1 ငါးရက်ကြာသောအခါ ယဇ်ပုရောဟိတ်မင်း အာနနိဟ အသင်းတော် လူကြီးအချို့လို့နဲ့ လိုက်ပါလျက် တေရတုလု နာမယ်ဆိသော ဆေ့နေနဲ့အတူ ကဲသရိမြို့ဟို ရောက်လာကြအယ်။ အေးသူလို့ဟ ဘုရင်ခံဖေလဇ်ရဲ့ ဆေ့တော်ဟို ဝင်ပင်း ပေါလုအကျောန်းနဲ့ ပတ်သက်ပင်း စွဲချက်တင်ကြအယ်။ 2 အေးနောက် ပေါလုဟို ခေါ်ပင်းမှ တေရတုလုဟ သူ့ဟို စတင်စွပ်စွဲယွေ့ ဆှောက်ထားတာဟ၊

“မြတ်သော ဖေလဇ်မင်း၊ အဆှင့်အားဖြင့် ငါလို့ဟ ရမ်းဆာ့သော ငြိမ်းချမ်းမှုဟို ခံစားရလျက် အဆှင့်ရဲ့ အမြော်အမြင်ကျောန့် ဟေတိုင်းပြေတွင် ပြုပြင်ပြောင်းလဲမှုများ ဖြစ်ပေါ်နေပါအယ်။ 3 မြတ်သော ဖေလဇ်မင်း ငါလို့ဟ ဟေဆောင်ရွက်မှုများဟို နေရာတိုင်းနှိုက် အစဉ်အမြဲ အထူးကျေးဇူးတင်ပင်း ကြိုဆိုကြပါအယ်။ 4 ငါဟ အဆှင့်ရဲ့ အချိန်ဟို ရမ်းဆာ့ မယူလိုပါ။ အဲလိုမို့ အကျဉ်းချုပ်အားဖြင့် ငါလို့ ဆှောက်ထားတာဟို သနားစိတ်နဲ့ နားထောင်ရန် ပန်ကြားပါအယ်။ 5 ပြဿနာဟိုသာ လုပ်လေ့ဆိသော ဟေသူဟ ကမ္ဘာအရပ်ရပ်နှိုက် ယုဒလူမျိုးအပေါင်းလို့နှိုက် ဆူပူအုံကြွမှုများ ဖြစ်ပေါ်အောန် လှုံ့ဆော်နေသူဖြစ်ပင်း နာဇရက်ဂိုဏ်းခွဲရဲ့ ခေါင်းဆောင်တဦးလည်းဖြစ်ကျောန်း တွေ့ဆိရပါအယ်။ 6 ဗိမာန်တော်ဟိုလည်း စုတ်ပဲ့စေရန် ကြိုးစားသဖြင့် သူ့ဟို ငါလို့ ဖမ်းဆီးခဲ့ကြပါအယ်။ 7 *တချို့ လက်ရေးမူကျမ်းများတွင် အခန်းငယ် ၆ခ–၈က ဟို၊ ငါလို့ရဲ့ ကိုယ်ပိုင်ဥပဒေအရ သူ့ဟို စီရင်ဖို့ စီစဉ်ခဲ့အယ်၊ ၇ အဲလိုလဲ စစ်သူကြီး လုသိလာပေမဲ့ သူဟို ကြီးမားလဲ့ အကြမ်းဖက်ပင်း ငါလို့ဆေမှ သူ့ဟို ခေါ်သွားကြအယ်။ ၈ အေးနောက် လုသိဟ အမိန့်ပေးပင်း သူမလာခင် သူ့ဟို အပစ်ပေးသင့်အယ်၊ ဟူယွေ့ ပေါင်းထည့်ထားအယ်။ 8 ဟေအကျောန်းအရာအားလုံးနဲ့ ပတ်သက်ယွေ့ အဆှင်တတ်တိန်း သူ့ဟို စစ်ဆေးရင် သူ့အပေါ် ငါလို့ စွပ်စွဲနေလဲ့အချက်များဟို သိမျော်နိန်ပါလိမ့်မယ်” ဟု ဆှောက်အယ်။ 9 ယုဒလူလို့ဟလည်း ဟေစကားဟ အားလုံး မန်တာဖြစ်အယ်လို့ သူ့ဟို ဝိုင်းယွေ့ စွပ်စွဲကြလေအယ်။

10 ဘုရင်ခံမင်းဟ လက်ရိပ်ပြယွေ့ ပေါလုဟို ပြောဆိုခွင့်ပေးသောအခါ ပေါလုဟ၊

“နင်ဟ ဟေလူမျိုးအပေါ်နှိုက် နှစ်ပေါင်းများစွာ တရားစီရင်ခဲ့သူဖြစ်ကျောန်း ငါ သိပါအယ်။ အေးကျောန့် နင်ရဲ့ဆေ့မှာ ငါကိုယ်ငါ ခုခံကာကွယ်ရလို့ ငါပျော်မိအယ်။ 11 ငါဟ ယေရုရှလင်မြို့ဟို ဝတ်ပြုကိုးကွယ်ရန် သွားရောက်ခဲ့တာ တဆယ့်နေရက်ထက် မပိုသေးကျောန်း နင်တတ်တိုင်း စုံစမ်းသိဆိနိန်ပါအယ်။ 12 ငါဟ ဗိမာန်တော်တွင် လည်းကောင်း၊ တရားဇရပ်နှိုက် အဲဟာမဟုတ်ရင် မြို့ထဲနှိုက် လည်းကောင်း၊ နေရာတကာနှိုက် လူများဟို မငြိမ်မသက်ဖြစ်အောန် တစုံတယောက်သောသူနဲ့ ငြင်းခုန်နေတာဟို ယုဒလူများ မတွေ့ခဲ့ကြပါ။ 13 အခု ငါ့ဟို စွပ်စွဲပြောဆိုကြလဲ့ အချက်များနဲ့ ပတ်သက်ယွေ့လည်း သူလို့ဟ အဆှင့်ဆေမှာ သက်သေမပြနိန်ပါ။ 14 အေးသူလို့ဟ လွဲမားတာဟု ယူဆလဲ့လမ်းစဉ်အရ ငါဟ ဖိုးဖေးများရဲ့ ဘုရားသခင်ဟို ကိုးကွယ်ကျောန်းဟို နင့်အား ငါ ဝန်ခံပါအယ်။ အဲလိုလဲ ငါဟ မောရှေရဲ့ ပညတ်ကျမ်းနဲ့ ပရောဖက်ကျမ်းများတွင် ရေးသားထားသမျှသော အရာလို့ဟို ယုံကြည်ပါအယ်။ 15 သူလို့တတ်တိုင်းလည်း မျော်လင့်သလိုမျိုး ဖြောင့်မတ်သောသူများ ဖြစ်စေ၊ မဖြောင့်မတ်သောသူများ ဖြစ်စေ နောင်တွင် ဆှင်ပြန်ထမြောက်ကြလိမ့်မယ်လို့ ဘုရားသခင်ဟို အမှီပြုယွေ့ မျှော်လင့်နေအယ်။ 16 အေးကျောန့် ငါဟ ဘုရားသခင်ဆေ့ လူလို့ဆေ့တွင် ငါ့ရဲ့ ဩတ္တပ္ပစိတ်ကြည်လင်မှု ဆိစေရန် အမြဲတမ်း ကြိုးစားအားထုတ်ပါအယ်။

17 တ ၂၁.၁၇–၂၈“ငါဟ ယေရုရှလင်မြို့မှ ထွက်သွားယွေ့ နှစ်အတန်ကြာပင်းနောက် ငါ့ရဲ့ လူများအတွက် အလှူငွေတချို့ဟို ပေးကမ်းရန်နဲ့ ဘုရားသခင်ဟို ပူဇော်သကာဆက်သရန်အတွက် ငါ ပြန်ရောက်ဆိလာပါအယ်။ 18 ဗိမာန်တော်ထဲတွင် သန့်ဆှင်းခြင်းဟို ခံယူပင်းနောက် ပူဇော်သကာဆက်သနေချိန်နှိုက် အေးသူလို့ဟ ငါဟို မျော်ကြပါအယ်။ အေးမှာ လူအုပ်ကြီးလည်း မဆိ၊ ရုန်းရင်းဆန်ခတ်လည်း မဖြစ်ခဲ့ပါ။ 19 အဲလိုလဲ အေးနေရာတွင် အာရှနယ်မှလာသော ယုဒလူအချို့ ဆိကြအယ်။ ငါအား စွပ်စွဲပြောဆိုစရာဆိရင် သူလို့တတ်တိုင်း အဆှင့်ဆေ့ဟို လာယွေ့ အပစ်တင်သင့်အယ်။ 20 အားမှမဟုတ် ငါဟ တရားရုံးဆေ့မှာ ရပ်နေသောအခါ ငါနှိုက် စလိုပစ်မှုဟို သူလို့တွေ့ဆိကျောန်း အခုဆိသော ဟေသူလို့တတ်တိုင်း ထွက်ဆိုကြပါစေ။ 21 တ ၂၃.၆ ငါဟ သူလို့ဆေ့နှိုက် ရပ်လျက် ‘ငါဟ သေသောသူလို့ ဆှင်ပြန်ထမြောက်ခြင်းနဲ့ ပတ်သက်ယွေ့ ခုနေ့ နင်လို့ဆေ့နှိုက် စစ်ဆေး စီရင်ခံနေရပါအယ်’ ဟူသော စကားတခွန်းဟိုသာ ကြွေးကြော်ခဲ့ပါအယ်” ဟု ဆိုလေအယ်။

22 ဖေလဇ်မင်းဟလည်း လမ်းစဉ်အကျောန်းဟို ကောင်းစွာ သိထားသူဖြစ်သဖြင့် အမှုကြားနာခြင်းဟို ရပ်နားလိုက်အယ်။ သူဟ “တပ်မှူးကြီး လုသိ ရောက်ဆိလာသောအခါမှ နင်လို့အမှုဟို ငါ စီရင်ချက်ချမယ်” ဟု ဆိုအယ်။ 23 ပေါလုဟို စောင့်ကြပ်ထားရန်နဲ့ လွတ်လပ်မှုဟို နည်းနည်းပေးယွေ့ သူ့ရဲ့ မိတ်ဆွေများ သူ့အား ပြုစုတာဟို မတားဆီးရန် အရာဆိအား မှာကြားလေအယ်။

24 ရက်အနည်းငယ်ကြာပင်းနောက် ဖေလဇ်မင်းဟ သူ့ရဲ့ ပေါင်အိုမ ယုဒအမျိုးသမီးဖြစ်သော ဒြုသိလေနဲ့အတူ ရောက်လာအယ်။ ဖေလဇ်မင်းဟ ပေါလုဟို ခေါ်ခိုင်းပင်းရင် ယေရှု ခရစ်တော်အား ယုံကြည်ခြင်းနဲ့ ပတ်သက်ပင်း သူဟောပြောသော တရားစကားများဟို ကြားနာလေအယ်။ 25 အဲလိုလဲ ပေါလုဟ ဖြောင့်မတ်ခြင်း အကျောန်းနဲ့ မိမိကိုယ်ကိုချုပ်တည်းခြင်း အကျောန်းဟိုလည်းကောင်း၊ လာမဲ့ တရားစီရင်ခြင်း နေ့ရက်အကျောန်းဟိုလည်းကောင်း ဟောပြောသောအခါ ဖေလဇ်မင်းဟ ကြောက်ခဲ့ပင်း “အခု နင် သွားနိန်ပီ။ နောက်အခွင့်ကြုံလဲ့အခါ နင့်ဟို ငါ ခေါ်အုံးမယ်” ဟု ပြောအယ်။ 26 အေးတချိန်တည်းမှာ ဖေလဇ်ဟ သူဟို ပိတ်ဆန်တချို့ ပေးလိမ့်မယ်လို့ မျော်လင့်ကာ အေးအကျောန်းပြချက်နဲ့ ပေါလုဟို ခဏခဏခေါ်ယွေ့ သူနဲ့စကားပြောလေအယ်။

27 နေနှစ်လောက်ကြာပင်းနောက် ဖေလဇ်ရဲ့ ဘုရင်ခံရာထူးဟို ပေါကိဖေတ္တုဟ ဆက်ခံရအယ်။ ဖေလဇ်ဟ ယုဒလူမျိုးလို့ဆေမှ မျက်နှာရလိုသဖြင့် ပေါလုအား ဆက်ပင်း အကျဉ်းချထားခဲ့အယ်။