ME IBELIU ꞌIDI LETA
YESU MANUNA
Me Ibeliu, nate me Yudia, taudi Yesu siemisena ga ꞌaidi sinuwaila ꞌidi gimiloina ꞌenaya. ꞌIdi leta gete Yesu ꞌina loina auwauna manuna, ga ꞌieꞌieꞌita ꞌaene loina auwauna loina kadekadelidi ꞌiewaiwai sinedi, be ꞌilobwenena be me Yudia sida tagwala ꞌaiꞌaila Yesu ꞌenaya, nadigega ꞌinapwanao lowaenei Yaubada siemisa ꞌaiꞌailena.
1
Yaubada Natuna manuna
1 Lowaenei ꞌeda yauna ꞌediyega Yaubada ꞌina ona palopitao ꞌiꞌebwaꞌedi, ga taudi sisimanena tubudao ꞌediya. 2 *1 Pi 1:10; Kol 1:16Ta ꞌebe losalowa ꞌaboꞌada ꞌida tutaya, ꞌina onao ꞌisimanedi ꞌedaya, natuna ꞌenega. Yaubada natunana ꞌiesinuwena, be yage maiboꞌadi ꞌediya ꞌietoloina, ta lowaenei natunana maꞌiyana yage maiboꞌana simweluluidi. 3 *2 Ko 4:4; Kol 1:15; Ib 8:1-2Ta Yaubada natunana tamana ꞌina maedana ꞌimaemaedanae ta tauna Yaubada ꞌilowaꞌeluna. Ta ꞌina ona waiwaina ꞌenega yage maiboꞌana galewaya ta baleꞌuya ꞌigiyagiyaidi. Ta ꞌida toꞌumalinao ꞌediyega ꞌigie ꞌesaseda, ga muliyega Yaubada Toloetana sana ꞌatainaya ꞌimiyatowa. 4 *Pi 2:9Tauna aniloseyao ꞌiloetana sinedi, ta esana nina Yaubada ꞌiꞌebwaꞌenaya anilose ꞌadi esanao ꞌisinabwa sinedi.
5 *Sam 2:7; Ib 5:5Manuna nigeya ꞌebweu tuta Yaubada ꞌebweu anilose ꞌena ꞌida gwae, “ꞌOyo natugu, batuwa tuga yaꞌawa natunemu.” Nai wate ꞌebweuna manuna ꞌigwae, “ꞌAboꞌagu ꞌeguya ꞌida ꞌawatamana, ta tauna ꞌena yada ꞌawanatuna.” Ona nidi getedi natuna namo manuna ꞌionaedi.
6 *Lu 2:13-14Ta tuta nina ꞌina tomatuwa ꞌietunenama baleꞌuya, ꞌigwae,
“Aniloseyao galewaya ꞌilobwenedi be tauna ꞌena sibwagobwago.”
7 *Sam 104:4Ta esi aniloseyao manudi ꞌina ona dumadumana, ꞌigwae,
“Yaubada ꞌina aniloseyao ꞌimweluluidi, ꞌenega ꞌidi tauya ꞌatuwa yagila nadigega, ta ꞌina toguinuwao nidi ꞌatuwa ꞌawe sabelulu.”
8 *Sam 45:6-7Ta esi natunana manuna ꞌigwae,
“ꞌOyo Yaubada ma imu loina palupaluna ꞌuda loina ataya. 9 Bubuna boboꞌana nuwayo ꞌiꞌewena ta toꞌumalina ꞌamu gadilulu.
ꞌEnega ꞌimu Yaubada niꞌatu ꞌieoloimu gwausowala ꞌaiꞌaila ꞌenega, ta ꞌimu gwausowala gosemwao ꞌidi gwausowala ꞌisinabwa sinena.”
10 *Sam 102:25-27Ta ꞌebweu wate ꞌina ona natunana ꞌena ꞌigwae,
“ꞌInapwana ye, tuta nugana ꞌena baleꞌu ꞌumweluluina ta nimamuyega galewa ꞌuguinuwena. 11 Yage nidi ꞌetamo sisasawala ta ꞌoyo ꞌumiyami, ta yage maiboꞌadi sikadekadeli ꞌoama ꞌatuwa, 12 be ꞌununumidi talaꞌapwala nadigega, be ꞌadi ꞌita ꞌiesaꞌu gelasa, ta ꞌoyo geyaꞌabo ꞌuesaꞌu gelasa ta esi ꞌumiya ataya.”
13 *Sam 110:1Onaꞌaiꞌaila, Yaubada nigeya ꞌebweu wate anilose ꞌenaya ꞌida gwae,
“ꞌAtaiguya ꞌumiyatowa be ꞌana laba ꞌamu talauwalao yasaꞌu ebusiyedi ꞌaeyo ꞌubuninaya.”
Ta gete yage nina natuna namo ꞌena ꞌionaena.
14 *Sam 91:11; Gu 12:7Ta aniloseyao taudi yaluyaluwa tuga ta toepilialeale, taudi Yaubada ꞌisaꞌudi be ꞌaene silemeda ꞌaboꞌada, yaisigedi ꞌabo ꞌetoseyana manuna ꞌiesinuweda.