1 ꞌEnega tauna ꞌebemi esaesa nina ꞌena ꞌimiyatowa yaꞌitena, ta nima ꞌatainega pwepwai sinunumina nadigega gimibuki ꞌigiyaina, ta ꞌetoꞌetoladina solanega ta gwaunega, ta wate pwepwai nina ꞌana losipwa ꞌana yau sebeni. 2 Ta wate ꞌebweu anilose waiwaina yaꞌitena, ta ꞌenana sinabwanega ꞌibwaubwau, ꞌigwae, “Yaita sawesawenaya be losipwa nidi ꞌida liꞌamidi be pwepwai ꞌineyasi?”

3 Ta onaꞌaiꞌaila, nigeya ꞌebweu yaita ꞌilobaloba galewaya nai baleꞌuya nai baleꞌu ꞌubuninaya ꞌaene tauna sawesawenaya be losipwa nidi ꞌiliꞌamidi be buki nina solana ꞌida ꞌita. 4 Ga yanuwamwau ꞌaiꞌaila ga yadedoi, manuna nigeya ꞌebweu yaita silobaloba ꞌana lobwene be buki nina ꞌigigege be solana ꞌida ꞌita.

5 ꞌEnega ꞌinapwanao nidi ꞌediyega ꞌebweuna ꞌeguya ꞌigwae, “Geyaꞌabo ꞌudeedoi, manuna laiyoni nina Yudia ꞌenega, tauna Debida ꞌina susuyega niꞌatu ꞌiewaiwai, ga tauna sawesawenaya be losipwa sebeni nidi ꞌiliꞌamidi be pwepwai nina ꞌida neyasi.”

6 *Sak 4:10Ta wate ꞌebemi esaesa nina selabenaya ꞌebweu lami yaꞌitena, yobai ata gamwagamwanidiya ꞌitootoolo ta ꞌinapwanao wate gamwagamwanidiya, ta lami nina ꞌana ꞌita ꞌatuwa tauna siloemwawasina, ta kunanao sebeni ta matanao wate sebeni, taudi matanao nidi nate Yaubada yaluyaluwanao taudi ꞌietunedi baleꞌu maiboꞌana ꞌenaya. 7 Ga lami nina ꞌinao ga pwepwai nina ꞌiꞌewena tauna ꞌebemi esaesa ꞌena ꞌimiyami nima ꞌatainega.

8 *Et 8:3-4, 15:2; Sam 141:2ꞌEnega niꞌatu pwepwai nina ꞌiꞌewena, ga yobai nidi be wate ꞌinapwanao nidi lami nina ꞌenaya sibeꞌu sanamwaꞌuta ga ꞌena sibwagobwago, ta ꞌebweuna ꞌebweuna ꞌediya ma idi ꞌebe gwanegwane siguiguinuwa, ta wate ma idi gaeba goula ta boboꞌadi, ga galaꞌu maina boboꞌana gaeba nidi soladiya sigabuna, ta ꞌana mwalatoi nate Yaubada ꞌina tomotaiyao ꞌidi sidasida situꞌetuꞌe ꞌenaya.

9 *Sam 98:1Ga wali auwauna siwaliyena, sigwae:

“Ona ꞌaiꞌaila, ꞌoyo sawesawemuya be buki nate ꞌuꞌewa, ta wate sawesawemuya ꞌana losipwa ꞌuliꞌami, manuna niꞌatu siloemwawasimu, ga lalamuyega tomota ꞌusaꞌugagidi Yaubada manuna, ta taudi bodao be ꞌenanao be susuyao be ꞌebeloinao maiboꞌadi ꞌediyega. 10 *Ais 61:6; Et 20:6, 22:5; 1 Pi 2:9Manuna ꞌoyo

ꞌuesinuwedi be ꞌaene ꞌimu ꞌebeloina solanaya sida etotaliya Yaubada manuna, be wate baleꞌuya sida etoloina.”

11 *Dan 7:9-10Ta wate aniloseyao yau wawasae yaꞌitedi, nigeya aisawa, ꞌebemi esaesa nina be yobai nidi ta wate ꞌinapwanao nidi sitoolo sakowasiyedi, 12 ta wate ꞌenadi sinabwana yanonona sigwaegwae,

“Tauna lami nina siloemwawasina, sawesawenaya be loina be esaesa be mwalatoi be waiwai be ꞌamayaba be tupu ta wate ꞌawaboboꞌana ꞌida lobadi.”

13 Ta wate mwelumweluluwao ꞌebweuna ꞌebweuna galewaya be baleꞌuya be baleꞌu ꞌubuninaya be olaya, ta wate mwelumweluluwao sena maiboꞌadi ꞌediyega, yanonodi siwaliwali, sigwaegwae:

“Tauna ꞌebemi esaesa ꞌena ꞌimiyatowa, be wate lami nina ꞌediya, tada tuputupu be tada ꞌamayabedi be taꞌawa ꞌeseꞌesedi, ta wate taꞌawa toewaiwaiyedi, tuta maiboꞌana ꞌediya.”

14 ꞌEnega yobai nidi site ata sigwae, “Nadigega,” ta wate ꞌinapwanao nidi sibeꞌu sanamwaꞌuta, ga sibwagobwago.