबादान ढुरोक मारने कोरिन झोपलान ओसारे धोड़े हेरे दुयो ओख्ये दुय दुय मेज होता। 40 बोखेवरा झोपलान भोरान्या झोपला पोर, ओसारेन खोयड़े हेरा दुयो ओख्ये दुय दुय तोख्ता मेकला होता। 41 झोपलान दुयो ओख्ये च्यार च्यार तोख्ता होता, आखा मेळीन आठ तोख्ता होता, जे नबादान ढुरोक मारने कोरिन होता। 42 ओळी होमबली जुरु निसानला दोगड़ान च्यार तोख्ता होता, जे डेढ़ हात नांबा, डेढ़ हात चोवड़ा, आरु हात भोर उचा होता, हेनु पोर होमनबादा आरु मेलनबादान ढुरोक मारने कोरीन होतियार मेकतेला। 43 माहाय च्यारु मेर चोवा भोरीन आकड़ा लागला होता आरु तोख्ता पोर चोड़ावान मास मेकलो होतो।

44 माहायतेला आंगनान झोपलान खोयड़े गावनेवाळान कोपरा होता जेंदरा झोपला दोखेवरे भेनी होता; आरु उगेनला झोपला भेनी एक कोपरो होतो, तेरा झोपला बोखेवरा भेनी होतो। 45 होयो मारेसी कोयो, ये कोपरा, जेंदरा झोपला दोखेवरा भेनी छे, तेनु पुजारा जुगु छे जे भोवोन मा चाखरी कोरे, 46 आरु तेनु कोपरान झोपला बोखेवरा भेनी छे, चे तेनु पुजारा जुगु छे जे वेदीन चाखरी कोरे; ये सादोकोन ओवलियाद छे; आरु लेवीयो मा गोथा योहोवान चाखरी कोरने आगला येत हेरे धोड़े जाय।

47 होयो आंगनाक माप्यो। आंगनो च्यार खुट्यो होतो। होयो सोव हात नांबो आरु सोव हात चोवड़ो होतो। वेदी मोंदिरोन ओगोळ होती।

48 ओळी होयो मेसे भोवनोन ओसारेम ली गोयो, आरु ओसारेन दुयो ओख्ये खांबाक मापीन पांच पांच हात होतो; आरु दुयो ओख्येन झोपलान चोवड़ाय तीन तीन हात होती। 49 ओसारेन नांबाय वीस हात आरु चोवड़ाय इग्यारे हातोन होती; आरु हेरे पोर चोहोड़ने पांछिया होता; आरु दुयो ओख्ये खांबान लाटे होता।