1 फरीसियों भी सोमव्या छे कि ईशु यहुन्ना रईन जास्ती चेला बनावतु आरू तीनुक बपतिस्मा देतु छे। 2 हिमी ईशु स्वता: नी वरना हेरेन चेला बपतिस्मा देता हता 3 पछा जव पोरबु काजे मालुम हुयो तव त्यो यहूदि या काजे छुड़ीन पछु गलील जात रयु, 4 आरू तीनाक सामरिया रईन जानु जरूरी हतो। 5 एरकरीन चाँ सूखार नावन सामरिया एक नगर तक आयु, जु तीन धरती साथे छे जिनाक याकूब आपसा पोर्‍या यूसुफ काजे आपलो हतु। 6 आरू याकूबन कुवो भी चाँ हतो। अळते: ईशुन वाट पर थाकलो ओसलु कुवा पर ओसोज बोठ गयु। यी वात दिसुन टेमे होईली। 7 इतरीक वार मा एक सामरिया बाई पानारी आवी। ईशु तीनाक कयो, “मखे पानी पिवाड़।” 8 काहकि हेरेन चेला ते नगर मा खानेन बजार लेने करीन गया हुता। 9 ची सामरिया बाई तीनाक कयली, “तु यहूदि होईन मखे सामरिया बाई पर पानी काँ मांगता छे?” काहकि यहूदि सामरियो साथे काहनाज प्रकारन व्यवहार नी राखता। 10 ईशु जवाब देदु, “यदि तु यहोवा–भगवानन वरदान जानती, आरू यी भी जानती कि चाँ कुन छे जु तुखे कयतु छे, मखे पानी पिवाड़, ते तु तीनाक पर मांगती, आरू त्यो तुखे जीवनेन पानी देदु।” 11 बाई तीनाक कयी, “हे पोरबु, तार जु पानी भरनेन करता काय ते छे भी नी, आरू कुवो उंडो छे; ते पछो चाँ जीवनन पानी तार जु क रईन आयो? 12 काय तु आमरू बास याकूब रईन मोटु छे, जु आपनुक यी वावड़ी देदु; आरू आपसु आपसा पोर्‍या, आरू आपसा पशुओं समेत इन वावड़ीन पानी पिदला?” 13 ईशु तीनाक जवाब देदु, “जु कुन यो पानी पीसे तीनाक पछी पानी पीस लागसे, 14 पुन जु कोय इन पानीम रईन पीसे जो हाव तीनाक आपीस, त्यो पछु अमरकायो तक पीसलु नी रवे; वरना जो पानी हाव तीनाक आपीस, वा तीनाम सुवतु रोवे जासे जु अमरकाय जीवनन करता खुश रवसे।” 15 बाई तीनाक कयी, “हे पोरबु, त्यो पानी मखे आप काहकि हाव पीसली नी रवु आरू नी पानी भरने काजे अतरे नाम्बे नी जाव।” 16 ईशु तीनाक कयो, “जा, आपसा बास काजे या बुलाव लाव।” 17 “बाई तीनाक जवाब आपी, हाव बिना माटीन छे।” ईशु तीनाक कयो, “तु ठिक कयती छे, हाव बिना माटीन 18 काहकि तु पाच माटी कर लेदी छे, आरू जीना पाह तु हिमी छे त्यो भी तार माटी नी होय। यो तु सच कयनो बाज रयु छे।” 19 बाई तीनाक कयी, “पोरबु, मखे लागे से कि तु भविष्यवक्ता छे। 20 हामरा बाबदादा भी इनुज बोयड़ा पर भक्ती करला, आरू तुमू कयता से कि ची धरती जा भक्ती करनो जुवु ची यरूशलेमा छे।” 21 ईशु तीनाक कयी, “देख नारी, मार वातन विश्वास कर कि त्यो टेम आवतु छे कि तुमू इन बोयड़ा पर बासन भक्ती करतो, नी यरूशलेम मा 22 तुमू जिनाक नी जानता छे, हेरेन भक्ती करता छे; आरू हामु जिनाक जानता छे, हेरेन भक्ती करता छे; काहकि उध्दार यहूदि या मा रईन छे, 23 पुन त्यो टेम आवतु छे, वरना हिमी भी छे, जीनाम सच्चा भक्त बासन भक्ती आत्मा आरू सच्चाई से करसु, काहकि बास आपने करता ओसाज तपस्या वाला देखतु छे। 24 यहोवा–भगवान आत्मा छे, आरू जरूरी छे कि हेरेन भक्ती करनेवालान आत्मा आरू सच्ची भक्ती करू।” 25 बाई ईशु काजे कयी, “हाव जानती से कि मसीह जु ख्रिस्त कोवाड़तु छे, आवनेवाळो छे; जव त्यो आवसे, ते हामुक सुब वात कय देसे।”

26 ईशु तीनाक बाई क कयो, “हाव जो तुखे कयनो बाजरयु छे, हाव त्यो छे।”

27 इतरीक वार मा हेरेन चेला आव गया, आरू घबरायने करने लाग्या कि त्यो बाई साथे वात करने बाज रयु छे; तेभी कुनुज नी पुच्या, “तु काय चाहतु छे?” या “काय करनेन करता तीनाक साथे वात कर रयु छे?” 28 तव ची बाई आपनो ढुसरो छुड़ीन नगर मा जात रयी, आरू मानसो काजे कोवने लागी, 29 “आवु, एक मानसो काजे देखु, जु सब काय जो हाव जो कर्‍यु मखे कय देदु काय यु ते मसीह नी छे?” 30 अळते: चाँ नगर मा रईन निकवीन तीनाक जु आवने लाग्या। 31 तवूज हेरेन चेला ईशु यी विनती कर्‍या, “हे गुरू, काही खाय ले।” 32 पुन त्यो तीनुक कोयु, “मार जु खानेन करता ओसलो खानो छे जिनाक तुमू नी जानता।” 33 तव चेला आपसु मा कोया, “काय कोय हेरेन करता खानेन करता काय लावला छे?” 34 ईशु तीनाक कयो, “मार खानो यो छे कि ओका मोकलने वालान इच्छानुसार चालो आरू हेरेन क पुरो करो। 35 काय तुमू नी जानता, ‘काटनेन हुयने मा हिमी भी चार महीना पड़ला छे?’ देखु, हाव तुमूक कोय रयु छे, आपसा ढुवा उगाड़ ़ीन खेतो मा नजर मारू कि चाँ काटनेन करता पाक गयो छे कि। 36 काटने वाळा क दाहाड़की जड़े आरू त्यो अमर काया न जीवन क फव एखटो करे, काहकि वेरनेवाळो आरू काटनेवाळो दुयु मिवीन खुशीम रहवे। 37 काहकि या पर यी काहनी सच बठती छे: ‘वेरनेवाव आरू छे आरू काटनेवाळो आरू।’ 38 मे तुमूक वा खेत काटनेन करता मोकल्यु तीनाकमा तुमू मेहनत नी कर्‍या: दिसरा मेहनत कर्‍या आरू तुमू हेरेन मेहनतन फव मा भागीदार होया।”

39 तीन गाँवन भारी सोवटा सामरिया तीन बाईन कोवने से ईशु पर विश्वास कर्‍या; काहकि ची यी गवाय देदली छे: “त्यो सब हाव कर्‍यु छे, मखे कय देदु।” 40 तेरेन करता तव चे सामरिया तीनाक जु आवला, ते ओतेन विनती करने लाग्या कि हामरेन चाँ रोवे। अळते: ओतेन त्यो चाँ दुय दाहाड़ा तक रयु। 41 हेरेन वचन क कारण आरू भी बैस मानसे विश्वास कर्‍या 42 आरू तीन बाई कयो, “हिमी हामु तारे कयनो पर विश्वास नी करता; काहकि हामु तुमूक सोमवाळ्या छे, आरू जानता छे कि यु सचमुच जगन अमरकाय रक्षा करनीयो छे।”

43 पछा चाँ दुय दाहाड़ान बाद त्यो चाँ रईन निकलीन गलील जात रयु, 44 ✡मत्ती 13:57; मरकुस 6:4; लूका 4:24काहकि ईशु ते आपसु साक्षी देदु कि कागळीयान आपसा देश मा विजुत नी जुड़े। 45 ✡यहुन्ना 2:23जब चा गलील मा आवला, ते गलीलवाला खुश मा तीनाक भेवाया; काहकि जोतरा काम त्यो यरूशलेम मा तिवारन टेमे करला हुता, चाँ तीनाक सुब काजे देख्या हुता, काहकि चाँ भी तिवार मा गयला हुता,

46 ✡यहुन्ना 2:1-11तव त्यो पछु गलीलन काना गाव मा आयु, जा त्यो पानी काजे दाखरस बनायु हतु। चा रोमन सरदार हतु जिनान पोर्‍य कफरनहूम नगर मा बीमार हतु। 47 त्यो यो सोमवीन ईशु यहूदिया से गलीलमा आव गयु छे, तीनाक जु गयु आरू तीनाक से विनती करने लाग्यु कि चालीन मारा पोर्‍या काजे आरगा कर दे: काहकि त्यो मरने पर हतु। 48 ईशु तीनाक कयो, “जव तव तुमूक सहलानी आरू विनछळ्यो काम नी देखसे जा तक कदी भी विश्वास नी करसे।” 49 राजान आधिकारी तीनाक कयो, “हे पोरबु, मारा नानला पोर्‍या मरनान पेहल चाल।” 50 ईशु तीनाक कयो, “जा, तार पोर्‍यो जीवतो छे।” त्यो मानुस ईशुन कयली वात विश्वास करीन आरू जात रयु। 51 त्यो वाट परूच हुतो कि हेरेन दास तीनाक आव भेवाया आरू कोवने लाग्या, “तारू पोर्‍यो जीवतो छे।” 52 त्यो तीनुक पूछु, “काहले टेमे त्यो वारला हुयने लाग्यो?” चाँ तीनाकसे कयो, “काल सात घंटा न बाद हेरेन ज्वर उतरी गयो।” 53 तव बास जान गयु कि यो तीन टेमे हुयो जिन टेमे ईशु तीनाक कयो, “तार पोर्‍यो जीवतो छे” आरू त्यो आरू हेरेन सब घर वाला विश्वास कर्‍या। 54 यो दिसरो विछेळीयो काम होतो जो ईशु यहूदि या रईन गलील मा आवीन देखाड़्यु।