49
याकुब क भविष्यवाणी
1 ओळी याकुब न आपसा पुर्या क यो कोहीन बुलायो, एकठा होय जावु, हांव तुमुक देखाड़ीस, की चेहला दाहड़ा मा तुमरे पोर काय काय वितसे। 2 हे याकुब क पुर्या, एकठा होईन सोमळु, आपसा बाबा इस्राएल भिनी कान्टा लागाड़ु।
3 हे रुबेन, तु मारु मोटलु पुर्यु, मारी
ताकोत, आरु मारा मानुस होयनेन पेहलु फळ छे;
प्रतिष्ठा क वारु वाटू, आरु ताकोत क वी वारु वाटू तु त छे।
4 तु जळ क जोसो
उकोळनेवाळु छे,
ओतरान कोरिन दिसरा सी वारु नी कोहायसे;
काहकी तु आपसा बाबा क खाटला पोर चोढ़्यु,
ती तु ओको विटोळ कोर्यु;
हुयो मारा आथरन्या पोर चोढ गोयु।
5 शिमोन आरु लेवी ते भाईभाईस छे,
हेन्दरी तोलवार झगड़ो करावनो क होतीयार छे।
6 हे मारा जीव, हेन्दरा मर्म मा नी पोड़,
हे मारी महिमा, हेन्दरी सभा मा झुणी मिळे;
काहकी हुये रीस सी मानषो क मार देदा,
आरु आपसीत मोरजी पोर चालीन बयलीयो क लेंगड़ा बोनायो।
7 धिक्कार हेन्दरा रीस क, जो प्रचण्ड हुतो;
आरु हेन्दरो रोष क, जो निर्दय हुतो;
हांव हेनद्रा याकुब मा आंगेआंगे
आरु इस्राएल मा तितर बितर कोर दिस।
8 हे यहुदा, तारा भाई तारो धन्यवाद कोरीस,
तारा हात तारा शत्रु क गोळा पर पोड़से;
तारा बाबा क पुर्य तुसे वान्दसे।
9 यहुदा नाहोर क पुर्य छे।
हे मारा पुर्य, तु अहेर कोरीन गुफा मा गोयो छे
हुयो नाहार एने नाहरनी क जोसो दोबीन बोस गोय;
ओळी कुन हेनुक छेड़से। (प्रका 5:5)
10 जोत्यार लोगुन शीलो नी आवे
ती लोगुन नी ते यहुदा सी राजडोन छुटसे,
नी हेरो ओवलियाद सी व्यवस्था आपनेवाळु आंगे होयसे;
आरु राज राजन मानुस हेरा होक क होय जासे। (युह. 11:52)
11 हुये आपसा जुवान्या गोदड़ा क दाखलता मा,
आरु आपसा गोदडी क पिला क वारु
जाती क दाखलता मा बान्धया कोरसे (प्रका 7:14, प्रका 22:14)
हुये आपसा छिन्दरा दाखमधु मा,
आरु आपसी पेहरोट दाखो क रस मा धोयो छे।
12 ओका डुळा अंगुरन रस जसी चमकीला
आरु ओका दात दुध जसा धळा होयसे
13 जबुलुन दरिया धोड़े पोर रोया कोरसे,
आरु ढोन्या क लिय बंदरगाह क काम कोरसे,
आरु ओको परलो वाटू सीदोन क धोड़े पुगसे
14 इस्साकार एक मोटो आरु बलवन्त गोदड़ो छे,
जे ढुरो क वाड़ा क वीच मा लुटलो रोहे छे।
15 हुयो एक आरामोनजागु देखिन, कि वारु छे,
आरु एक देश, क मनोहर छे,
आपसा खादा क बोझ चुटने क लिय झुकायो,
आरु बेगारी मा दास क सो काम कोरने लाग्यो।
16 दान इस्राएल क एक गोत्र होईन आपसी
जाती भाई क नीयाव कोरसे।
17 दान वाट मा क एक घोड़सो,
आरु वाट्ये मा क एक नाग होयसे,
जु घुल्ला क नळी क डोसतो छे,
जेनासीइ ओको सोवर पोछोळ हिट पोड़े छे।
18 हे योहोवा, हांव तारी सी छुटकारो पावने क वाट जुवो।
19 गाद पोर एक दल चोढ़ाई ते कोरसे;
बाखुन हुये हेना दल क पोछोला वाटा पोर आक्रमण करसे।
20 आशेर सी ज आन पोयदा हुयसे चो वारु हुयसे,
आरु हुयो राजा क योग्य सोवादो खानो आप्या कोरसे।
21 नप्ताली एक छुटली होयनी छे;
हुयो घाटावी वात कोहे छे।
22 युसुफ बलवन्त लता क एक डाळ छे,
हुयो सोता क पास लागली होयी फलवन्त लता क एक डाळ छे;
ओकी डाळ्या भितड़ा पोर सी चोड़ीन खोव्वाय जाय छे।
23 धनुर्धारि न ओको खेदित कोर्या,
आरु हेरे पोर तीर देये,
आरु ओका पोछोळ पोड़े छे।
24 बाखुन हेरो धोन्दली दृढ़ रयो,
आरु ओका बाहा आरु हात याकुब क
हेरो जुरभोर्या परमेश्वर क हातो क द्वारा छाटा हुया,
जेरे पास सी हुये गुवाळ्या आवसे,
जे इस्राएल क चाफर्या वी कोहायसे।
25 यो तारा बाबा क हेना परमेश्वर क काम छे,
जुळ तारी मोदोत कोरसे,
हेना जुरभोर्या क जो तुसे
उपोर सी वादळा मा क बोरकोत,
आरु नेचा सी उन्डा जळ मा क बोरकोत,
आरु स्तनो, आरु कुख क बोरकोत आपसे।
26 तारा बाबा क बोरकोत
मारा पितरों क बोरकोत सी सोटो वोद गोयो छे
आरु सनातन बोयड़ा क मनचाही चीजो
क जोसो बोनलो रोहसे चे युसुफ क मुनका पोर,
जो आपसा भाई सी ओलोग कोर्यो गोयो हुतो,
हेरात मुनका क मुकुट पोर फुले फळसे।
27 बिन्यामीन फाड़नेवाळु लेंडियो छे,
सोंदारे ते हुयो अहेर मारसे,
आरु सान्तु क लुटलो वाट लेसे।
28 इस्राएल क बारा गोत्र येत छे आरु ओका बाबा न जेना जेनाक बुल सी बोरकोत आप देदु, चे येत छे; एक एक क हेरा बोरकोत क ओनसारे हुयो बोरकोत आप्यो।
याकुब क धुळु आपनेन वाराम हुकुम
29 ती हुयो यो कोहीन हेनुक हुकुम आप्यो, हांव मारा मानषो क पुठी मिळने पोर छे: ओतरान कोरिन मेसे हित्ती एप्रोन क जागावाळी गुफा मा मारा डाहडा क पुठी धुळु आपजु, (प्रेरि 7:16) 30 यानी हेना गुफा मा जो कनान देश मा मम्रेक ओगोळ वाळी मकपेला क जागा मा छे; हेना जागा क अब्राहम न हित्ती एप्रोन क हात सी ओतरान कोरिन मुले लेदो हुतो, कि हुयो बिड़ा क लिय ओको वावड़्यो जागो होय। 31 “होंया अब्राहम आरु ओकी घोरवाळी सारा क धुळु आपलो हुतो; आरु हुयो इसहाक आरु ओकी घोरवाळी रिबका क वी धुळु आपला; आरु हुयो हांव लिआ क वी धुळु आपलु। 32 हुयु जागु आरु हेरेम क गुफा हित्ती क हात सी मुले लेदला।” 33 याकुब जब आपसा पुर्याक यो हुकुम आप्यो हुतो, ती आपस पाय खाटला पोर सेमटीन जीव छुड़्यु, आरु आपसा मानसो मा जाय मिळ्यु। (प्रेरि. 7:15)