7
Ayubu anamlalamikira Mlungu
1 Mwanadamu ana kazi ngumu phapha duniani!
Nazo sikuze ni dza za mchibaruwa!
2 Dza mtumwa agodzeravyo kpwa hamu masaa gafike,
dza mchibaruwa agodzeravyo mariphoge,
3 ndivyo nrivyopangirwa miezi isiyokala na rorosi,
nikapangirwa sonono ya chila usiku.
4 Ninapholala nkuamba, ‘Kucha rini nkalamuka?’
Nyo usiku ni mure, nami nagalagala hiku na hiku hadi ligundzu.
5 Mwiri wangu u tele mabulu na makoko ga nongo,
ngozi yangu ikakatika-katika inatuluka ufira.
6 Siku zangu zinaphiya mairo kuriko gurudumo ra mshonadzi,
nazo nkusira bila ya kuluphiro.
7 Tambukira kukala maisha gangu ni mphuye tu,
mutu mimi sindaona manono tsona.
8 Ye anionaye vivi kandaniona tsona,
undaniendza, ela ndakala siko.
9 Dza ingu ritandavyo chisha rikaangamika,
aphiyaye kuzimu kauya.
10 Aukaye kauya kpwakpwe kaya
na nyo atu ariosagala naye nkumyala tsetsetse.
11 Kpwa hivyo sindanyamala,
nindagomba dzagbwe roho yangu inarumira,
nindalalamika kpwa sonono ya rohoni.
12 Mino kale ni yo bahari, au ni dzinyama ra baharini,
hata uniikire mrindzi?
13 Nchiamba, chitanda changu chindanihenda nihurire,
malazi gangu gandaphunguza lalamiko rangu.
14 Uwe unaniogofyera na ndoso,
na kuniondosa na ruwiya,
15 hata naona baha nifungbwe lugbwe,
nifwe kuriko kuku kugaya.
16 Nikabera maisha gangu, mana sindakala moyo ta kare na kare.
Nirichani mana maisha gangu ni dza phepho.
17 7:17 Zaburi 8:4; 144:3Mwanadamu ni ani hata umuone wa mana
na umfikiriye?
18 Mana unamlola chila kuchapho
na kumchunguza chila dakika.
19 Undaenderera kunilola hata rini?
Usiyeniricha vichache nkamiza mahe?
20 We uchunguzaye anadamu, kpwani nchihenda dambi inakuzuru?
Mbona ukanitsata?
Kpwa utu wani nkakala mzigo kpwako?
21 Kpwa utu wani kuswamehe uasi wangu
na kuusa uyi wangu?
Mana muda mchache wedzao ndalala na kogo,
na uchiniendza, kundaniona.”