6-7 Ngana Bédiliyem Joseph (Djodjib) karrabba Mary (Meri) barriyanélanja wíba yárra-yarra njána kóma karnmáwa babardarra-bínanja. Kóma njána barrabénanja barrakóyanja ngána wíba karanjdjína bulíkkang, djárrang, djib, nanígud, ngána yalába barrabalíba.

Nganéyabba yaláwa, barréyabba kakóna kabéna yángaya Meri karaméra karókkadja. Ngáyabba yaláwa nganéyabba karaméra karókkadja njabarrábbarraba keyakabéra marnbúrr-ba nayéna, karrabba kayéngka barranáwarrakala barra-barrábarraba bánd-birrikobo. Marnbúrrba nayéna kayóra ngána bulíkkang, djarrang, djib yalába barrabáliba.

8 Kóma karrakárriba keyanarína kánja wékkana kakóna barrakarrówa yídja barraranjdjína narrúrriba ngána makúkkiba. Banbirrinána barrúkkana yibérra sheep (djib). 9 Yálawa balbalana Babba kalamíwara nakkébba barraranjdjína badjórlbba nganéyabba nakkébba karárramanga karanjdjina marbarda karawera nakkébba Bábba Kod kanáyana barranayana barraranjdjina kandabilinjdjíyina yiberra barréba. Yaláwa barréba barrarawayémanga.

10 Njana bálbalana yana kangadjína yibérra, “Kóma nurrawarayémaya. Ngáyabba ngá-rama bamúmawa rdórdbalk ngúdja yínurra. Kárrabba rdórdbalk ngúdja yibbérra barra-nawarla wíba barranora.

11-12 Yéna njadjákka ngarráma karaméra karókkaddja ngana-yórlorr ngána Bédiliyem, nganéyabba wíba ngána David (Daybid) keyarrárl-manga. Néyarra núrrabba neyúkkana nakkéba. Njabbarrábarraba keyakabéra marnbúrrba nayéna kayóra ngána bulíkkang, djarrang, djib yalába barra-báliba. Yaláwa nakálawa djíya ngúddja bamúmawa. Karókaddja yaláwa kaworlabéna núrrabba yinúrra nandama-yámaya yána ngandákana ngandaríma yána nárralakarra. Kánja Bábba ndjánama karaméra kawalamíwara yinúrra. Nakkébba yaláwa kakarráwanga kawarlobéna yingúrra waláya-karenjdjeya mándjad kangóddjbanana keyakóya bárr-barr.”