18
Bilidadi anaamba
Mlungu nkutiya adabu atu ayi
Mlungu nkutiya adabu atu ayi
1 Chisha Bilidadi kula Shuwa wajibu achiamba,
2 “Hadi rini undaenderera kuendza maneno ga kugomba?
Ririkana vinono naswi hundagomba.
3 Kpwa utu wani hunaolangbwa dza ngʼombe?
Mbona unahuona dza azuzu?
4 Uwe unadzimwamula mwenye kpwa tsukizizo,
Dze, yo dunia indarichwa kpwa sababuyo?
Au mwamba undauswa phatuphe?
5 18:5 Ayubu 21:17Yo taa ya atu ayi inazimwa,
na nyo mohowe taundangʼala.
6 Jiza ndio mwanga mwakpwe nyumbani,
na yo taaye iriyo dzulu indazimwa.
7 Nyagoze nyire zindafupishwa
naye andabwagbwa ni mipangoye mwenye.
8 Mana akahegbwa ni maguluge mwenye,
naye ndiphonyendeka andagbwa dibwani.
9 Andagbwirwa jimbe ni muhambo,
na muhambo undamgbwira ngingingi.
10 Andafwitsirwa lugbwe mtsangani,
na kuhegbwa mo njirani.
11 Vitisho vindamtiya wuoga chila uphande,
navyo vindamzoresa lunyolunyo.
12 Ndzala indammala mkpwotse,
mashaka gandamgodzera agbwe.
13 Ukongo mui undarya ngoziye,
mwana mvyere wa chifo andarya vilungovye.
14 Chifo chindamuhala kula mwakpwe hemani arimokuluphira,
na chindamphirika kpwa mfalume wa vitisho.
15 Tamundakala chirichoche mo mwakpwe hemani
chibiriti chindatsamulwa dzulu ya makaloge.
16 Ko tsini miziye indauma,
na dzulu, pandaze zindanyala.
17 Takuna ndiye mtambukira duniani,
na dzinare tarindahadzwa mo njira-njira.
18 Andazoreswa kula mwangani hadi jizani,
na azoreswe kula duniani.
19 Kandakala na mwana wala mdzukulu kahi za atue,
na taphana ndiyetiya pho ariphokala anasagala.
20 Aho asagalao mtswerero wa dzuwa andaangalazwa ni yo sikuye,
na atu a mlairo wa dzuwa andagbwirwa ni wuoga.
21 Kpwa kpweli ndivyo garivyo makalo ga atu ayi,
hivyo ndivyo pharivyo phatu pha iye asiyemmanya Mlungu.”