मरकुस कि किताब
मरकुस नी किताब
परिचय
ईशु क जीवन क वर्णन करने वावी चार पत्री मा से एक पत्री मतलब मरकूस रचीत खुश खबर था “चार पत्री ईशु क खुश खबर सोमवने से।”
ईशु क मृत्यु क बाद यो चार खुश खबर मत्ती, मरकुस, लूका वो यहुन्ना क हातेन लिख्यो गयो से यो चार पत्री मा से मरकुस खुश खबर आखा सी नानी पत्री से, काय तज्ञ कि मान्यता से कि मरकुस रचीत खुश खबर आखा सी पेहल लिख्यो गयो, बाकि क तीन खुश खबर ईशु क जनमक 65 से 70 साल क बाद लिख्यो गयो वो लिखने क कारण मतलब रोम शहर की मसीह मासा क मनोबल बड़ावने वो बढ़ावु करने क करता लिख्यो गया हुता।
यो मरकुस कुन? प्रेरित पौलुस वो बरनबास इनाक यो जवान सहककर्मी हुता, यहुन्ना मतलब मरकुस रचीत खुश खबर क लेखक मरकुस ओका साथ पेहले मिशनरी यात्रा से वीच मा ही छुड़ीन चाली जाने से ओकी मान मर्यादा क ठेस पुची प्रेरितन 13:13 बाद मा याहा मरकुस बरनबास क साथ सेवाकार्य मा सामिल हुता देख्या प्रेरितन 15:37-39 लारे मरकुस पतरस क साथे क साथी हुता। 1 पतरस 5:13, तज्ञ की ओसी मान्यता हे की जत्यार की मरकुस ने ईशु क जीवन वो सेवाकार्य आमने सामने देखी नी हुती ती पतरस क गवा क आधार पर उसने ओको खुश खबर लिख्या। याहा मरकुस क खुश खबर क आधार की वात से।
मरकुस रचीत क दुई विषय मतलब ईशु क सचा चेला बनने वो आखरी क भविष्य मा ईशु क द्बारा दी गय शिक्षा।
मरकुस रचीत खुश खबर मा ईशु क नम्र दास वो आपने बास कि मरजी पुरी करने मा सदा तीयार, ओसो यहोवा भगवान क मोंगावु पोर्यो याहा दुई रूप मा दशीया से वोसो ही मरकुस ने ईशु क द्बारा कर्या गया चमत्कार क विषय मा ज्यादा से ज्यादा लिख्या गया से। याहा खुश खबर क समापन ईशु क चेला क दिया गया महान हुकुम कर्या गया से।
रूप रेखा:
1. बपतिस्मा देनेवावा यहुन्ना वो ईशु क बपतिस्मा 1:1-13
2. ईशु क द्बारा गलील प्रदेश वो क्षेत्र मा कर्या गया चमत्कार 1:14–9:50
3. गलील सी यरूशलेम तक की ईशु न यात्रा वो मंदिर मा आवनो10:1–12:44
4. ईशु क द्बारा भविष्य क विषय मा दिया गया संदेश 13:1-37
5. ईशु क मरना वो आवी जीवीन उठने वो मरन हुकुम 14:1–16:20
1
यहुन्ना बपतिस्मा देनेवावा क प्रचार
(मत्ती 3:1-12; लूका 3:1-18; यहुन्ना 1:19-28)
1 यहोवा भगवान क पोर्या ईशु मसीह की खुश खबर की शुरूम। 2 जसो यशायाह कागळिया क पत्री मा लिखलो छे।
यहोवा भगवान कहवे देख हाव म्हारा खुश खबर देने वाळा क तुमरे अगोळ मोकलू,
जो थारे जुगू वाट सुधारसे।
3 यशायाह कागळियान “जंगल मा एक आयड़ने वावान बुल समवाय रया छे
की पोरबु क वाट तीयार करू,
आरू हेकी वाट सुदी करो।”
4 यहुन्ना बपतिस्मा देनेवालो आयो, जो जंगल मा बपतिस्मा देतो हतो, आरू पाप माफी क मन फिरावने क आरू बपतिस्मा लेने क खबर करतो हतो। 5 आखा यहूदिया देश क आरू यरूशलेम शहर मा सब रवने वावा निकवीन ओको पास गया, आरू आपसा पाप क मानीन यरदन नदी मा यहुन्ना सी बपतिस्मा लेदा।
6 बपतिस्मा देनेवावु यहुन्ना उटड़ान झटा क बनलो छिंदरो पेहरलु आरू हेकी कमर मा चामड़ान पट्टो बांधी रयो हुतो आरू टिड्डिया आरू बयड़ान माहव खाया करतो हुतो, 7 आरू यी करता यहुन्ना बपतिस्मा देनेवावो खबर करतो हुतो कि मार बाद मा त्यो आवने वावो छे, जो मार से भी जादा जानकार छे; हाव ते ओका पाय मा झुकीन खासड़ा निकावने जुगु भी नी होय। 8 हाव ते तुमूक पानी से बपतिस्मा दि रयो बाकि वो तुमूक चुखली आत्मा से बपतिस्मा आपसे
ईशु क बपतिस्मा आरू परिक्षा
(मत्ती 3:13–4:11; लूका 3:21-22; 4:1-13)
9 तिनु दाहड़ा मा ईशु गलील क नासरत शहर से आवीन, यरदन नदी मा यहुन्ना से बपतिस्मा लेदो। 10 आरू ईशु बपतिस्मा लीन पानीम रईन निकवीन बाहर आयो, तो तत्काल ईशु सोरग क खुलतो आरू चुखली आत्मा क पेरवान सारकी ओका उपर उतरता देख्यो। 11 ✡मत्ती 3:17; 12:18; मरकुस 9:7; लूका 3:22आरू हेको सोरग से यी अवाज समवाई देदी, कि तु म्हारो मोंगावु पोर्यो छे, “थारे से हाव खुश छे।”
12 तत्यार आत्मा तत्काल ईशु क जंगल मा मोकली। 13 जंगलमा चावीस दाहड़ा तक शैतान हेकी परीक्षा लिदो; आरू वो जंगली जनवार क साथ मा रयो, आरू सोरगदूत ओकी सेवा करता रया।
ईशु क सेवान काम क सोरू करनो
(मत्ती 4:12-17; लूका 4:14-15; 5:1-11)
14 बपतिस्मा देनेवावो यहुन्ना क धराय जाने क बाद ईशु गलील मा आवीन यहोवा भगवान क राजन वारली खबरन परचार करियो, 15 ✡मत्ती 3:2आरू कयो, “टेम पुरो हयो, आरू यहोवा भगवान क राज नाट आय गयो; पापो से मन फिरावु आरू खुश खबर पर विश्वास करो।”
16 ज्यार ईशु गलील दरियो क धड़े–धड़े जातो हतो, ती ईशु शमौन आरू ओका भाईस अन्द्रियास क दरियो जाव नाखता देख्यो; काहकि चे माछा मारन्या हुता। 17 ईशु तिनुक कयो, मार पछव आवु, “हाव तुमूक मानुस क यहोवा भगवान राज्यमा लावनेवावा बनावीस।” 18 चे तत्काल जाव छुड़ीन ईशु पछव होय लेदा।
19 थुड़ोक ओगव जाईन ईशु जबदी क पोर्या याकूब आरू यहुन्ना क ढोंड्यो पर जाव सुदारता देख्यो। सुधारता 20 ईशु तत्काल तिनुक बुलयो आरू चे तिन्दरा बास जबदीक दाहड़कियान क साथ मा ढोंड्यो पर छुड़ीन, ईशु क पछव चाल देदा।
साहळा से भरायलो मानुस क वारू करनो
(मत्ती 4:12-22; लूका 4:14-15; 5:1-11)
21 तत्यार चे कफरनहूम नगर मा गया, आरू वो तत्काल आराम क दाहड़े यहूदि यान प्रार्थना घर मा जाईन वारली खबर करने लाग्यो। 22 ✡मत्ती 7:28,29आरू लोगहन ओकी वारली खबर से अका बाकी होय गया, काहकि ईशु हिनुक शास्त्री मानुस क सारको नी, पुन हक क साथ मा वारली वात देखाड़तो हतो।
23 आरू तिना तेम मा, तिन्दरा प्रार्थना क घर मा एक मानुस हुतो जिनाम एक विटळ आत्मा हुती। 24 साहळा आयड़ीन कयी, हे ईशु नासरत, थारो हामरे साते थारो काय काम? काय तु हामुक नाश करने आवलो छे? हाव तुखे जानो, तु कुन से? “तु यहोवा भगवान क चुखलो मानुस से!”
25 “ईशु साहळा क लड़िन कयो, हुग रया; आरू हेकाम से बाहर निकवी जा।”
26 तत्यार साहळा ओको मुयड़तीजाईन, आरू मोटात् बुल से आयड़ीन ओको मा से निकली गयी। 27 अतरा पर जतरा लोगहन हेको देख रया हता चे आखा घबराय गिया आरू एक दिसरा क कयनो लागिया “यो काय छे? काय यो काहय भाती क नवलो सिखापन ते नी हय कि हेका पास साहळा क निकवने क हक छे आरू ची आत्मा ओको हुकुम माने।”
28 आरू ओको नाव छाटत गलील क आखा प्रदेश मा बढ़तो गयो।
ईशु घण बेमार मानसे क आरगा कर्या
(मत्ती 8:14-17; लूका 4:38-41)
29 ईशु छाटत प्रार्थना घर मा से निकवीन, याकूब आरू यहुन्ना क सात मा शमौन आरू अन्द्रियास क घर गयो। 30 शमौन की सासु जादा सेरी हयने से खाटला मा पड़ रयी हुती, आरू चे छाटात हेका बाराम हेके कयो। 31 तत्यार त्यो तिन्दरे सात मा जाईन हेको हात धरीन क हेके उठाड़ियो; आरू हेको ज्वर उतरी गयो, आरू ची ईशुन सेवा करने लागी।
32 दाहड़ो डुबने आरू शान्तो हयने क बाद मा लोगहन ईशु क त्या लोगहन क पास लाया आखा मांदला आरू साहळा से भरायलान क ओका पास लाया। 33 आरू आखा नगर क मानसे झोपला पर एखटा हुया। 34 आरू ईशु घणा जन क जो भातीभातीन बेमारी से दुखी हुता, तिनुक आरगा करियो; आरू घण सवटी साहळा क लोगहन मा से निकालियो; आरू दृष्टात्मान क बोलने नी दिदो, काहकि ची आत्मा ईशु जानती हती।
सुनसान मा ईशु क प्रार्थना करने
(लूका 4:42-44)
35 संदारे दाहडु निकव्यु छे घोणा पेहल, ईशु उठीन निकव्य, आरू एक बयड़ा उपर गयो आरू वा प्रार्थना करने लाग्यो। 36 तत्यार शमौन आरू ओको साथी ओको हेरने करीन गया। 37 जत्यार ईशु मेव गयो, ती ओको कयो; “सब लोगहन तुखे हेर रया।”
38 ईशु तिनुक कयो, “आवो हामु अळी काहय दिसरा गावोम जाजे, कि हाव त्या भी खुश खबर कयनु छे, काहकि हाव अतरान करीन आवलो छे।”
39 ✡मत्ती 4:23; 9:35आरू चे आखा गलील नगर मा आरू सभागृह मा खबर करतो आरू साहळा क निकावतो रयो।
ईशु क एक कुड़ावा मानुस क आरगो करनों
(मत्ती 8:1-4; लूका 5:12-16)
40 कुड़ावो लागली बीमारी क एक मानुस ईशु क पास आयो, ओका विनती करने लाग्यु, आरू ईशु अगळ घुटना टेकीन कयो, कदाम थार मरजी हय ती मखे वारू कर दे।
41 ईशु ओको पर दया करीन हात बढ़ायो, आरू ओको छिमीन कयो, “हाव यो चाहो कि तु वारू हय जा।” 42 आरू छाटलो ओकी कुड़ की बीमारी जात रया, आरू चो वारू होय गयो। 43 तत्यार ईशु ओका चकचवळयो करीन मकली दिदो। 44 आरू ओको कयो, “देख, कुदाक कोय भी नी कयनो, पुन जाईन पुजारा क देखाड़् कि थार सात मा काय हयो, आरू थारो वारू हुयने क बारामा जो काय नियम मूसा टाकलो छे तेरो चढ़ावो चढ़ाव।”
45 पुन चो मानुस बाहरो जात रयो आरू इनी वात की खबर फैलावने लाग्यो, कि बाद मा ईशु क उजेन्तो गाव मा नी जाय सक्यो, पुन बाहरो जंगल मा रयो; च्यार तरफ से लोगहन ओको पास आवता रया खुब देखड़तो रयो आरू या तक फिरने लाग्यो कि ईशु पछु खुल्लाम खुल्लु नगर मा नी जा सक्य, पुन बारतो जंगली स्थान मा रया; आरू चार तरफ से मानसे ओको आवता रया।