1 Johanisi
A fosi biifi di Johanisi sikiifi
Wan wowtu a fesi
We, disi na a fosi biifi di Johanisi, wan fu den twalufu apaiti bosikopuman fu Masaa Jesesi, di be e waka e lontu anga en na ala se sikiifi. Da a sikiifi a biifi ya gi biibiwan di de a den peesi peesi. Bika a be yee taki wanlo falisi koliman be kon a den mindii e meke enke a Masaa Gadu sende den. Ma a ná Masaa Gadu sende den. Na kon den kon fu koli den biibiwan kisi poli a biibi fu den. Bika den kon e leli den wanlo falisi falisi sani di Masaa Jesesi á leli den. Na so den be e leli den taki, a á de fu den oli Masaa Gadu weiti, ma den sa libi fu den enke fa den wani.
We, na dati meke Johanisi meke a biifi ya, fu poti den a pasi.
Johanisi be e si den biibisama enke en eigi pikin tu. A dati meke a somen peesi a ini a buku ya ai kai den, pikin. Soseefi ai soi den fa den mu wooko anga lobi. Soseefi ai soi den taki, den wini ala takuudu anga ogii kaba anga somen taa sowtu sani ete.
1
Bigin fu a biifi
1-2 We, mi o bigin sikiifi wanlo sani fu Awan*f1* di den e kai a Wowtu fu libi. A bigin, fosi goontapu be meke, da a be de kaba anga Masaa Gadu a tapu anda. Ne di en yuu doo, ne a saka kon a wi a goontapu ya, fu soi wi fa a libi fu wi Tata, Masaa Gadu de tuutuu. Ne di a kon, ne mi anga den taa apaiti bosikopuman yee a taki fi en. U si en anga u eigi ain. U oli en anga u eigi ana. Ne meke u sa kotoigi taigi u taki, ne enseefi na a Wowtu fu a libi fu tego, di Masaa Gadu sende kon gi u. 3 Ne, i si u daai e taigi u den sani di u yee anga den sani di u si anga u eigi ain baka, fu u sa fende a bunbun switi libi, di wi anga wi Tata, Masaa Gadu anga en Manpikin, Jesesi Kelestesi*f2* e libi anga useefi makandii. 4 Na fu dati ede, mi meke a biifi ya sende gi u, fu u sa de anga gaan piisii enke wi dise.
U mu libi wan kiin libi a fesi
fu Masaa Gadu
fu Masaa Gadu
5 Da, a bosikopu di Masaa Gadu gi u fu paati na taki: Masaa Gadu na kiinkiin leti sondee wan pikin dunguu. 6 Da, efu wan sama taki ai libi anga Masaa Gadu, ma ai libi takuu ete, da na koli ai koli enseefi. Bika, a nái libi enke fa Masaa Gadu wani. Da a de na a se fu dunguu ete. 7 Ma, efu u e waka na a se fu a kiinkiin leti fu Masaa Gadu enke fa Masaa Gadu e libi leti kiinkiin, da wi o libi switi anga useefi makandii. Da wi o de kiinkiin tu. Bika, fu di Masaa Jesesi, a Manpikin fu Masaa Gadu buulu lon gi wi kaba fu wasi wi kiin, meke Masaa Gadu o puu den takuudu anga ogii fu wi gi wi fu u de kiinkiin. Da, den takuudu anga ogii fu wi ná poi tyai u moo.
8 Ma efu u taki, u á du ogii noiti, da na koli u e koli useefi. Da soseefi a tuutuu wowtu fi en á de a ini wi ati tu. 9 Ma efu u piki taki, u du ogii tuu, da Masaa Gadu o gi wi paadon. A o puu ala den takuudu anga ogii ya a ini wi ati enke fa a be taki. Bika Masaa Gadu na wan Gadu di de fu fitoow. A ná e koli sama. 10 Ma efu wi piki taki, nono, wi á du ogii ná wan dei, da na sitee wi e sitee anga Masaa Gadu e kai en leiman. Da soseefi a tuutuu wowtu fi en á de a ini wi ati tu.