1 एनी वातो क वाद ओसो हुयो, कि मिसर क राजा क पिलानेहारे आरु खावड़ावनीया पिवड़ावनीया आपसा स्वामी क विरुद्ध गुनु कोर्या। 2 ती फिरोन न आपसा हेनु दुयो हाकिमो, यानी पिलानेहारो क डाहला, आरु पकानेहारो क डाहला पोर रिसवाईन 3 हेनुक बुजाड़िनम, अंगरक्षक क डाहला क घोर क हेना जेलखाना मा, जा युसुफ बोंद होतु, नाखाड़ देदु। 4 ती अंगरक्षक क डाहला न ओको युसुफ क हातो मा सोवंप्यो, आरु हुयो हेन्दरु सेवा चाखरी कोरने लाग्यु; एने हुये थुड़ा दाहड़ा लोगुन जेलखाना मा रोया। 5 मिसर क राजा क पिलानेहारा आरु पकानेहारा, जे जेलखाना मा बंद हुता, हेनु दुयु न एकुत रातो मा, आपसा-आपसा होनहार क ओनसारे, सोपना देख्या। 6 सोन्दारे जब युसुफ हेन्दरे पास माहाय गोयु, ती हेन्दरे पोर निगाह कोर्यु, ती काय देख्यु, की हुये घाबरायला छे। 7 ओतरान कोरिन हुये फिरोन क हेनु हाकिमो सी, जो ओका सात हेन्दरो स्वामी क घोर क जेलखाना मा होता, पुछ्‍या, “आज तुमरो मुय काहा उतरी रोयो?”

8 हुये हेनुक कोया, “हामु दुयु सोपनो देखला छे, आरु हेन्दरो फळक बताड़नेवाळो कोय नी होय।” युसुफ न हेनुसी कोयो, “सोपना क फोव कोहनो परमेश्वर क काम नी छे? मेसे आपनो आपनो सोपनो देखाड़ु।” 9 ति पिलानेहारे क डाहलो हेरो सोपनो युसुफ क यो देखाड़ने लाग्यो: हांव सोपना मा देख्यु, कि मारे ओगोळ एक अंगुर न मुरे छे; 10 आरु हेनी दाखलता मा तीन डाळ्या छे; आरु हेरेमासी ओसा मुरे लागला छे, आरु चे फुली आरु हेरा गुमछा मा अंगुर लागीन पाक गोयो। 11 आरु फिरोन क कटोरो मारा हात मा हुतो; आरु हांव हेना दाख क लीन फिरोन क कटोरा मा निफयु आरु कटोरा क फिरोन क हात मा आप्यु। 12 युसुफ न हेनासी कोयो, “एरो फोव यो छे: तीन डाळन मतलब छे 13 ओतरान कोरिन हिमि तीन दाहड़ा क माहाय फिरोन तारो मुनको उँचो कोरसे, आरु ओळी सी तारा पद पोर तुसे नेवाड़से, आरु तु पेहले क जोसु फिरोन क पिलानेहारा होईन ओको कटोरो ओका हात मा ओळी आप्या कोरीस। 14 एने: जब तारो भोलो होय जाय ती मेसे फोम कोरजी, आरु मार पोर गीन कोरिन फिरोन सी मारी वात चालाड़जी, आरु इना घोर सी मेसे छुड़ाय देजी। 15 काहकी छाचिन इब्रानी क देश सी मेसे चुराविन लावला छे, आरु याँ वी हांव ओसो काई ओसो काम नी कोर्यु, जेरे जुगु मे इना जेलखाना मा रोहनो जुवे।” 16 यो देखिन कि हेन्दरा सोपना क फोव वारु निकोळ्यो, पकानेहारे क डाहलो न युसुफ सी कोयो “हांव वी सोपनो देखलो छे, चो यो छे: हांव देख्यु की मारा मुनका पर धोवळ्या रुटा क तीन टोगारा छे 17 आरु ऊपोर क टोगारा मा फिरोन क लिय सब भातीन क चुड़लो चिजे छे; आरु चिल्‌ला मारा मुनका पोर क टोगारा मा सी तेनु चिज क खाय रोया।” 18 युसुफ न कयो, “एरो फोव यो छे: तीन टोगारा क मतलव तीन दाहड़ा छे। 19 हीमी सी तिन दाहड़ा क माहाय फिरोन तारा मुनको काटाड़ीन तुसे एक झाड़ पोर टांगाड़ देसे, आरु चिल्‌ला तारो मांस क नुची नुचीन खासे।” 20 आरु तिसरे दाहड़े फिरोन क जन्मदिन हुतो, हुयो आपसा आखा कामकोर्न्या क भोज आप्यो, आरु हेरेमा सी पिलानेहारो क डाहलो, आरु पकानेहारो क डाहलो सुयो क जेलखाना सी निकायमांग्यो। 21 पिलानेहारो क डाहलो क ते पिलानेहारे क जागा पोर ओळी सी नेवाड़ लेदो, आरु हुयो फिरोन क हात मा कटोरो आपने लाग्यो। 22 बाखुन पकानेहारे क डाहला क हुयो टांगाड़ देदो, जोसो कि युसुफ न हेरा सोपना क फोव हेनाक कोवलो हुतो। 23 ते वी पिलानेहारो क डाहलो न युसुफ क फोम नि राख्यो: बाखुन हेनाक वीसरी गोयो।