25
ފޭލިގެކޮޅަށް ވެދުން ކުރުން
1 މާތްރަސްކަލާނގެ މޫސާގެފާނަށް ވަޙީކުރެއްވިއެވެ. 2 ”ބަނީ އިސްރާއީލީންގެ ގާތު ބުނޭ، ’އަހަރެންނަށް ވެދުން ހުށަހަޅާށޭ.‘ އެބައެއްގެ ހިތުގެ އަޑިން ވެދުން ހުށަހަޅަން ބޭނުން ކޮންމެ ބަޔަކު ގެންނަ ވެދުމެއް ވެސް ގަބޫލު ކުރޭ. 3 މި ހާމަކުރާ ތަކެތި ވެދުމުގެ ގޮތުގައި ގަބޫލު ކުރޭ:
ރަނާއި ރިއްސާއި އަދި ކަފުލޯ؛
4 ނުލާއި ދަނބާއި ގަދަރަތް ރޮދި؛
މޮޅު ލިނެން ފޮއްޗާއި ބަކަރި ކެހެރި؛
5 ހިއްކައި ރަތްކުލަ ޖައްސާފައިވާ ފިރިހެން ކަންބަޅީގެ ހަމާއި މޮޅު ބަކަރި ހަން؛ އަކާސިޔާ ލަކުޑި* 25:5 އަކާސިޔާ ލަކުޑިއަކީ ކުރެދިހާ ހަރު ލަކުޑިއެވެ.؛
6 ބައްތި ދިއްލާނެ ޒައިތޫނި ތެޔޮ؛ ޚާއްސަ ކުރުމަށް އުނގުޅާ ތެލާއި މީރުވަސް ދުއްވަން ބޭނުންކުރާ ދުންބުރުވާ ތަކެތަކެއްޗަށް ބޭނުންކުރާ ހަވާދު ފަދަ ތަކެތި؛
7 ޔަމަނު ޢަޤީޤު ހިލާއި އަފޫދު† 25:7 މިއީ އަޅުކަން ކުރާއިރު އިމާމުން ލާން ގެންގުޅޭ ޚާއްސަ ޖުއްބާއެކެވެ. މި ޖުއްބާގައި މޭމަތީ ޕްލޭޓެއް ހަރުކޮށްފައި ހުރެއެވެ. ހެދުމުގައި އާއި މޭމަތީ ފޮތިގަނޑުގައި ޖަހާނެ އެކިކަހަލަ ޖަވާހިރު. 25:7 ނެރުއްވުން 28:6-14
8 އިސްރާއީލީން ލައްވާ ތިމަން ކަލާނގެ އެމީހުންގެ ގާތު އުޅުއްވުމަށް ކަމުދާ ކަހަލަ މާތް ގެކޮޅެއް ތައްޔާރު ކުރުވާ. 9 އަދި އަހަރެން ދައްކާ ނަމޫނާއާ އެއްގޮތަށް މި ފޭލިގެ ހަދައި ފެހާމާނު ލައި ތައްޔާރު ކުރޭ.“
ޢަހުދުނާމާ ފޮށިކޮޅު
10 ”އަދި އެމީހުން ލައްވާ އަކާސިޔާ ލަކުޑިން ފޮއްޓެއް ހައްދާ. އެ ފޮށި ވާން ޖެހޭނީ ސާޅީސްފަސް އިންޗި ދިގު ހަތާވީސް އިންޗި ފުޅާ ހަތާވީސް އިންޗި އުސް ފޮއްޓަކަށް.‡ 25:10 ޢިބްރާނީ ބަހުން ކިއުބިޓް އަކީ ގާތްގަނޑަކަށް މުށެއްގެ ދިގުމިނެވެ. (މުށަކީ 18 އިންޗް). މިތަނުގައި މިވަނީ 2 މުށްބައި ދިގު ދޮޅުމުށްބައި އުސްމިނުގައި ދޮޅުމުށް ހުންނަ ވަރެވެ. އަތްތިލައެއްގެ ފުޅާމިނަކީ 3 އިންޗް. 11 ފޮށީގެ އެތެރެއާއި ބޭރުގައި ރަތުރަން ފަށަލައެއް ލާ. އަދި ވަށައިގެން ރަންވިރުވާ އަޅައި ދާރައެއް ލާ. 12 އަދި ރަނުން ހަތަރު ބޮޅު ވިރުވައި އަޅައި އޭގެ ހަތަރު ފަރާތުގައި ފައިތަކާ ދިމާލަށް ހަރުކުރޭ. އެއީ ފަރާތެއްގައި ދެ ބޮޅު. 13 އަދި އަކާސިޔާ ލަކުޑިން ދެ ދަނޑި ހަދައި އޭގައި ވެސް ރަން އުނގުޅާ. 14 ފޮށި އުފުލުމަށް އެދަނޑިތައް ބޮޅުތަކުގެ ތެރެއަށް ލައްވާ. 15 އެ ދެ ދަނޑި އަބަދުވެސް ބޮޅުތެރެއަށް ލައްވާފައި ބަހައްޓާ. 16 ފޮށިހަދާ ނިމުމުން އަހަރެން ކަލެއަށް ދޭ ޢަހުދުނާމާ ލިޔެވިފައިވާ ހިލަފޮތިތައް އެއަށް ލާ.
17 ކައްފާރާގެ މަޤާމުފުޅު ކަމަށް ވާ އެފޮށީގެ މަތިގަނޑު ރަތުރަނުން ހަދާ. އެއީ އޭގެ ދިގުމިނުގައި ސާޅީސް ފަސް އިންޗި، ފުޅާމިނުގައި ހަތާވީސް އިންޗި ހުންނަ ގޮތަށް. 18-19 އަދި ރަނުން އަތްކަން ކޮށް މަރުތޭލުން ތަޅައިގެން ހަދާފައިވާ ކަރޫބީމުގެ§ 25:18-19 މިއީ ފިޔަގަނޑެއް ލާފައި ހުންނަ ގޮތަށް މަލާއިކަތުންގެ ސިފަ ރަމްޒުކޮށްދޭގޮތަށް ހަދާފައިވާ ސޫރައެކެވެ. ދެ ސޫރަ އެ ފޮށީގެ މަތިގަނޑުގެ ދެކޮޅުގައި ބަހައްޓާ. އަދި އެ ދެ ސޫރަ އަތްކަންކޮށް މަތިގަނޑާ އެއްކޮށް އެކަތިގަނޑަކަށް ހަދާ. 20 މި ކަރޫބީމު މަލާއިކަތުންގެ ސޫރަތައް ހުންނަން ވާނީ އެކަތި އަނެކައްޗާ ކުރިމަތި ވާނެ ހެން މަތިގަނޑުގެ ދެކޮޅުގައި. އަދި އޭގެ ބެލުން އަމާޒުވެފައި ހުންނަން ވާނީ މަތިގަނޑުގެ މެދާ ދިމާއަށް ތިރިއަށް. އެއީ އެ ދެމަލާއިކަތުންގެ ފިޔަގަނޑުން މަތިގަނޑަށް ހިޔާ އަޅައިގެން ތިބޭ ފަދައިން.
21 ޢަހުދުނާމާ ލިޔެވިފައިވާ ހިލަފޮތިތައް އަހަރެން ދޭނަން. އެ ހިލަ ފޮތިތައް ފޮށިތެރެއަށް ލާފައި މަތިޖަހާ. 22 ޢަހުދުނާމާ ފޮށީގެ މަތިން ކަރޫބީމު މަލާއިކަތުންގެ ދެމެދުން އަހަރެން ކަލެއާ ބައްދަލުކޮށް ހަދާނަން. އިސްރާއީލީންނަށް އަންގަން ޖެހޭ އަމުރުތައް އެތަނުން އަހަރެން ކަލެއަށް އަންގައިދޭނަން.“
މޭޒުކޮޅު ހަދަންވީ ގޮތް
23 ”ދެން އަކާސިޔާ ލަކުޑިން މޭޒެއް ޖަހާ. އެ މޭޒުގެ ދިގުމިނުގައި ތިރީސް ހަ އިންޗި ފުޅާ މިނުގައި އަށާރަ އިންޗި އަދި އުސް މިނުގައި ހަތާވީސް އިންޗި ބަހައްޓާ. 24 މުޅި މޭޒު ރަތުރަނުން ޖަރީކޮށް އޭގެ މަތިގަނޑުގެ ވަށައިގެން ވިރުވާއަޅާފައި ވާ ރަނުގެ ދާރައެއް ޖަހާ. 25 އެ ދާރައިގެ ވަށައިގެން ރަނުން ތިން އިންޗި ފުޅާމިނުގެ ކައިރިފަށެއް އަޅާ. 26 ދެން ރަނުގެ ހަތަރު ބޮޅު ހަދައި ކޮންމެ ފައެއްގެ ކަނުގައި އެބޮޅުތައް ހަރުކުރޭ. 27 ބޮޅުތައް ހަރުކުރަން ވާނީ މޭޒުގެ މަތިގަނޑުގެ ތިރީގެ ކައިރިފަށުގައި. އެއީ އެ މޭޒު އުފުލަން ދަނޑިތައް ލެއްވުމަށް. 28 މި ދަނޑިތައް ހަދަން ވާނީ އަކާސިޔާ ލަކުޑިން. އޭގައިވެސް ހުންނަން ވާނީ ރަން ފަށަލައެއް ލާފައި. 29 އެމޭޒަށް ޚާއްސަކޮށްގެން ރަތުރަނުގެ ކަންވާރުތަކެއް ވެސް ހަދާ. އަދި ބޯތައްޓާއި، ތިލަ ތައްޓާއި، ގުޅިތަކާއި ޖޯޑުތައްޓާއި ހަދާ. އެއީ ވެދުން ކުރެވޭ ދިޔާތަކެތި އެޅުމަށް. 30 އަދި ޢަހުދުނާމާ ފޮށިކޮޅުގެ ކުރިމަތީ މޭޒުމަތީގައި ހަޒްރަތަށް ހުށަހަޅާ ބޯރޮށިތައް އަބަދުވެސް ބަހައްޓާ. އެއީ އަހަންނަށް ޚާއްސަކުރެވޭ އެއްޗެއް.“
ބައްތިކޮޅު
31 ”އަދި އަތްކަން ކޮށްގެން ރަތުރަނުން ބައްތިއެއް ތައްޔާރު ކުރޭ. ބައްތިއާއި ބައްތި ދަނޑި ހަދަންވާނީ މަރުތޭލުން ތަޅައި އެކަތިގަނޑެއްގެ ގޮތުގައި. އޭގެ ބުޑާއި، މެދުގައި ހުންނަ ދަނޑިއާއި، ބައްތިތަށިތަކާއި އޭގެ ތަނޑުތަކާއި ފިޔަތައް ވެސް ހުންނަން ވާނީ މިގޮތުގައި. 32 ބައްތި ދަނޑީގެ ދެފަރާތުގައި ފަރާތެއްގައި ތިން ގޮފި ހުންނަ ގޮތަށް ހަ ގޮފި ހަރުކުރޭ. 33 މިއިން ކޮންމެ ގޮފިގަނޑެއްގައި ވެސް ފޮޅިފައިވާ އަލްމަންޑް މަލެއްގެ ސިފައިގައި ތިން ތަށި ހަރުކުރޭ. މި ތަށިތައް ހަދަންވާނީ އަލްމަންޑް މަލުގެ ފިޔަތަކާއި ބުޑުގަނޑު ވެސް ސިފަ ވާނެ ފަދަ ގޮތަކަށް. 34 ބައްތި ދަނޑީގައި ފޮޅިފައިވާ އަލްމަންޑް މަލަކާއި އޭގެ ތަނޑުގެ ސިފައިގައި ހަތަރު ތަށި ހުންނަންވާނެ. 35 ކޮންމެ ތައްޓެއް ހުންނަންވާނީ ބައްތި ދަނޑިން ފަޅާފައިވާ ކޮންމެ ދެ ގޮފިގަނޑެއްގެ ދެމެދުގައި. 36 މި ގޮފިތަކާއި ތަނޑުތައް ވެސް އަދި ބައްތި ދަނޑިވެސް ހުންނަން ވާނީ ރަތުރަނުން މަރުތޭލުން ތަޅައި އެކަތިގަނޑެއްގެ ގޮތުގައި.
37 ދެން އެ ބައްތި ދަނޑީގައި ހަރުކުރަން ހަތް ބައްތި ތައްޔާރު ކުރޭ. އެ ބައްތިތައް ހުންނަން ވާނީ އޭގެ އަލި ކުރިމައްޗަށް އަންނާނެ ގޮތުގައި.
38 ބައްތީގެ ފީތާ ލައްވާ ގިނިފައްޗާއި ދެލިކަނޑާ ތަށިތައް ވެސް ހުންނަން ވާނީ ރަތުރަނުން. 39 މި ބައްތިއާއި އެއާ ގުޅޭ ސާމާނުތައް ހެދުމަށް ތިރީސްފަސް ކިލޯ ރަން ބޭނުން ވާނެ. 40 މި ހުރިހާއެއްޗެއްވެސް ހަދަން ވާނީ އަހަރެން މި ފަރުބަދަމަތީގައި ކަލެއަށް ދެއްކި ނަމޫނާއާ އެއްގޮތަށް.“
*25:5 25:5 އަކާސިޔާ ލަކުޑިއަކީ ކުރެދިހާ ހަރު ލަކުޑިއެވެ.
†25:7 25:7 މިއީ އަޅުކަން ކުރާއިރު އިމާމުން ލާން ގެންގުޅޭ ޚާއްސަ ޖުއްބާއެކެވެ. މި ޖުއްބާގައި މޭމަތީ ޕްލޭޓެއް ހަރުކޮށްފައި ހުރެއެވެ.
25:7 25:7 ނެރުއްވުން 28:6-14
‡25:10 25:10 ޢިބްރާނީ ބަހުން ކިއުބިޓް އަކީ ގާތްގަނޑަކަށް މުށެއްގެ ދިގުމިނެވެ. (މުށަކީ 18 އިންޗް). މިތަނުގައި މިވަނީ 2 މުށްބައި ދިގު ދޮޅުމުށްބައި އުސްމިނުގައި ދޮޅުމުށް ހުންނަ ވަރެވެ. އަތްތިލައެއްގެ ފުޅާމިނަކީ 3 އިންޗް.
§25:18-19 25:18-19 މިއީ ފިޔަގަނޑެއް ލާފައި ހުންނަ ގޮތަށް މަލާއިކަތުންގެ ސިފަ ރަމްޒުކޮށްދޭގޮތަށް ހަދާފައިވާ ސޫރައެކެވެ.