35
Elihu anaenderera
kumdemurira Ayubu
kumdemurira Ayubu
1 Chisha Elihu achienderera kugomba achiamba,
2 “Dze, we unaona ino ni haki?
Hangbwe unaamba, ‘Mino nina haki mbere za Mlungu.’
3 Tsona unauza unaamba, ‘Ina fwaida yani kpwako?
Ninaphahani kpwa kusahenda dambi?’
4 Nindakujibu phamwenga na nyo asenao.
5 Lola ko mlunguni na uone,
unula matso ulole go maingu garivyo dzulu sana.
6 35:6 Ayubu 22:2–3Kpwani Mlungu andayugika ichikala wahenda dambi?
Na ichikala dambizo ni nyinji, vyo zinamuhendadze?
7 Ichikala u wa haki, we unamuphani,
au anaphokerani kula mwako mkpwononi?
8 Uyio unahusu mwanadamu dza uwe,
na hakiyo inaweza kufwaha mwanadamu wanjina.
9 Kpwa sababu ya kuonerwa sana, atu nkurira,
nkuririra msada kpwa go ahenderwago ni atu enye mkpwotse.
10 Ela taphana aambaye, ‘Akuphi ye Mlungu muumba wangu,
alavyaye mawira wakati wa usiku,
11 anayehufundza zaidi kuriko nyama,
na ahuhendaye hukale na ikima kuriko nyama a mapha?’
12 Aho nkurira, ela ye kaajibu,
kpwa sababu ya kudzikarya kpwa atu ayi.
13 Kpwa kpweli Mlungu kaphundza chiriro sicho mana,
wala ye Mwenye Nguvu Zosi kachijali.
14 Andakujibu viphi ichikala unaamba kumuona,
na lauro ri mbereze nawe unamgodzera!
15 Mwimwi munaamba iye tsukizize tazitiya adabu,
na kajali sana uyi.
16 Ayubu anafwenula kanwaye kugomba maneno sigo mana,
anagomba maneno manji bila marifwa.”