मत्ती कि किताब
मत्ती नी किताब
परिचय
मत्ती न लिखली खुशीन खबर नया नियमन चार किताबो माईन एक छे, जो ईशु मसीहन क जीवनन बारा मा देखाड़े, इनी चार किताब माईन यी एक खुशीन खबर न पत्री कहवाये। एक मतलब इनी चारो माईन एक खुश खबर कहवाये, ईशु क सोरग मा जाने क बाद मा यी किताब मत्ती, मरकुस, लूका आरू यहुन्ना या लिखिया, मत्तीन किताब कब लिखाय ओको पतो विद्वान लोगहन क भी नी मालोम हय। तव भी हामु यो कय सकजे, कि यी किताब ईशु क पैदा हुयनेन 60 साल क बाद मा लिखयाली छे।
इनिये रीति सी यी क लिखाय, यो मालोम नी हय पछु भी कोय जना क यो माननो छे कि यी किताब पलिस्तिम मा नी ते यरूशलेम मा लिखाय हुयसे। इनी पत्री क लिखने वाळो मत्ती छे, जो ईशु क पेहलो चेलो हुतो आरू त्यो फाळो लेने वाळो हुतो। आरू उको लेवी क नाव सी जानता हुता, मत्ती ईशुन बारा चेला माईन एक हुतो आरू त्यो यी पत्री यहूदि लोगहन क करता लिखियो हुतो। इना कारण सी हामु देखजे कि इनी किताब मा 60 से भी जादा वातन क बाराम पुराना नियम सी छे, जिनान बाराम भविष्यवाणी हुयली हुती, त्यो यो देखड़नो चाह्यो रियो कि छुड़वाने वाळो छे, मत्ती यहोवा भगवान क राजन बारा मा घण सवटी वात लिखलो छे, यहूदि यान यी आश हुती कि मसीह राजा बनसे मत्ती इना वाचिर क विश्वास देवाडीन यहोवा भगवान क आखरी राजन बारा मा कहवे।
मत्तीन खुश खबर यी एक वारली किताब छे, यी नवला नियमन शुरू वाळी किताब छे आरू यी हामरो धियान बार–बार पुराना नियम तरफ ली जाय, यी किताब पुराना आरू नवला नियम दूयन क जोड़ देय, विद्वान लोगहन क यो कयनो छे, कि मूसान लिखला पाच गरन्थ छे, जो पुराना नियम नी पाच किताब छे, आरू ओकी सोहलाणी क बारा मा देखाड़े जो ईशु बयड़ा पर खबर दियो, पाठ 5–7 तक एकी बराबरी कर सके, व्यवस्थाविवरण 19:3–23:23
रूप रेखा
1. ईशु क जनम आरू ओकी सेवान शुरू सी मत्ती ओको खुश खबर शुरू करे। 1–4
2. ओका बाद ईशुन सेवा क बारा मा जीनी वातन शिकापण दियो, ओका बारा मा देखाड़े। 5–25
3. मत्तीन खुश खबर यी आखरी भाग मा ईशुन सेवा काम क देखाड़े जिनाम जोरदीन बयड़ा क मतलब ओकी मोत आरू पछु सी जीव उठनेन बाराम देखाड़े। 26–28
1
ईशुन पिढ़ी
(लूका 3:23-38)
1 अब्राहम न ओवलियाद, दाऊद न ओवलियाद, ईशु मसीह न घरानो 2 अब्राहम सी इसहाक पैदा हुयो, इसहाक सी याकूब पैदा हुयो, याकूब सी यहूदा पैदा हुयो आरू उको भाई पैदा हुया। 3 यहूदा आरू तामार सी पेरेस आरू जेरह पैदा हुया, आरू पेरेस सी हेसरोन पैदा हुयो, आरू हेस्रोन सी एराम पैदा हुयो। 4 एराम सी अम्मीनादाब, अम्मीनादाब सी नहशोन, नास्सोन सी सलमोन 5 सलमोन सी राहाब, राहाब सी बोआज, बोआज आरू रूत सी ओबेद, ओबेद सी यिशै पैदा हुयो, 6 आरू यिशै सी दाऊद राजा पैदा हुयो।
आरू दाऊद सी सुलैमान जो उनी बायर सी पैदा हुयो जो पेहल उरिय्याह न बायर हुती, 7 सुलैमान सी रहबाम पैदा हुयो, रहबाम सी अबियाह पैदा हुयो, आरू अबियाह सी आसा पैदा हुयो, 8 आसा सी यहोशाफात पैदा हुयो, यहोशाफात सी योराम पैदा हुयो, आरू योराम सी उज्जियाह पैदा हुयो, 9 उज्जियाह सी योथाम पैदा हुयो, योथाम सी आहाज उज्जियाह हुयो, आरू आहाज सी हिजकिय्याह पैदा हुयो, 10 हिजकिय्याह सी मनश्शे पैदा हुयो, मनश्शेह सी आमोन पैदा हुयो, आरू आमोन सी योशियाह पैदा हुयो: 11 आरू बन्दी बनीन बेबीलोन जाने क टेमे योशियाह सी यकुन्याह आरू ओको भाई पैदा हुया।
12 बन्दी बनीन बेबीलोन मा जाने क बाद यकुन्याह सी शालतियेल पैदा हुयो, आरू शालतियेल सी जरूब्बाबेल पैदा हुयो, 13 जरूब्बाबेल सी अबीहूद पैदा हुयो, अबीहूद सी एलयाकीम पैदा हुयो, आरू एलयाकीम सी अजोर पैदा हुयो, 14 अजोर सी सदोक पैदा हुयो, सदोक सी अखीम पैदा हुयो, आरू अखीम सी एलीहूद पैदा हुयो, 15 एलीहूद सी एलीयाजार पैदा हुयो, एलीयाजार सी मत्तान पैदा हुयो, आरू मत्तान सी याकूब पैदा हुयो, 16 याकूब सी यूसुफ पैदा हुयो, जो मरियम न धेनी हुतो, आरू मरियम सी ईशु जो मसीह कहवाये, पैदा हुयो।
17 इनिये रीति अब्राहम सी दाऊद तक चौवदा पीढ़ी हुयी, आरू दाऊद सी लगाड़ीन बेबीलोन क बन्दी बनीन जाने तक चौवदा पीढ़ी, आरू बन्दी बनीन बेबीलोन क जाने तक लगाड़ीन मसीह तक चौवदा पीढ़ी हुयी।
ईशु क जनम
(लूका 2:1-7)
18 ईशु मसीह न जनम इनीये प्रकार सी हुयो, कि जव ओकी माय मरियम की मांगनी यूसुफ क साथ हय गयी, तो ओको एखठा हयने सी पेहल ही त्या चुखली आत्मा क लारे भारीस हुयी। 19 अळतेन ओको घर वाळो यूसुफ जो न्यायी हुतो आरू उको बदनाम नी करने हीनतो हुतो? उको मनेन छुड़ देने न विचार कर्यो। 20 जव युसूफ इनी वात क विचार मा हुतो ती पोरबु सोरगदूत सपना मा देखाय दीदो आरू कयने लाग्यो, “हे यूसुफ! दाऊद न अवळियाद, तु थारी लाड़ी मरियम क थारे या ली आवने सी मा घाबराये, काहकि जो ओका पेट मा छे, त्यो चुखली आत्मा क लारे छे। 21 ✡लूका 1:31मरियम पोर्या क जनम देसे आरू तु ओको नाव ईशु राखजी, काहकि त्यो ओका लोगहन क पाप सी छुड़वासे।”
22 यो सब अतरान करीन हुयो कि जो वचन पोरबु कागळिया क लारे हुतो, त्यो पूरो हुयो:✡यशायाह 7:14 23 “देखु एक छल्ली भारीस हुयसे आरू एक पोर्या क जनम देसे, आरू ओको नाव इम्मानुएल राखसे” जेरो मतलब छे यहोवा–भगवान हामरे साथ छे 24 तव यूसुफ नींद सी जागीन पोरबु न सोरगदूत क लारे आपसी लाड़ी क आपसे या ली आयो; 25 आरू जव तक मरियम पोर्या क नी जनी तव तक युसूफ मरियम क पास मा नी गियो: आरू त्यो ओको नाव ईशु राखिया।