उत्पत्ति नी किताब
उत्पत्ति नी किताब
परिचय
पुस्तक परिचय उत्पत्ति सोब्दान मोतलोब छे “सुरु होयने” आरु यो बायबोल सासतुरोन जुनला चापड़ान पेहली किपात छे। खास हिबरी वी “सुरु मा” बुलो सी सुरु होये। यो देखाड़े कि आखो काहिन कां गोतो आयो आरु खास वात यी की मानसो पुठी परमेश्वरन वेवहार कोसु सुरु होयु। आज जानकारी राखन्या जुळ तिना मानुस ने मानसोन वाराम बेस ढेरकी वात छे, जे उत्पत्ति किपात लिख्या आरु यो वी कि यो कोत्यार लिख्या होसे। थुड़ाक मानसोन माननो छे कि इनी किपात काजे 5-6 वी सोताब्दी ईसुन आवने से पेहेल, पेहला चापड़ा मा लिख्या होसे। बेबीलोन मा दिसरा मानसे एनी रितीक मान्या कोरे कि लोगाथोगी मुसा 1300 एन्ते 1400 साल ईसुन आवनेन पेहेल उत्पत्ति, पुठीत् निर्गमन, लेव्यव्यवस्ता, गिनती आरु वेस्ताविवरण लिखली होती।
उत्पत्ति मा बेस खास जानकारी छे जी ईसाय (विस्वास्या) मानसोन बायबोलोन दिसरे जागे, जुनला नियम आरु नोवला नियम दुयोक सोमेजनेम मोदोत् कोरे। यो हामुक देखाड़े कि पाप एनी दुनियाम कोसु आयु आरु मानसोक एक छुड़ावने वावु जुय रोयु होतु। एनु मानसोक वाचाड़ने कोरीन परमेश्वर विचार कोरे। ईसुन वाराम पेहली ओगवायती वात उत्पत्ति 3:15 आरु अबराहम गोथु कोवी पोर आखा मुलुकोम बोरकोत आपने कोरीन परमेश्वरन वायदा ( उत्पत्ति 12; 3) गोथो लिखलो छे।
रुपरेखा:
1. जोसो की पाठ 1 आरु 2 मा लिखलो छे, भोगवान कोळीक आरु आदम आरु होवा काजे बोनायु।
2. पाठ 3 गोथो 5 लोगुन आदोम आरु होवा, हेन्दरा पाप आरु हेन्दरी ओवलियादोन वाराम छे।
3. पाठ 6 गोथो 9 लोगुन नुह आरु ढोन्ड्या पानीन वाराम लिखलो छे।
4. ओळी उत्पत्तिन किपात पाठ 10 गोथो 11 मा लिखलो छे कि नुहान टेमे आरु ओबराहोमोन टेमोन इचमा काय होयो, जेरेम बेबीलोनोन खांबान वाराम वी छे।
5. पाठ 12 गोथो 50 ओबराहोम, हेरो पोरिवार आरु इसराएल राजोन सुरुन वाराम लिखलो छे।
6. ओबराहोम आरु हेरी धेन्यारी सारान जीवाय पाठ 12 गोथो 25 मा लिखलो छे।
7. इसहाक आरु हेरी धेन्यारी रिबकान जिवाय पाठ 21 गोथो 28 मा लिखलो छे, आरु हेन्दरी मोतोन वाराम पाठ 35 मा लिखलो छे।
8. याकुब, हेरा पुर्यान जीवाय आरु कोनान गोथा मिसर लोगुन हेन्दरो आवनो पाठ 25 गोथो 50 मा लिखलो छे।
9. पाठ, 37 गोथो 50 याकुबोन मोंगावा पुर्या युसुपोन जिवाय पोर लिखलो छे आरु हुयो मिसर मा कोसु राज कोरन्यु बोन्यु।
1
जगतन बननो
1 शुरु मा परमेश्वर सोरग आरु धरती क बनायो। 2 धरती क बनावट नी हुती आरु सुनली पड़तली हुती, आरु उन्डा जळ क उपोर आंधारो हुतो; एने परमेश्वर क आत्मा जळ क उपोर मण्डरायतो हुतो।
3 ती परमेश्वर न कयो, “विजाळो होय,” ती विजाळो होय गोयो। 4 आरु परमेश्वर न विजाळा क देख्यो कि वारु छे; आरु परमेश्वर न विजाळा क आंधारा सी ओलोग कोर्यो। 5 आरु परमेश्वर न विजाळा क दाहड़ो आरु आंधारा क रात कोयो। एने सांतो हुयो आरु ओळतेन सोंदारो हुयो। ओस कोरीन पेहलो दाहड़ो होय गोयो।
6 ओळतेन परमेश्वर कयो, पानीन वीच एक ओसो गाळो होय कि जळ दुय वाटाम होय जाय। 7 ती परमेश्वर न एक गाळो कोरीन ओका नेचा क जळ आरु ओका उपोर क ओलोग कोर्यो; आरु ओसोत होय गोयो। आरु परमेश्वर न इना गाळा क वादळो कयो। एने सान्तो हुयो ओळतेन सोंदारो हुयो। ओस कोरिन दुसरु दाहड़ु होय गोयु। 8 आरु परमेश्वर न हेका आकाश कोयो। एने सांतो हुयो ओळतेन भोर हुयो। एने रीते दुसरु दाहड़ु होयु।
तिसरु दाहड़ु सुकली कोळ आरु झाड़े
9 ओळतेन परमेश्वर न कयो, “वादळा क नेचो जळ एक जागा मा एकठो होय जाय आरु सुकली जागा देखा पोड़े,” आरु ओसोत होय गोयो ( 2 पत 3:5) 10 आरु परमेश्वर न सुकला जागाक कोळी कोयो, एने जो जळ एकठो हुयो ओको हुयो दोरिया कोयो; आरु परमेश्वर न देख्यो कि वारु छे। 11 ओळतेन परमेश्वर न कयो, “धोरती सि निळ्ळो खोड़ो, एने बिजावाळा नानला झाड़ आरु फोव आपन्या झाड़ वी जेनदरा बिजा हेना मा एक एक जाती क ओनसारे रोहे कोळी पोर उगे,” आरु होसोत हुय गोयो। (1 कुरि 15:38) 12 ओस कोरीन कोळी सि निळ्ळो खोड़ो, आरु नानला झाड़े जिनाम आपसी जाति क ओनसारे बिज रोहे, आरु फोव आपन्या झाड़ जेन्दरा बिजा एक एक क जाति क ओनसारे हेरेमा छे उगे; आरु परमेश्वर न देख्यो कि वारु छे। 13 एने सांतो हुयो ओळतेन सोंदारो हुयो। ओस कोरिन तिसरो दाहड़ो होय गोयो।
चोथो दाहड़ो दाहड़ु, चाँद आरु तारा
14 ओळतेन परमेश्वर न कयो, “दाहड़ा क रात सी अलोग करने क लिय वादळा क गाळा मा विजाळो होय; आरु ये सोहलानी, आरु खोरी टेम, आरु दाहड़ा, आरु साल क कारण होय; 15 आरु यो विजाळ्ळो वादळा क गाळा मा कोळी पोर विजाळो आपन्यो वी कोवाये,” आरु ओसोत हुय गोयो। 16 ती परमेश्वर न दुय मोटला विजाळा बोनायो; हेनामा सी मोटलो विजाळो क दिसु पोर राज कोरने क लिय, आरु नानला विजाळा क रात पोर राज कोरने क लिय बोनायो; आरु तारामन्डळीक बी बोनायो। 17 परमेश्वर न ओको वादळा क गाळा मा ओतरान कोरिन मेक्यो की हुये कोळी पोर विजाळो आपे, 18 एने दिस आरु रात पोर राज कोरे आरु विजाळा क आंधारा सि ओलोग कोरे; आरु परमेश्वर न देख्यो कि वारु छे। 19 एने सांतो हुयो ओळतेन सोंदारो हुयो। ओस कोरीन चोथो दाहड़ो हुय गोयो।
20 ओळतेन परमेश्वर न कयो, “जळ जिवतला जिवो सी बेसको भोराय जाय, आरु चिल्ला कोळी क उपोर वादळा क गाळा मा उड़े।” 21 ओतरान कोरिन परमेश्वर न जाति क मोटा जळ जिवो क आरु हेनु सब जिवतला जिवो क वी बोनायो जे चालता फिरता छे जेनासी जळ बेसका भोराय गोया आरु एक एक जाति क उड़नेवाळा चिल्ला क वी बोनायो; आरु परमेश्वर न देख्यो कि वारु छे। 22 परमेश्वर न यो कोहीन ओको बोरकोत आप्यो, “फुलो फलो, आरु दरिया क जळ मा भोयार जावु, आरु चिल्ला कोळी पोर बेसका होय जाय।” 23 एने सांतो हुयो ओळतेन सोंदारो हुयो। ओस कोरीन पाचवो दाहड़ु हुय गोयो।
24 ओळतेन परमेश्वर न कयो, “कोळी सी एक एक जाति क जिवतला जिवे, यानी घोरुन ढुरे, आरु रेंगनेवाळा जिवे, आरु कोळी क जोंगली ढुरे, जाति जातिन क ओनसारे पोयदा होये,” आरु ओसोत होय गोयो। 25 ओस कोरीन परमेश्वर न कोळी क जाती जाति क जोंगली ढुरो क आरु जाति जातिन क घोर पावन्या ढुरो क, आरु जाति जातिन क कोळी पोर सब रेंगनेवाळा जिवो क बोनायो; आरु परमेश्वर न देख्यो कि वारु छे। 26 ओळतेन परमेश्वर न कयो “हामु मानुस क आपसा रुपो क ओनसारे आपने जोसा बोनावजे; आरु हुये दोरिया क माछा, आरु वादळा क चिल्ला आरु घोरपावन्या ढुरो, आरु आखी कोळी पोर, आरु सब रेंगनेवाळा जिवो पोर जो कोळी पोर रेंगे छे, हुकुम राखे।” 27 ती परमेश्वर न मानुसक आपसा रुपो क ओनसारे बोनायो, आपसात रुपो क ओनसारे परमेश्वर न ओको पोरदा कोर्यो; नर आरु नारी कोरीन हुयो मानुस क बोनायो। (मत्ती 19:4, मर 10:6) 28 आरु परमेश्वर न हेनुक बोरकोत आप्यो; आरु हेनुक कोयो, “फुलो फलो, आरु कोळी मा भोराय जावु, आरु ओको आपसा होको मा कोर लेवु; आरु दोरीया क माछा, एने वादळा क चिल्ला, आरु कोळी पोर रेंगनेवाळा सब जिव पोर होक राखे।” 29 ओळतेन परमेश्वर न हेनु सी कोयो, “सोमळु, जोतरा बीजवाळा फोव रोहे, चे सब हांव तुमुक आपलु छे; हुये तुमरा खाने क लिय छे (14 : 2) 30 आरु जोतरा कोळी क ढुरे, आरु वादळा क चिल्ला, आरु कोळी पोर रेंगनेवाळा जिवे छे, जिनामा जिवन क जिव छे, हेनु सब क खाने क लिय हांव सब निळ्ळा निव्ळा नानला झाड़ आपलो छे,” आरु ओसोत होय गोयो। 31 ती परमेश्वर न जो काई बोनायो हुतो, सब क देख्यो, ती काय देख्यो, कि हुयो बेसको वारु छे। एने सांतो हुयो ओळतेन सोंदारो हुयो। ओस कोरीन छटवो दाहड़ो होय गोयो। (1 तीमु 4:4)