यहुन्ना का प्रकाशितवाक्य
यहुन्ना क प्रकाशितवाक्य
परिचय
प्रकाशितवाक्य न यी किताब नवला नियम न आखरी किताब छे, आरू यी आखरी मा लिखाय। इनी किताब क लिखने वाळो प्रेरित यहुन्ना छे आरू यी किताब ईशु मसीह क पैयदा हयने क बाद मा 95 सालन आस–पास लिखायली छे। 1:1 प्रकाशितवाक्य न यी किताब तिना समय मा लिखी गय जब मसीह लोगहन क सताव हुयतो हुतो। आरू यहुन्ना खुश खबर न आधार पर तीन आरू दूसरी पत्री यान क भी लिख्यो 1 यहुन्ना, 2 यहुन्ना, 3 यहुन्ना। यहुन्ना 13:23 प्रकाशितवाक्य न इनी किताब क यहुन्ना पतमोस नावन एक टापू मा रयन लिख्यो जो कि यहुन्ना वा जेल खाना मा बंद हुतो। 1:9
प्रकाशितवाक्य न इनी किताब क लिखने क लिखनेन खास मकस्द यो हुतो कि इनी किताब क भन्ने वाळान क हिम्मत देवाड़े, कि ईशु मसीह न सात मा विश्वासयोग्य रये आरू इनी वात क विश्वास देवाड़े की ईशु मसीह क पोछो आवने क समय सातले छे। 1:3;22:7 यहुन्ना प्रकाशितवाक्य न इनी किताब क खासकरिन उन सात मंडळी क लिखे जो पाठ 2–3 मा छे। यहुन्ना उन आखी घटना न बारा मा इनी भविष्यद्वाणी न किताब मा लिखे जो त्यो दर्शन मा देखियों हुतो आरू यो भी कि पुराना नियम की काहय वात क भी लिखे जो खासकरिन जकर्याह 6:1-8 मा छे जसो कि सात भीरा आरू सात वाटका उन पीड़ान क सारका छे जिनको यहोवा भगवान मिस्र देश पर मुकळियो हुतो। आरू प्रकाशितवाक्य न किताब आखरी समय क बारा मा देखाड़े। निर्गमन 7–9 आरू त्यो ईशु जीक जासे आरू त्या आखा जो ईशु पर विश्वास राखे त्या हमेशा उका सात मा जीवता रहसे, आरू यी किताब चेतावनी आरू विश्वास देवाड़े कि ईशु छाटलोत आवने वाळो छे।
रूप रेखा
1. यहुन्ना इनी वात क देखाड़े कि त्यो कुन छे आरू त्यो यो दर्शन कसो लेदो। 1:1-20
2. यहुन्ना यी खबर त्या सात मंडळीन देयेत् जो यहुन्ना सिधो ईशु से लेदो। 2:1–3:22
3. आरू यहुन्ना सात सील 4:1–8:5
4. आरू सात भिरा क बारा मा देखाड़े। 8:6–11:19
5. उका बाद मा यहुन्ना मानुस क पोर्या क बारा मा देखाड़ेत जो सात मुनका वाळा अजगर क सात मा लड़ाय करसे। 12:1–14:20
6. आरू यहुन्ना रीस से भरायला सात वाटका क बारा मा देखाड़ेत। 15:1–16:18
7. अगोळ यहुन्ना एर बारा मा देखाड़ेत कि यहोवा भगवान सोरगदूत मा हेर वेरी क कसो हरावसे आरू त्यो जिक जासे। 17:1–20:15
8. आरू आखरी मा त्यो यो देखाड़ेत की आखरी मा नयो सोरगदूत आरू नयी धरती आवसे। 21:1–22:21
1
नमस्कार
1 ईशू मसीह क प्रकाशितवाक्य जो उको यहोवा–भगवान ने अतरान करीन दियो कि वो आपसा दास् नको वो वात, वताड़ देय जिनको छाटोत होयनो जरूरी छे, आरू वो आपसा सोरगदूत क मोकलिन ओका लारे आपसा दास यहुन्ना क बताड़ीयो। 2 जु यहोवा–भगवान क वचन की आरू ईशू मसीह की गवाय, मतलब जो काय त्यो देख्यो हुतो ओकी गवाय दियो। 3 सयाळो छे त्यो जो इनी भविष्यव्दाणी क बोल क भणे, आरू वो जो समळतो होय आरू इनाम लिखली वात क मानतो होय; काहकि समय साते छे।
सातो मंडळी क नमस्कार
4 ✡प्रकाशितवाक्य 4:5यहुन्ना नी तरफ सी आसिया नी सात मंडळीया क नाव:
ओका तरफ सी जो छे आरू जो हूतो जो आवने वाळो छे; आरू उन सात आत्माओ नी तरफ सी जो ओकी राजगाद्दीन सामने छे, 5 आरू ईशू मसीह नी तरफ सी जो भुरसा मा पाक्को आरू गवाय मा आरू मरेला मा कथो जीवतो हुयने वाळो आखा सी पेहलो आरू धरती पर न राजा न सरदार छे, तुमू काजे शांती जोड़ती रोवे।
वो हम मोंग करे आरू वो ओका लुहूय क द्वारा हमको पापो सी छुड़ाय लेदो छे, 6 ✡प्रकाशितवाक्य 5:10आरू हामुक एक राज्य आरू आपसा पिता यहोवा–भगवान क करता पुजारा बनाई दिदो; ओकी ही महिमा आरू पराक्रम युगानयुग रवे। आमेन।
7 ✡मत्ती 24:30; मरकुस 13:26; लूका 21:27; 1 थिस्सलुनीकियो 4:17यहुन्ना 19:34,37मत्ती 24:30देखो वो वादळा क साथ मा आवने वाळो छे, आरू हर एक डुळा उको देखसे आरू वो भी जो ओका भाला गुपिया छे वो भी उको देखसे, आरू धरती पर न पुरी जाती ओका कारण आपसी–आपसी छाती पिटसे। हा। आमेन।
8 ✡प्रकाशितवाक्य 22:13पोरबु यहोवा–भगवान, जो छे आरू हुतो आरू जो आवने वाळो छे, जो आखा सी मोटो ताकत वाळो छे, यो कये, “हाव पेहलो आरू चेहलो छे”
मसीह क दर्शन
9 हाव यहुन्ना थार भाई आरू ईशु न दुःख आरू राज्य आरू धीरज मा तुमरे साथ साजलियो छे, यहोवा–भगवान वचन आरू ईशु की गवाय क कारण पतमोस नावन ने टापू मा हूतो। 10 हाव पोरबु क दाहाड़े आत्मा मा आवी गियो, आरू मार पछोळ भिरा न सारको मोटी ओवाज मा यो कयतला समळ्यो, 11 “जो काय तु देखे उको किताब मा लिखीन सातु मंडळीन क पास मोकली दे, मतलब इफिसुस, आरू स्मुरना, आरू पिरगमुन, आरू थूआतीरा, आरू सरदीस, आरू फिलदेलफिया, आरू लौदीकिया क।”
12 तव हाव उको, जो मखे कयरीयो हुतो उको देखने करीन म्हारो मुय फेरयो; आरू पछो फिरीन हाव सोना नी सात दीवट न क देख्यों, 13 आरू उना दीवट न बीच मा मनसु न पोर्या क सारको एक मनुस क देखियो, जो पाय तक क छिंदरा पेहेनलो आरू छाती पर सोना क पट्टो बांधलो हुतो। 14 उको माथो आरू झोठा धवळिया कापस न सारको जुगाळा हुता याहतोक की पाले क सारको जुगाळो हुतो, आरू ओका डूळा आगठी न धपना सारको हूता। 15 ओका पाय चुखा पितळन् सारका जुगाळा हुता जो मानो आगठान भाट्टी मा हळो–हळो तातो करलो होय, आरू ओकी ओवाज घणो सळटो पानी घुगळनेन ओवाज सारकी हुती। 16 त्यो आपसा जेवड़ा हातमा सात तारा ली रयलो हुतो, आरू ओका मुय सी तेज दुयधाराय तरवार निकळती हुती। ओको मुय ओसो विजाळो हूतो, जोसो दाहड़ु माथे दाहड़े भिबळे। 17 ✡प्रकाशितवाक्य 2:8; 22:13जव हाव उको देख्यो तव ओका पायो पर मोरला सारको पोड़ग्यो त्यो म्हार पर आपसा जेवड़ो हात मेलीन कयो, “मा बिही” हांव पेहलो आरू छेहलो आरू जीवतु छे; 18 हांव मर गयो हुतो, पुन आरू देख हाय जोलोम जीवतो छे; आरू मोतन आरू पोताळन न चाबीया मार जु छे। 19 अतरान करीन जो वात तु देख्यो उका बाद जो हुयने वाळी छे, उन सबन क लिखी ले। 20 मतलब चो सात तारो न क भेद जिनको तु म्हारा जेवड़ा हात मा देख्यो हूतो, आरू उन सात सोना नी दीवट क भेदन वात: वो सात तारा सातों मंडळीन सोरगदूत छे, आरू वो सात दिवट सात मंडळी छे।